كنت ولم اعد

#85

قاعدة فالكوزينة حتى سمعت وحد يطبطب حلت الباب اتصدمت مع انها كانت تستنى فيها

كنزة: تانيا
لانا: كنزة رجاء معولة تخليني فالباب
كنزة: لالا اتفضلي
لانا: مرسي

دخلو للصالو قعدت لانا وقعدت كنزة مقابلتها

كنزة: تاكلي حاجة
لانا: مرسي جيت نسمع مجيتش ناكل تفضلي احكي
كنزة: صراحتا معلاباليش منين نبدى
لانا: ابداي من الاول عندي الوقت مجيتش من روسيا باش نسمع لحكاية نص ونعرف نصف الحقيقة حابة نحل اللغز نهائيا بركانا لف ودوران
كنزة: فالحقيقة وقت شفت عالاخبار انو الفرد المفقود لعايلة ريباكوفا رجع نصدمت صراحتا منعرفش وش حكاولك اما متاكدة انو رجوعك مكانش حبا فيك
لانا: احكي
كنزة: على حساب مفهمت باباك لوكا ريباكوفا كام في علاقة مع وحدة من الخدمات حبها وتزوجها اما وقت سمعت مرتو مرضاتش بهاد الشي وحاولت تبعدو عليها وهدداتو بانها تحرمو من امتلاك
لانا: كملي
كنزة: سمعت من الخدامات انو لوكا كانت تهمو بزاف المظاهر وسمعتو بين الطبقة البورجوازية لي ينتمي ليها على هذا خبا عليهم زواجو من جهة ومن جهة ثانيا كانت تهمو المادة لي كانت مصدر قوة بالنسبة ليه اما مرتو استغلتها على اساس نقطة ضعف وهدداتو بيها الشي لي خلاه يرضخلها ويرجع ليها اما بشرط وشرطو كان انو تعتبر الطفل لي في كرش الخادمة مرتو الثانية ابنها وتربيه  فالاول رفضت لانو هيا تانيت كانت عندها مكانة فالمجتمع على هاذا لوكا رجع بديعمل علاقات معاها يوميا لين رجعت اونسانت وبداو يحضروا في مرتو الثانية باش تولد بعد لوقت فنفس ليوم لي رح تولد فيه مرتو هاد الشي كان يشكل خطر على الام لانو الجنين فالشهر رح يكمل يكبر في كرشها ورح يزيد من التقلصات وفرولو الاكسجين وحاولو بكل الطرق ياخرو الولادة
لانا: ايهييه
كنزة: نهار العملية كلشي جاز بخير والبنات لزوج كانو ملاح اما وقت سجلوهم قلبو بيناتهم وقت حطولهم براسليات الولادة اما مأعرناش اهتمام للحكاية لاننا بالاصل كنا عارفين انهم راح يتسجلو على اساس توأم
لانا: معنتها انتي الممرضة لي ساعدتي فالعملية
كنزة: بالضبط بعد مرور 3 ايام عيطتلي فالنتين وقت رحت عندها طلبت مني ناخذ الطفلة لي عندها براسلي فيولي للميتم وهددتني بانها تعملي مشاكل فلخدمة وحتى انها ممكن توصل وتقتل عايلتي نعرفها بادرة ديرها فقبلت ومع اني حاولت نشرحلها انو انت هي بنتها وانو اختك لي براسليها غوز هي بنت المرا ثانية الا انها مسمعتنيش ( وقت وحدة تولد يحطولها براسلي هي ولبيبي نفس اللون او الرقم على حسب الحالة ) فطبقت وش قالتلي اما معطانيش خاطري نحطك فالميتم لانو اذا حطيتك فالميتم طريقك كان باين يا خادمة يا وحدة من بنات الليل فدور الدعارة فخليتك عندي مبيد ما نكمل عامي تاع الميدسين ونرجع للدزاير
كنزة:  تانيا CV نكمل

