جيتي مثل الغيث والدنيا صحوه

Part 30

عارف كان واقف بالممر ومسك يد يزيد وبحده:كيف تمد يدك على بنت !
يزيد انفجر عليه وصارخ:وانت شعليك ولا ناسي انك كنت مشارك بجريمة قتل ؛ومشى وتركه
عارف توتر وخاف ان الجوهره سمعته ودخل عليها :وش تسوين ؟
—————•••••—————
الجوهره وهي تحاول تنسدح :الله جابك بنام عادي تطفي النار لاتكتمني
عارف:تمام ؛وطفى النار ورجع لها
الجوهره فزت :شتبي؟
عارف:سمعتي شي؟
الجوهره:مثل وش ؟
عارف زفر براحه انها ماسمعت وطلع بدون مايتكلم وقفل الغرفه
الجوهره:كم الساعهه؟
عارف:8:30PM
الجوهره :أتمنى محد يدخل بنام ؛وهي منسدحه تفكر وش يسوي ذيب ووينه للحين مادور عليها معقوله ونامت وهي تفكر
عارف ومهنا قرروا يطلعون والباقي يكملون المراقبه

<صباح يوم جديد الساعه 7:30AM في السعوديه >
<في بيت ابو سعد >
ام سعد:يا مازن قم افطر وراك دوام
ابو سعد:طيب خلاص انزلي بتسبح واجي
ام سعد:زين ملابسك على السرير جاهزه؛وطلعت
قام ابو سعد وتسبح وبدل ملابسه ونزل بعد ماتعطر ولبس شماغه
ابو سعد:صباح الخيرات
مشاعل ابتسمت:صباح النور والورد
رحاب:صباح الورد والياسمين يا احلا اب بالعالم شلونك
ابو سعد:بخير كيف أصبحتوا انتم
الكل:بخير
نزل سعد يركض وهو يلبس شماغه:صباح الخير
الكل:صباح النور
ام سعد:لاحول كم مره اقول لحد يركض بالدرج طيب لو تكسرتوا لاسمح الله
سعد:معليش يمه كنت مستعجل ؛وسلم عليهم ومشى بيطلع
ابو سعد:على وين افطر اول
سعد :بفطر بالطريق تأخرت
ابو سعد:بحفظ الله
رحاب :يووه اشتقت لـ الجوهره
مشاعل:لاتقلبين المواجع راضيه تخرب نومتي عشان تسألني وين أقلامها بس ترجع
الكل :هههههههههههههههههههههههههههه
ابو سعد:الله يوفقها كلها كم يوم ويجون إن شاء الله
ام سعد:كلمت ذيب؟
ابو سعد:لا ماودي اخرب عليهم سفرتهم خليهم ينبسطون ويستانسون
رحاب:أنا استأذنكم السواق ينتظرني برا ؛
وباست راس امها وأبوها وطلعت

