جيتي مثل الغيث والدنيا صحوه

Part 67

<في بيت مشعل>
الجوهرة:سهم يالله قوم عشان تروح المدرسة وماتتأخر
سهم:بغيب يمه
الجوهرة:لازم تداوم عندك اختبار يالله ولا بتأخر معك أنا الحين
مشعل دخل:ماصحى للحين سهم ، قم بسرعه معك 5 دقايق تجهز فيها
قام سهم بسرعه وهو يجهز وطلع مشعل من جاه اتصال
الجوهرة وهي تطالع سهم:الله يهديك يعني لازم ابوك يعصب عشان تصحى؟؛وقامت تلبس عشان تداوم هي بعد وطلعوا بعد ماجهزوا وافطروا
-في السياره-
مشعل والجوال على أذنه :على خير بكلمهم على العصر ان شاء الله واردلك؛وقفل الخط وودا كل واحد لدوامه ورجع توجه لدوامه
الوليد:ارحب يابو سهم
تقدم مشعل يسلم عليه:البقى شلونك
الوليد:الحمدلله انت شلونك
مشعل:نحمدالله هات علمك ، وراك شيء واضح من وجهك
ضحك الوليد:والله مدري وش اقولك لكن ودي أتزوج من يمكم
مشعل رفع حاجبينه بفرح:وهذي الساعه المبروكه ولنا الشرف في رجالٍ مثلك وشرواك
الوليد ابتسم:شرواك الطيب
لف مشعل وهو يشوف حمدان جايهم:يالله صباح خير؛ودقوا له تحيه
حمدان وهو هادي ومروق وحاط يدينه ورا ظهره:سواليف على هالصبح ؟ كل واحد على مكتبه يالله؛وراح
طالعوا بعض مشعل والوليد بعد ماراح وهم اول مره يشوفونه رايق من يوم عرفوه وضحكوا ومشوا
مشعل:رايق اليوم
الوليد:وراه علم لكن وشهو الله اعلم؛ودخلوا لمكتبهم وابتدوا يشتغلون
~~~~~~  •  •  •  •  •  ~~~~~~
<في بيت ابو حمدان>
ام حمدان:اقول ابو حمدان
ابو حمدان وهو يطالع الجريدة:وش
ام حمدان:حمدان وده يكمل نص دينه ويبيك تخطب له بنت اخوك مشاعل
ابو حمدان وهو رافع حاجبه:ما قاللي شيء
ام حمدان:ايه قالي كلميهم واذا وافقت نروح ونخطبها رسمي وانا كلمتهم ووافقوا
ابو حمدان:خليه يجي هو الحين ويصير خير
قامت ام حمدان:اجل بروح اجهز الغداء؛وراحت للمطبخ على دخلت ساره
ساره:السلام عليكم
ابو حمدان:وعليكم السلام وينه اخوتس
دخل حمدان:السلام عليكم يبه
ابو حمدان:وعليكم السلام تعال ابيك
تقدم حمدان وجلس مقابل لابوه ووقفت ساره قريب منهم ومتكيه يدها على طرف الكنب اللي جالس فيه حمدان وأبوهم يطالعه:سمّ
طالعها ابو حمدان:وش عندتس انتي اسمتس حمدان؟
ساره وهي تطالع حمدان:لا
ابو حمدان:اجل روحي؛وراحت ساره ولف حمدان على ابوه:وش فيه يبه
ابو حمدان وهو يطالعه:امك قالتلي انك تبي مشاعل بنت عمك
حمدان:ايه والله ودي اكمل نص ديني والبنت مالها إلا ولد عمها
ابو حمدان:اجل خير ان شاء الله نروح لهم العصر ونكلمهم ونخطبها رسمي
قام حمدان وحب رأسه ابوه:الله يطول عمرك يبه؛وطلع يبدل
-العصر بالمجلس-
ابو سعد:مبروك ياحمدان وماحنا بلاقين أطيب منك
حمدان:جعل عمرك طويل ياعمي؛وقام يسلم عليه
دخل مشعل ووراه الوليد:السلام عليكم
الكل:وعليكم السلام؛وسلم عليهم الوليد وجلس وقام طلال يصب القهوه
مشعل كان واقف وهو يطالع الوليد وبدل نظره للي بالمجلس:الوليد جايكم اليوم بمطلوب
ابو مشعل وهو دايم يرد أولهم بما انه اكبر اخوانه:يبشر الوليد؛ولف على الوليد وأردف؛اعتبره تم
مشعل وهو يطالع في الوليد:هو رجال والنعم فيه وشرواكم جميع والعلم عنده وسلامتكم؛وجلس
طالعه الوليد بورطه ورجع يطالع للموجودين وثبت نظره على ابو مشعل بما انه اول من تكلم وتمم:والله اني ماجيتكم إلا كم مره وماعديتوني إلا واحدٍ من عيالكم واني جاي اليوم محبتن فيكم وفي الرجال ذا(واشر على مشعل)
مشعل:ماعليك زود
الوليد:واني طامعن في نسبكم وودي بالقرب منكم
عازم كان ماسك أعصابه ويطالع لابو مشعل من تكلم:والنعم فيك يا الوليد لكن...
