كنت ولم اعد

#83

حبطت مالشجرة لمت دوزانها فالكرطاب هي وين وعقلها وين راحت لوحد الجهة من الغابة فيه بركة متاع ماء قعدت ( على شكل وضعية البطة ) تشوف فالانعكاس متاعها طاح الليل والبرد زاد حتى نيفها صار احمر اما هيا مش حاسة بحتى حاجة غير النار لي تحرق فيها ملداخل تخزر للمجهول قعدت ساعات وساعات فنفس الوضعية افكار تدي وجيب فيها لين خلاص معادش فيها قامت من مكانها ورجعت ادراجها ركبت فالموطو ديراكت لدارو بعد حوالي 40 دقيقة كانت تما دقت لباب مش مباليا لا بالساعة ولا بتأخر الوقت بعد خمس دقايق حل عليها الباب

لانا: علاه يا ايهم علاه تعمل فيا هكا صدقتك ودرك تعمل فيا هكا يعني بقيت غير انت مغدرتنيش علاش الدنيا تعمل فيا هكا علاه مصدقت حياتي صارو فيها ناس بصح وش فايدتهم وهما يطعنوك فظهرك وش فايدتهم فهمني

شوفتها وهي تبكي قطعتلو قلبو عنيها صارو حمورة دم ونيفها تنفخ قرب يدو على خدها يمسح عليها باش يهديها اما طبعاتو وصارت تعيط

لانا: بعد متمسنيش بعد متقربليش  مضنيتكش علاه وش عملت انا احكيلي وش عملت

معادش يتحمل عياطها وبكاها لي يقطعوا طراف طراف ملداخل قلبو عاصروا على لحالة لي هو السبب فيها حصرها مع لحيط يحاول يتحكم فيها وفعلا قربو منها قعد عندو نفس التأثير عليها هدات ونتاظمت انفاسها وبدات تمسح فالدموع لي نزلو من عينيها بلا متحس بيهم

ايهم: لانا اغزرلي
لانا:منحبش
ايهم: لانا قتلك اغزرلي

طلعت راسها بالشوية تحاول تهرب من عينيه

ايهم: تضني اني ممكن نلعب بيك وبمشاعرك لانا شوفيني مليح اخزري لعينيا هادم تاع واحد راو يكذب عليك

عضت شفتها التحانية حركة تعملها وقت تكون مقلقة حطت صبعها الابهام على شفافها وقاعدة تعض في ضفارها خزرت فيه وثبتت مليح فيه و عملتلو لا براسها خزر فيها شايد ضحكتو بسيف شخصيتها المميزة انو فلحضة تكون قوية واحد ميهزها وفاللحضة الثانية ترجع طفلة لازم تدير بالك عليها

رفد يدو يمسح بقية اثار الدموعها لي بقلو مرسومين على وجهها

ايهم: لانا يا عمري نوعدك غير تكملي هاد لمهمة راح تفهمي كلشي
لانا: ايهم وش تفهمني وانا من شويا شايفتك فقلب قصر مونتينيڨرو اه قلي وش تفهمني لكان وفاء ولا يزن لي كانو ليوم ونجم لي يحـ

خزر فيها خزرة متاع موت حتى سكتت و بلعت كلامها
ايهم: (بلعياط) وش قتلك على ### تع نجم اه قولي وش قتلك

خبط يدو مع لحيط مش مستانس بكلامها على نجم و خصوصا انو عارف بتقربو ليها هاد الفترة شافها وقت تهزت من عياطو اصلا تعرف مليح انو غشو خايب ويعميه وانو معاد يفرق بحتى حاجة محبش يزيد على ما بيها فحط يدو على شعرها يمسح عليه يهدي روحو ويهديها لانو يعرف مليه انو سكوتها ما يدل على خير وانفجارها ربي يجيرنا منو حكا معاها بصوت هادي تقول ما هو الثور الهايج لي كان يعيط من شويا

ايهم : وش بيه نجم

رخفت روحها وهو فهمها ومحابش يضغط عليها يعرفها تعبانا فعود لا هي لي تسأل حاليا هو لي راهو يسأل
رفدها وحطها على سريرو نحالها صباطها سڨمها وغطاها قعد قدامها و بدا يمسح على خدها ابتسامة خفيفة ترسمت على وجهو يحاول يطمن فيها نظراتها فارغة مدل على حتى شي شي لي دخلو فحيط ماشي عارف موقفها رح توثق فيه رح تخيرو هو ولا رح تخير خدمتها ناض وجا رايح للدوش حتى وقفاتو

لانا: قال نتبعو اول شخص يجي للقصر الرئاسي نعرفو المقر نهكرو النظام ونطيحوكم بالدليل
ايهم: خطة فاشلة
لانا: نعرف

رجع قعد قدامها وباسها من راصها بوسة تلخص معاني كثيرة معزة اسف ندم و شوق

ايهم : لانا بليز اوثقي فيا نعرف هادي خدمتك بصح ...
لانا: بصح واش
ايهم: لي تقدر نقولك عليه انو حاولي تصبري عليا وكلشي يتحل صدقيني
لانا: وقتاش الاجتماع
ايهم: ( تنهد ) مزالو شهر
لانا: كيفاش نقدر نوصل للصفحة
ايهم: انساي الالغاز رح يضيعوك
لانا: ايهم متحظرش للاجتماع لكان يحكموك معاهم منقدر نديرلك والو راني قتلك

جبداتو لعندها وخشات راصها فحضنو المكان الوحيد لي تحس فيه بالامان. قعد يمسح على شعرها لين هزهم النوم وماعادو يحسو بحتى حاجة.

ناض صباح شعرو داخل بعضو عينيه نص محاولين ماشي شابع نعاس مكثر التفكير . قام من فراشو يلقا روحو وحدو فوسط السرير قفز يجري يحوس عليها اما فص ملح وذاب كان عارف بلي سكوتها ميدلش على خير ديما هكا متقدرش تعرف وش يدور في مخها لغز قائم بحد ذاتو راحت وخلاتو اما عارف انو مراحش تأذيه عبارتها اللخرة اكدتلو هاد الشي اكدتلو حبها وانها مفضلاتوش على خدمتها وانما هو فجيه وخدمتها فجيهة ثانية

ايهم: اه يا لانا ااه .... وين رحتي

قد انطفئت شعلت حبنا و قد زار الجليد قلبينا ابتعدت دروبنا و انقطعت اتصالاتنا بات فراق. ملجأنا و طرق انفصال بابنا فتبا لتلك الخلافات جالت الأن بخاطري بعض التسؤلات هل نحن حقا نلائم بعضينا ام اننا نكذب على انفسنا دروبنا مختلفة احلامنا متناقضة
بقلم مريم مرسييي 😘