Chapter 146
Sue Xing NwayApril 20, 2023
Chapter 146
ကင်မရာက သူ၏ နက်မှောင်နက်ရှိုင်းကာ စိတ်ခံစားချက်တို့ ပြောင်းလဲသွားသည့် မျက်ဝန်းကို ဆယ်စက္ကန့်ခန့် အနီးကပ် ရိုက်ပြပြီးနောက်တွင်တော့ ဤရိုက်ကူးချက် အပြီးသတ်နိုင်သွားတော့သည်။
ဒီနှစ်ယောက်ကတော့ တကယ်ကို ... သူတို့ ရိုက်သမျှ ရိုက်ချက်တိုင်းက ပြီးပြည့်စုံလု နီးပါးပဲ အချစ်ရဆုံးသူက ဘေးမှာ ကြည့်နေလို့များလား ...
ကျောက်ချွမ်က အံ့ဩလေးစားမှုအပြည့်ဖြင့် လက်ခုပ်တီးကာ ပြောလိုက်သည်။
"နောက်ဆုံးအကြည့်က မိုက်လိုက်တာ ကျိကော ကောက "လူကြမ်းကြီးရဲ့ နူးညံ့တဲ့ ခံစားချက်များ" ဆိုတာကို အပီအပြင်ကို သရုပ်ဖော်သွားနိုင်တာပဲ အိုကေ ဒီနေ့အတွက်တော့ ဒီလောက်ပဲ အားလုံးပဲ ရိုက်ကူးရေး ပြီးသွားပါပြီ ..."
"YES ..."
အားလုံး အားရဝမ်းသာ အော်ဟစ်လိုက်ကြသော်ငြား ရှောင်ကျားရှုကမူ တိတ်တိတ်လေး ခိုးထွက်ကာ လိမ်းဆေးဘူးအချို့ကို ကောက်ယူလာလိုက်သည်။
ဒီဆေးက တကယ် အလုပ်ဖြစ်တယ်တဲ့ ဒါကြောင့် ပြင်ဆင်ထားရမယ်လေ ...
ကျောက်ချွမ်နှင့် စကားပြောနေသော ကျိမြန်က သူ့ကို ဖျတ်ခနဲ လှမ်းကြည့်လိုက်သော်ငြား လက်နှစ်ဖက်ကို နောက်ပစ်လျက် ခေါင်းစောင်းကာ အပြစ်ကင်းစင်သည့် အပြုံးတို့ဖြင့် ပြုံးပြနေသူကိုသာ တွေ့လိုက်ရသည့်အခါ မရယ်ဘဲပင် မနေနိုင်တော့ချေ။
"ရှောင်ရှု ဒီနားလာခဲ့ အိမ်ပြန်ကြရအောင် ..."
"အိုကေ ..."
ရှောင်ကျားရှု၏ ဘောင်းဘီအိတ်ကပ်တစ်ခုလုံး လိမ်းဆေးဘူးများဖြင့် ပြည့်နှက်နေရာ ကျိကော သတိထားမိသွားမည်ကို စိုးရိမ်ရပေသည်။ ဆေးဘူးများကို ကျောပိုးအိတ်ထဲ ပြောင်းထည့်ချင်သေးသည့်အတွက် လက်ကိုယမ်းလျက် ပြောလိုက်သည်။
"ကျိကော ကားနားကို သွားနှင့်နော် ကျွန်တော် သန့်စင်ခန်း သွားလိုက်ဦးမယ် ..."