مشعل:ولا أقاطعك يبه بس جوهرة ذا نصيبها وجاها
زفر عازم براحه وهو يحلف ماتروح منه من نطق ابو حلا وهو يطالع لابو مشعل ومشعل:دامكم اثنيتوا على الرجال اجل تم وجاتك يا الوليد
الوليد:الله يسلمك وهذا من طيبك ياعم
جلس طلال جنب مشعل وهمس:وش ذا اليوم كله خطاطيب
مشعل عقد حاجبينه بعدم فهم وهو يطالع طلال اللي اكمل:توه عمي جاي يخطب لحمدان والحين انت تخطب للوليد؛وضحك
مسك مشعل ذراعه وهو يقومه يطلع قدامه:ماخطبت له هو تكلم بلسانه؛وطلعوا
ضحك مشعل وهو يطالع لطلال بصدمه:بذمتك ياطلال صادق انت؟
طلال بضحكه:والله؛وجاهم الوليد
الوليد:وش بلاك انت
مشعل طالع طلال ورجع يضحك
الوليد لف على شباك المجلس يطالع انعكاسه وهو يعدل مرزامه ورجع يطالع طلال:عيال وش فيه شكلي غلط؟
طلال:هو مب شكلك توقيتك الغلط؛وعلمه السالفه
الوليد:والله اني داري مايجي من حمدان شيءً زين
مشعل:في هذي صدقت؛ورجعوا يدخلون المجلس
~~~~~~  •  •  •  •  •  ~~~~~~
<في لندن>
ومن حسن حظهم حصلوا دكتوره من احد الجنسيات العربيه
طارق:ها يادكتوره وش صاير
الدكتوره:مبروك مراتك حامل
رحاب طالعة الدكتورة بصدمه:وش يادكتورة اكيد فيه غلط
الدكتورة:لا مافيه غلط انتي حامل فعلاً عمره شهر
رحاب وهي تجلس وتطالع الدكتوره بخوف:قولي والله يادكتورة
طارق لف للدكتوره:ماعليتس منها يا دكتوره بس هي لها اسبوع كارهتني مدري وش فيها وش السبب لاني بديت اشك بنفسي الصراحه
ضحكت الدكتوره:طبيعي هذي حالات الوحام تحملها كم شهر كذا
رحاب:تمزحين يا دكتوره!
الدكتوره:والله امزح ليه عموماً مبروك لكم وانتبه لها كويس وابعدي عن الجهد الزايد وتولدي بالسلامه
طارق:بس ماعرفنا وش بنت ولا ولد
الدكتوره:مايوضح الحين يمكن بالشهر الرابع تعرفوا
طارق:يعطيتس العافيه يادكتوره؛ومسك رحاب وهو يساعدها وطلعوا
-بممر المستشفى-
رحاب وهي تطالع لطارق وودها تصيح ومب مصدقه:احسها تمزح
طارق:حتى أنا ولا ذا وجه اباء؟
رحاب:مشتهيه ايس كريم
طارق:في ذا البرد؟ وش ذا الوحام الغريب الناس تتوحم على عسل ولا ليمون وانتي ذبحتيني بالآيس كريم
رحاب:أنا الحامل ولا انت؟
طارق:انتي
رحاب:اجل جيب ايس كريم لان أنا اللي باكله مب انت
طارق وهو يمد لها بطاقته:خذي جيبي لنفستس تعبتيني
~~~~~~  •  •  •  •  •  ~~~~~~
<بالمجلس>
ابو حمدان:اقول يا ولدي يا الوليد دامنا بنسوي عرس حمدان وطايل بيوم واحد ورا ماتحط عرسك معهم ونفرح فيكم مره وحده
الوليد:والله اللي تشوفونه إذا هم راضين تم
ابو حمدان:اجل الله يتمم لكم وحددناه بعد ٦ شهور ان شاء الله
الوليد:على خير
وابتدوا يجهزون لملكة حمدان والوليد اللي كانت بيوم واحد برضى الجميع واللي بيكون في نفس اليوم اللي بيرجعون فيه طارق ورحاب وطبعاً بعدها مها ولدت وجابت تؤام بنت وولد وسمتهم عهد وخالد وصارت فرحتهم فرحتين
~~~~~~  •  •  •  •  •  ~~~~~~
<في بيت ابو سعد>
كانوا الكل موجودين بالصاله ومها معهم هي وتؤامها ويسولفون
دخلت رحاب وحطت شنطتها عند الباب ودخلت تسلم عليهم بابتسامه:السلام عليكم
ام سعد:رحاب
ابو سعد وهو يضم رحاب:هلا بآخر العنقود هلا بالسكر المعقود
رحاب وهي تضحك:المهلي يبقى
