❄️نفس واحدة تكفي❄️

97

⚠️قريبا النهاية⚠️
🌍نفس واحدة تكفي🌍
تخشات حداه وتغطات وشدات فايدو وبقات تتلعب بصباعو وهو يديه لخرا ورا راسو ومعمض عينيه تيتصنط للصمت..
نازلي: علي
علي: ممم
نازلي: بغيت نحمل تاني.
علي حل عينيه:نازلي مقادين على حمالة تاني..غيخصك تغلسي ونتي متترصايش..راك شايفة الخدمة كيدايرة..بحرا نتكافاو مع نفس..
نازلي: لا راه من الأحسن نزيد دبا ويكبرو بجوج دقة وحدة..ونتهناو ديك الساعة..
علي: نازلي لاا الله يهديك..
نازلي: علااش..
علي: هاكاك..كيغاديري تكبريهوم بجوج..غتكرفسي..وغتوحلي فيهوم..
نازلي : لااا..انا قادة بولادي..وحتا الخدمة راه قادة بيها..
علي شاف فيها ودار عطاها بالظهر..
هي تصدمات تتشوف فيه وهي تبدا تضحك..
نازلي: اهيا ..ياكما تتوحم..شفتك وليتي دغيا تتقلق ههههههههههه..دور دور..
علي: نازلي خليني بغيت نعس ..غدا غنخدم
نازلي: عارفة..دبا مغضورش..باغي تخاصم معايا..اهيا الحياة قصيرة..ومرفتي شكون السابق..راه غتندم..
علي ضار شافيها الشوفة تاع من نيتك اش هاد الموضوع
نازلي: تمام..انا ..انا درت تيست ولقيت راسي حاملة..
علي ضار بالزربة مخنزر..
علي: مكنتيش تتشربيها..بففففغف
نازاي: تااا..مكنتش تنشربها..دبا حماااالت معندنا منديرو..يلاه تصبح على خير غدا تابعني الطبيب مع الصباح..
عطاتو بالظهر ونعسات وهو بقا مصدوم فيهااا..هوما باقي حتا مكبرو بنتهوم..وباغا تزيد..بقا تيفكر..حتا جاه النعاس ونعاااس
صبح الصباح ناضت نازلي على صوت نفس ..هزاتها تترضع فيها وعينيها تيتسدو..اما نفس حالا عينيها ..شبعااات نعاس..حتا سالات وحطاتها حدا علي وحطات يدو عليها باش يعرف بلي حداه نفس..ومشات للدوش دوشات وخرجات ملوية فبينوارها ..لقات نفس "تتغنغن" غير مع راسها مجمعة..وعلي نااعس..مشات للبلاكار جبدات حوايجها ولبسات..وجدات حوايج نفس ووجدات ليها ساكها..ومشات حداها مسحانليها ولبساتها وبدلات ليها..وهبطاتها معاها..يوجدو للفطور..
وجدات وفطرات ورضعات نفس..وحطاتها فرولاكس ..وطلعات تفيق علي لي ولف النعاس ..
نازلي:انوووووض ..علييييي..نووووض
علي عينيه مغمضين :اش بغيتي..
نازلي:ليوم احبيبي غترجع للخدمة الا مافخباركش هاهيا فخبارك..يلاه نوض تغعد..
علي: بففف..شحال ساعة..
نازلي:8:30
علي: بففف..(ناض) فيناهيا نفس..
نازلي: راها لتحت..نوض دوش ولا بدل ولا شوف اش بغيتي دير..وهبط تفطر باش نديو نفس لخالتي زهرة مابغيتش نمشي بوحدي..
علي:واخا..جبديليا ما نلبس غندخل ندوش دغيا..
مشا دخل هي جبداتليه حوايجو..نشفات شعرها..ودارت ماكياج خفيف..وهزات جاكيطها وساكها وهبطات..
هبط علي شعرو فازغ وداير القب تاع الكابيشون ومغوبش باقي خاسر من النعاس..تبانليه نازلي مجمعة مع نفس ..شرب كاس تاع الحليب وهز الساك تاع نفس وهبط..تبعاتو نازلي..

وصلو عند زهرة وطلعات نازلي هازا نفس والساك..عطاتها ليها ووصاتها وهبطات..
نازلي:دوزني عند الطبيبة لي كنت متبعة عندها ..
علي مجاوبهاش..مقلق منها وتاهيا ممسوقاش لييه..نااااشطة مع راسها..
وصلو وطلعو بجوج..شدو نوبة حتا وصلات نوبتهوم ودخلو..
نازلي:سلام دكتورة..هاحنا جينا تاني..
الطبيبة: مرحبا مبروك الزيادة بعدا..
نازلي: شكرا..انا درت البارت تيست فالدار وطلع ليا 2 شرطات بغيت نتأكد..و بغيت نشوف واش مكاين مشكل باش نحمل تاني..
الطبيبة: واخا تفضلو معايا..
ناضو معاها ودخلو للغرفة الفحص عرات ليها كرشها ودارت داكشي لي تيديرو وبقات تدوز ديك اللعيبة
الطبيبة: ولدي طبيعي ولا قيصري..
نازلي : طبيعي..
علي متكي على الحيط مغوبش تيشوف فالتلفازة..
الطبيبة: شحال باش ولدتي..
نازلي:تقريبا 4 أشهر..
الطبيبة: نتي حاملة بالصح حاملة تقريبة 7 الأسابيع..
نازلي حلات عينيها بالفرحة..
الطبيبة: هاهوا الجنين..مبرووك عليك هههه..
خرجو للبيرو..
الطبيبة: ماشي زربتي..
نازلي: بغيت نتابعهوم باش نتهنى ..ونكبرهوم دقا وحدة..
الطبيبة:مزيان..المهم مكاين حتى خطر..لا عليك لا على الجنين..حيت كون كنتي ولدتي بالفتيح غيخصك تصبري عل أقل عام عاد تحملي..ولكن دبا عاديي..المهم غنكتبليك كينات بحال ديك المرة..غيعاونوك فالوحم..
نازلي: صراحة تنحس براسي عادي ..زعما متنحسش لا برضان لا بدوخة لا والو..
الطبيبة: نتمنى يبقى الوضع هاكا ههههههههه

خرجو من عند الطبيبة..نازلي فرحانة وعلي داير يديه فجيابو مخنزر..
نازلي: ناس تيفرحو ماشي تيغوبشو..مباغينيش نزيد؟؟
علي:بففف نتي بحرا تكافاي مع نفس وغتزيدي واحد ولا وحدة خرا.
نازلي: انا واخا يكونو عندي حتا عشرة ..قادة نقاد وقتي على قبلهوم كاملين..المشكل هو هادة..المشكل هو حاجة خرا..خايف نقرب نولد وطرا شي حاجة تاني..
علي ضور وجهو..
نازلي: شتيي..شوف داكشي معندو علاقة بالحمالة ولا الولادة..وغنولد وغنكبروهوم بجوج ..وغنعيشو بجوج ..ونشوفو حفادنا..دونك متبقاش تفكر بسلبية..انا دبا حاكلة ومحاسة بوالو..محال غاع واش يجيني الوحم..عارفاك احبيبي تتكرفس معايا ولكن تماك فين كاينة حلاوة تاع الحمل ..اوا ضحك ضحك..مموالفاش نشوفك مغوبش ..تمام؟؟
علي: زيدي زيدي..
#يتبع