Tudo passa

Episode 56

《ကိုယ်က အသက်ကြီးနေပြီ》

   နောက်တစ်နေ့ မနက်စောစောတွင် မိုင်သည် မြို့တော်အတွင်း စတူဒီယိုတစ်ခုကို သွားလိုက်သည်။ ထိုစတူဒီယိုသည် နာမည်ကြီး ရှန်းမင်လုပ်ငန်းစု၏ လက်အောက်ခံ ဖြစ်သည်။ ရှန်းမင်သည် လွန်ခဲ့သော နှစ်တွေတုန်းက ထိတ်ထိတ်ကြဲ အောင်မြင်ခဲ့သော်လည်း ယခုအချိန်တွင်မူ လုပ်ငန်းစု၏ လက်အောက်ခံ လုပ်ငန်းခွဲပေါင်းများစွာကို ရောင်းချပစ်နေကာ အခြေမတည်ငြိမ်ဖြစ်နေသည်။ SHINNIA လက်အောက်ခံ စတူဒီယိုတစ်ခုနှင့် အဆိုပါ ရှန်းမင်လက်အောက်ခံ စတူဒီယိုနှစ်ခုပူးပေါင်းထားပြီး အဆိုပါ စတူဒီယို၏ လုပ်ငန်းစဉ်များသည် သံသယဖြစ်ဖွယ် အ‌‌ခြေအနေတွင် ရှိနေသည်။

    သူ‌ဌေးယွဲ့က သူ့ကို သေချာလေး ကိုင်တွယ်ဖို့  ပြောထားသည်။ မိုင်သည် မြေယာပိုင်ဆိုင်မှုကနေ ရှုပ်ထွေးနေသော အဆိုပါ ပြသနာကို ကြည့်ပြီး ခေါင်းကိုက်နေသည်။ လုပ်ငန်းရှင်တော်တော်များများ၏ စီးပွားရေးအကြပ်အတည်းကြားတွင် အဆိုပါ စတူဒီယိုမှ ထွက်သော ဇာတ်လမ်းတွဲများအပေါ်၌ ဝေဖန်မှု‌တွေက တက်နေတာ ဖြစ်သည်။ စတူဒီယိုမန်နေဂျာ၏ ရင်ကွဲနာကျနေသော တောင်းပန်အကူအညီ‌‌တောင်းသံက သူ့ကို ဂနာမငြိမ်ဖြစ်နေစေသည်။

"ကောကော XM studio  ကို သွားမလို့လား"

" အင်း "

    ချွမ်ဟွားသည် မိုင်၏ အနားကို ကပ်ကာ မိုင်၏ ရင်ခွင်ထဲ တိုးဝင်လေသည်။ ရုတ်တရက်မို့ အနည်းငယ်တောင့်တင်းသွားပေမဲ့ မိုင် အလိုက်သင့်လေး ဖက်ထားပေးလိုက်သည်။

"ကောကော ကျွန်တော်တို့ လက်ထပ်ကြဖို့ တွေးဖူးလားဟင် "

  မိုင်သည် အသက်အောင့်လုမတတ်ဖြစ်သွားသည်။ လက်ထပ်ဖို့။ သူ ရင်ထဲအထိ အောင့်တက်သွားသည်ဟု ခံစားလိုက်ရသည်။ သူသည် ချွမ်ဟွားနှင့် ကောင်းမွန်သော  ဆက်ဆံရေးကို နှစ်သက်သော်လည်း သူတို့နှစ်ယောက်ကို ချည်နှောင်ဖို့ မတွေးခဲ့ပေ။ သူသည် အမြဲတစေ အလုပ်ရှုပ်နေပြီ အိမ်ပြန်ချိန်လည်း မမှန်ပေ။ အကယ်၍များတစ်စုံတစ်ယောက်နှင့် လက်ထပ်ထားပါက သူသည် ထိုအရာများအတွက် အားနားနေရဦးမည် ဖြစ်သည်။