هزتلها راصها مش  قادرة تحكي

كنزة: وقت حبطت للدزاير خفت من عايلتي انو بحسبها بنتي وهوما اصلا عايلة متشددة ميفهموش الهدرة ولو كان ماشي جدي ميخلونيش اصلا نطلع نقرى فرحت عند جنة وٱدم وحكيتلهم لي صار وفورا قبلو متتخيليش قداش فرحو بيك والبقية تعرفيه
لانا: سامحيني حابة نروح

بعد معرفت لحكاية والصدمة لي طاحت عليها مستناتهاش كملت وخرجت مالدار تضحك وتبكي فنفس لوقت عمرها لا حطت هاد السناريو فراسها الحقيقة مرة بكثيير من كل توقعاتها اما رن في راصها الجملة لي قالتها كنزة فالاول
"صراحتا منعرفش وش حكاولك اما متاكدة رجوعك مكانش حبا فيك "
وفجأة تفكرة كلام باباها
" ابقاي معانا "
لانا: معنتها ماكس وقت قال "  يوليا مريضة "  هههههههههههههه  لالا اااااااااااه يا ربي علاااااااااااااه
نزلو دموعها مش قادرة تتحمل اكثر حاسة قلبها رح يخرج من مكانو كمية الالم لي حاسة بيها حاليا فاقت كل لحدود
مسحت دموعها لي مرضاوش يحبسو راسها رح يتفلق رفدت تليفونها عيطت للي يقدر ياكدلها النتائج لي وصلت ليها ويحول شكوكها ليقين
***: الو
لانا: ايمن
ايمن: لانا شبيه صوتك
لانا: منيش قادرة نحكي حاليا اما اكيد راح نحكيلك وقت نرتاح
ايمن: اوكي وش كاين
لانا: حابة الملف الصحي متاع يوليا ريباكوفا
ايمن: اوكي ارتاحي دك نشوفهولك
لانا: ايمن بليز محتاجتو فالحين
ايمن: اوكي متكسريش راصك دقايق ويكون عندك

كبات عليه ركبت فطونوبيلتها وطارت لدارها مش قادرة تتحمل صدمات اكثر لي جاز عليها يكفيها صدمة مور اختها من وفاة امها لليوم عمرها لا عاشت حياة طبيعية فالاول كانت تتمنى لو ماراحتش لوهران وقعدت عايشة مع اضطهاد خاوتها اما ليوم تتمنى لو انها مخلقتش اساسا ومعاشتش هاذ الكذبة لكبيرة

وصلت قدام دارها لين صونا تليفونها ايمن

لانا: ايمن وش لقيت
ايمن: عندها اكتئاب حاد اما ما عندها حتى مرض يتطلب نقل الانسجة او الاعضاء

كبات عليه حلت لباب وطلعت طول لبيتها وغلقت على روحها.تسمع فصوت جنة اما بعييد عليها

جنة: لانا  لانا حلي لباب لانا
لانا: همال وشنو وشنوو

نحات مونتوها خبطاتو فالارض دموعها يسيلو وحدهم

لانا: علااااااااااه علااااااااااه حابين يكسروني بكل الطرق علااااااااااه

خبطت لكوافوز تاعها جابت ڨاع الدوزان فالارض مش قادرة مش قادرة تتحمل مخها يرسم فالسيناريوها

لانا: كي ماشي علاجال يوليا علاجاااال وشنو

صوتها يطلع مخنوق من كثر الغصة لي واحلة فحلقها قلبها واجعها وقواها لكل خارت فتكساار البيت لين طاحت على ركايبها

لانا: يااااااااااااا ربي رحمتك معادش فيا

وقف كلشي غير دموعها لي يسيلو يطفيو في نارها لين سمعت عيطة من برا البيت جنة وهي تعيط عليها بصوت مخنوق زعزعت بيه المكان
جنة: لااااانااا حلي البااااب  بلييييز