Tudo passa

Episode 68

Official introduction of his husband by Erza president

​. ဇွန်လ၏ နံနက်ခင်း၌ နွေဦးလေပြေလေးသည် တငြိမ့်ငြိမ့်တိုက်ခတ်လျက် အသင့်ဖွင့်ထားသည့် ပြတင်းပေါက်မှ တစ်ဆင့်အိမ်အတွင်းသို့ ဝင်ရောက်နေ၏။ ဖြူလွလွ ခန်းစီးပဝါလေးသည် လေနှင့်အတူ ‌ဝေ့ပျံနေလေသည်။ မိုင်ဂဂ်ါသန့်သည် အိမ်အပြင်ဖက်နှင့် ဆက်ထားသော ဝရံတာ၌ ထိုင်ကာ သူ ယမန်နေ့ညနေမှ ဝယ်ထားသော lithops ကျောက်တုံးပုံစံ ရှားစောင်းပင်များကို နေရာချနေသည်။ လက်ဖက်ရည်ပန်းကန်လုံးများ၌ ထည့်ရသည့်
graptopetalum hybrid ကဲ့သို့သော အပင်သေးသေးများကို သန့်ရှင်းရေးလုပ်နေပြီး ကျောက်တုံးကဲ့သို့သော succulents အပင်များကိုလည်း သေချာစွာ စိုက်ပျိုးနေလေသည်။ မြေကြီးများနှင့် အပင်အတွက် မြေဩဇာများကို ကိုင်တွယ်ထားရသောကြောင့် မိုင်၏ လက်နှစ်ဖက်စလုံးသည် ပေကျံနေပြီး နေပူရှိန်ကြောင့် ချွေးစီးကျနေသည်။

တီရှပ်အင်္ကျီလက်တိုနှင့် ဘောင်းဘီတိုကို ဝတ်ဆင်ထားသော ချွမ်ဟွားသည် ရေခဲစိမ်ထားသော သံပုရာရည်ဘူးကို ယူလျက် အိမ်အခန်း၏ အတွင်းမှ ထွက်လာသည်။ ဇွန်လသည် ချွမ်ဟွား၏ ကျောင်းအားလပ်ရက်ဖြစ်တာကြောင့် ချွမ်ဟွားသည် အိမ်၌ မိုင်နှင့် မနက်နေထွက်သည်မှ ည‌နေစာစားချိန်ထိ အတူ ရှိနေနိုင်၏။ ညဖက်တွင်မူ မိုင်သည် သူ့အနားအကပ်မခံပေ။ အခန်းတံခါးကို လော့ချထားပြီး အခန်းပင် ခွဲနေသေးသောကြောင့် ဖြစ်သည်။ ချွမ်ဟွားသည် မိုင်၏ ဘေးတွင့် ဆောင့်ကြောင့် ထိုင်ချရင်း မိုင်၏ ပါးပြင်ကို အေးစက်နေသော ဖန်ခွက်နှင့် ကပ်လိုက်သည် ။

"နေပူနေပြီ အိမ်ထဲ ဝင်တော့လေ "

" ငါ ပြီးတော့မှာပါ။ ခဏလေးပဲ စောင့်"

"တစ်နေ့နေ့ အဲအပင်တွေပဲ လုပ်နေတာပဲ၊ ကျွန်တော့်ထက် အဲအပင်တွေက ပိုချစ်ဖို့ ကောင်းနေတာလား? "

မိုင်သည် ပြုံးနေရင်း ဘာမှ မဖြေပေ။ ချွမ်ဟွားသည် မိုင်၏ အပင်များကိုသာ တစ်ချက်သာကြည့်ပြီး မိုင်၏ ဘေး၌ ပူးကပ်လျက် ဝင်ထိုင်သည်။

"ဟိုဖက် နည်းနည်းရွှေ့ အပင်တွေ ဖိမိမယ်၊ သူတို့က ကလေးလေးတွေပဲ ရှိသေးတာ ၊ နာကုန်မယ်"