Tudo passa

Episode 23

《 လေးလေးမိုင်၏ ပြသနာအိုး တူလေး အိမ်ရောက်လာခြင်း》

    မနက်စောစောတွင် မိုင်သည် ဘတ်စ်ကားဖြင့် LUNAR အိမ်ရာသို့  သွားကာ ချန်ချန်ကို အားပေးနှစ်သိမ့်ကာ အခုကိစ္စအတွက် စိတ်မကောင်းဖြစ်ကြောင်း ပြောဆိုဖျောင်းဖျရသည်။ မိုင်၏အစီအစဥ်လိုအပ်ချက်ကြောင့် ဖြစ်သွားရတာကြောင့် သူဌေးယွဲ့နဲ့ တိုင်ပင်ကာ ရှိုးပွဲတစ်ခုမှာ ပြန်ထည့်ပေးမည်ဖြစ်ကြောင်း ၊တခြားသော Episode တစ်ခုမှာ ပါဝင်ခွင့်ရရန် ဖိတ်ကြားချက်တွေကို ပို့ပေးမည် ဖြစ်ကြောင်း ပြောတော့ ချန်ချန်က စိတ်သက်သာရသွားဟန်ပေါ်သည်။ ပြီးနောက် ချန်ချန်က ကိစ္စတွေ ပြေလည်သွားသောကြောင့် ကုမ္ပဏီလေ့ကျင့်ရေးကို စတင်လုပ်ဆောင်နေပြီဟု ဆိုသည်။

    တရုတ်ပြည်မ၏ ရှုပ်ထွေးသော မူဝါဒရေးရာတွေ၏  အကြောင်းအရာတွေကကို မိုင်သေသေချာချာ  နားမလည်တာကြောင့် ကသိကအောက်ဖြင့် ငြိမ်ခံပေးလိုက်ရသည်။ သူဌေးယွဲ့ပြန်ရောက်နေပြီဟု ဆိုသဖြင့် မိုင် ကုမ္ပဏီကို ပြန်လာခဲ့သည်။ ရီကာဒိုက သူ၏ ရုံးခန်းကို လာခဲ့ရန် ဆိုတာကြောင့် မိုင်သွားရပြန်သည်။ ရီကာဒိုက တန်ကျောင်းအဆင့်မြင့်လက်ဖက်ခြောက်တွေကို သေတ္တာနဲ့ တစ်ခုပေးသည်။ မန်နေဂျာအဖိုးကြီး သုံးယောက်ရဲ့ အပေါ်ယံသကြားဖြူးထားတဲ့ ဆက်ဆံရေးထဲ မိုင် ဝင်မပါချင်ပေ။ SHINNIA တွင် မိုင်ကဲ့သို့ အငယ်တန်းမန်နေဂျာတွေ ရိုက်သတ်လို့ မကုန်အောင် ရာနဲ့ ချီ၍ ရှိသည်။

     အဘယ်ကြောင့် ဒီအဖိုးကြီးတွေက မိုင်ကို ချည်းကပ်နေသည့် တစ်ခုထဲသော အကြောင်းပြချက်က သူဌေးယွဲ့ကြောင့် ဖြစ်သည်။ မိုင်သည် ကုမ္ပဏီတွင် အလားအလာရှိသော မန်နေဂျာ တစ်ခုဖြစ်သည့်အပြင် သူဌေးယွဲ့ကျန်းရှင်းနှင့် ပတ်သက်ခင်မင်မှု အများဆုံးဖြစ်သည်။ အနုပညာလောကထဲက လူတော်တော်များနဲ့ သိကျွမ်းနေသော မိုင်သည် သူတို့ ၃ ယောက်ကြားက နယ်ရုပ်ကလေး ဖြစ်နေသည်။ ရီကာဒိုသည် MUC ၏ နောင်ထပ်လာမယ့် အပိုင်းသစ်၌ သူ့ဖက်က ပိုထောက်ခံပေးနိုင်သည့် အနုပညာရှင်တွေသာ ခေါ်စေလိုသည်။ သူ့ကို တခြားသောမန်နေဂျာ၂ ယောက်၏ အတွင်းရေးကိစ္စများကို စုံစမ်းခိုင်းထားသည်။ ရီကာဒိုသည် မန်နေဂျာရုန်နဲ့ စာလျှင် မိုင်နှင့် ပို၍ အဆင်ပြေသေးသည်။ အမြဲတစေ လက်ဆောင်ပဏ္ဏါများပေးတတ်သည်က တစ်ကြောင်း၊ အတင်းဖိအားမပေးတာကြောင့်လည်း ပါသည်။