<في بيت ابو مشعل >
ابو مشعل كان جالس بالصاله ورفع صوته:ام مشعل صحيتي العيال؟
ام مشعل من المطبخ:اييه
ابو مشعل:وينهم اجل محد جاء للحين
ام مشعل:الله يهديهم لازم اصحيهم مية مره بدق عليهم لحظه ودقت على مها
مها:هلا يمه
ام مشعل:صحي اخوانتس وتعالوا يالله وراكم طولتوا مانزلتوا
مها:يالله ثواني البس واجي؛وقفلت الخط وراحت بدلت ملابسها ولبست لبس الدوام وطلعت لغرفة اخوانها
مها:يالله قوموا ماوراكم دوامات انتم
طلال وهو يعدل بطانيته :هممم ماعندي قفلي الباب وروحي
مها:على الاقل افطر ثم ارجع نام وانتم يا موتى ورا ماتقومون؟
طارق جلس:كم الساعه؟
مها وهي تناظر لساعتها:8 إلا
طارق:افففف
مها وهي ترمي قارورة مويه على مشعل:قم! ياثقل نومك لايكون ميت ذا
طارق بضحك:لو تقوم حرب ماقام
مها:شكله مالها إلا الهنوف مرأة المهمات الصعبه
مشعل من تحت البطانيه:إلا هي خلاص 5 دقايق وبنزل
مها:هههههههههههههههههههههههههههه ماهي بسيطه الهنوف يالله معكم 5 دقايق ياويلكم ماتنزلون؛وطلعت
طارق:مشعل خايف من الهنوف ما اصدق
مشعل قام واتجه لدرجه ياخذ علاقة ملابس وشافه طارق وقام ينحاش ورفس طلال وطلعوا ثنينهم يركضون
مشعل ضحك عليهم ولبس بدلته العسكريه ونزل
مشعل:السلام عليكم
الكل:وعليكم السلام
سلم على امه وابوه وجلس:كيف أصبحتوا
الكل:بخير
مشعل:وينهم السرابيت
مها ضحكت وهي تتذكر اشكالهم :هههههههههه وش مسوي لهم؟
مشعل:ما سويت شي ههههههههههه
طلعوا طلال وطارق ورا بعض من المجلس وجلسوا يفطرون
مشعل ناظر لهم:طارق!
طارق فز:سم
ام مشعل:بسم الله عليك وش بلاك
طارق:أنا بوجهتس يمه من مشعل
ام مشعل ضحكت:هههههههههه وش مسوي لهم اعترف
مشعل:هم يدرون
طلال:ماسويت شي قسم بالله! طارق رفسني وركض وقمت اركض معه مدري وين اروح
طارق:ههههههههههه
مشعل ضحك:ههههههه أنا بمشي تأخرت؛وسلم عليهم طلع لدوامه
الهنوف نزلت:صباح الخير طارق مالبست للحين!
الكل :صباح النور
طارق :اخوتس طير عقلي افطري ببدل واجي القاتس جاهزه ؛وقام يبدل وياخذ اغراضه ولحقه طلال:طارق
طارق وهو يعدل شماغه:هلا
طلال:تو ارسلي ذيب
طارق باستغراب:طيب؟
طلال:شف ؛ووراه الرسايل
ذيب:طلال أنا بورطه وماقلت لاحد إلا انت ابيك تساعدني وتكفى عمي مازن لايدري الجوهره ضاعت دورت عليها بكل مكان مو موجودة حتى بلغت السفارة مدري وش أسوي تكفى يا طلال ساعدني
طارق بعصبيه :ذا مب صاحي قسم بالله فوق ما انه مأخذها ومشعل يبيها تاركها برا وجاي الرخمه!! بيجنني ذا ؛وطلع بسرعه ولحقه طلال وبيده ثوبه وركبوا السياره
طلال:وين رايحين الحين؟!
طارق:لازم اقول لمشعل يمسك المهمه
طلال:وليه مشعل بالذات؟
طارق بحده:لان هذا الحل الوحيد اللي ممكن انه يخلي مشعل ياخذها
طلال لبس ثوبه:يعني افهم من كلامك انه مشعل كان يبيها؟
طارق:وللان يبيها بعد ان شاء الله بياخذها طرق ؛ وانزلوا لـ المركز من وصلوا واتجهوا لمكتب مشعل
مشعل:وش جابكم هنا؟
طارق:مشعل أنا وعدتك وجيت أوفي بوعدي
مشعل :وش قصدك؟
طلال فتح جواله يوريه المحادثة وطاحت عيون مشعل على آخر كلمة(ووعد أول ما نرجع لطلقها وياخذها مشعل)
مشعل:الله ياخذه الحقير ماهو كفو لـ الجوهره اصلاً ؛وطلع للمكتب الثاني
عيسى دق التحيه لمشعل:سم طال عمرك
مشعل:استرح وصلت قضيه من السفاره الالمانيه؟
عيسى وهو يدور بالملفات:حصلته هذا هو ؛ومده لمشعل؛عن اختفاء بنت واللي مبلغ زوجها
مشعل:يعطيك العافيه؛وطلع لمكتبه
طلال:ترا حجزت التذاكر ولحظنا الرحله اليوم العصر
مشعل:كويس أنا بشوف الملف وانتم روحوا لدواماتكم ونتقابل الظهر ان شاء الله بس لاتقولون لاحد عن السالفه
طارق:ابشر ؛وأخذ طلال معه وطلعوا
طلال:ليش أنا آخر من يعلم ليش محد قالي انه يبيها !
طارق:على أساس بتفرق الحين يعني
طلال:والله يا انه طاح من عيني
طارق:انتبه احد يدري خصوصاً الهنوف ياويلك
طلال:ورع لاتهدد ماراح اقولها
طارق:ناد الهنوف تأخرنا
طلال:طيب؛ونزل دخل البيت؛الهنوف!
الهنوف وهي نازله تركض:بدري وين رحتوا؟
طلال:اطلعي بسرعه طارق ينتظرتس تأخرتوا
الهنوف:تخيل الكلب ذيب رجع وتارك الجوهره برا ما كأنه شهر عسل تاركها لحالها !
طلال:شلون ؟ من قالتس
الهنوف:باقي ماسمعت شي خلني ارجع من الجامعه بس واقولك كل شي ؛وطلعت
طلال ركض ودخل غرفته فتح جواله وكلم ذيب
ذيب:ارحب طلال فتحت الرساله ومارديت علي عسى ماشر
طلال:رجعت وتركت زوجتك يالخبيث!
ذيب:هيييه احترم نفسك ما اسمح لك
طلال:صدق انك ماتستحي على وجهك مافيك ذرة حميّا ؛وقفل الخط وطلع شنطه صغيره وحط فيها كم لبس لهم وجهازه
<الساعه 10:30AM عند الجوهره>
قامت بسبب ان فيه احد يصحيها
يزيد:هذا الأكل بنادي احد يساعدك تأكلين؛وطلع ودخلت جمانه
الجوهره ناظرتها:شكلتس مب غريب علي
لفت جمانه لها وعرفت انها الجوهره:لا ما أعرفتس يمكن مشبهه علي
الجوهره :يمكن بس وش اسمتس؟
جمانه بربكه:جمان
الجوهره:اوه لا ما اعرف احد بذا الاسم معليش
جمانه:افتحي فمك؛وبدت توكلها وقبل تطلع عطت الجوهره جوالها
جمانه:اسمعي خبيه لما اشوف الوضع كويس قلتلتس بس لاحد يدري ولاحتى أنا بروح فيها
الجوهره:الله يسعدتس يعطيتس العافيه
جمانه:مب وقته الحين؛وطلعت
يزيد:أكلتيها؟
جمانه بتوتر:ايه
يزيد :وين الصينيه ما اشوفها؟!
جمانه:يوه نسيتها الحين أجيبها ؛ورجعت بتدخل لكن أوقفها يزيد وهو يقول:روحي أنا بجيبها ؛ودخل
-انتهى🦋✨-