طارق من عند الباب:سلام عليكم شلونكم ياعمي
ابو سعد وهو رايح للباب:هلا وعليكم السلام نحمدالله تفضل المجلس ياولدي
طارق:بس لو تشوف لي الطريق ياعم بسلم على مها
ابو سعد وهو يطالع لمشاعل:طريق بيدخل يسلم؛وقامت مشاعل دخلت المطبخ ودخل طارق يسلم على مها وتؤامها
طارق:شلونتس
مها وهي مبتسمه:نحمدالله انت شلونك
طارق وهو مبتسم ويطالع للتؤام وكانت عهد بحضنه:بخير
مها سكتت وهي مبتسمه وتطالع لطارق ورحاب وهم كل واحد يحلف اللي يقول يشبهون سعد واللي يقول يشبهون مها ويضحكون دخل طارق يده لجيبه وطلع بوكه وهو يعطي كل واحد من التؤام فلوس
مها:كثر الله خيرك خيرك سابق وانا أختك
طارق وهو شايل خالد بحضنه:خير الله مهب خيري؛ونزل خالد بسريره وقام بيطلع
ام سعد:اجلس تقهوى معنا وترا الغداء زاهب
طارق:بالعافيه عليكم بمر على اهلي وبعدها بروح للعيال أعاونهم
ام سعد:بحفظ الرحمن
طلعت مشاعل من المطبخ بعد ماطلع طارق وجلست عندهم:اخيراً جيتي قوليلي كيف السفرّه؟ انبسطتي
رحاب:تجنن وحكتلهم
ام سعد بفرح:مبروك يابنيتي الله يتمم ولادتس على خير الحمدلله ياربي
رحاب وهي تضحك:الله يبارك فيتس
مشاعل:وزينهم الأحفاد ياقليبي بس
مها:الف مبروك ياقلبي الله يتمم حملتس على خير
رحاب:اللهم امين؛وتقدمت للتؤام وهي تطالعهم ومبتسمه بإنكسار كانت فرحانه انها حامل ولكن شعور الخوف غلب عليها كانت خايفه من المسؤولية اللي بتكبر وخايفه ان طارق يتغير عليها واخذتها الهواجيس ولا حست إلا على صوت امها وهي تناديها للغداء
<في بيت ابو مشعل>
دخل طارق وماحصل احد بالصاله:سلام عليكم
طلال وهو نازل:وعليكم السلام ارحب؛وحضنه
طارق:شلونك وين الناس مابه احد بالبيت
طلال:نحمد الله انت شلونك
طارق:الحمدلله بخير وينها امي والهنوف
طلال:فوق قاعدين يرتبون غرفة الضيوف
طارق:من ضيوفكم
طلال وهو يضحك:انت
طارق وهو يصعد:مساء الخير ياوجيه الخير
ام مشعل:طارق؛ولفت عليه وهي تحضنه؛هلا مساء النور والسرور اجلس تحت بخلص أنا والهنوف ونجيك
طارق:افا والله ان تتركين اللي بيدتس وتجين معي الغرفة مب طايره لاحقين نرتبها وبعدين حنا وش حضرتنا يوم ترتبين لنا شوي تجي ونتعاون
ام مشعل:ياولدي الله يهداك وش هالكلام خلصت باقي خفايف أخلصهم واجيك وبعدين مرتك حامل تعب عليها
الهنوف وهي تطل عليهم:تكفى احلف عليها من الصباح وحنا ننظف ونرتب وللحين ما خلصنا حتى أنها تبي تغير كل شيء بالغرفه الدرج والسرير
طارق وهو يطالع امه:ياحبتس للشقى يا يمه تعالي معي بس الله يطول عمرتس
طالعت ام مشعل الهنوف بحده وطلعت مع طارق ولحقتهم الهنوف وهي تحضن طارق وتضحك
طارق وهو يضحك من ضحكها ولا هو فاهم:وش بلاتس استخفيتي
الهنوف:فاتك والله يا انها عطتني نظره
طارق طالع امه من نطقت:بنت! لاتسذبين وقومي صبي قهوه لاخوتس
ضحك طارق وجلسوا واخذ الفنجان من مدته له الهنوف وابتدوا يسولفون
~~~~~~ • • • • • ~~~~~~
-بالليل تحديداً بالمجلس-
كانوا العيال متسدحين بالمجلس بعد ماخلصت حفلتهم ومازالوا حمدان والوليد موجودين
الوليد قام:ماقصرتوا ياعيال الله يعطيكم العافيه
مشعل:ماسوينا شيء بعدين تو الناس وين رايح
الوليد وهو مبتسم:ايه ماوراك دوام وتحسب الناس نفسك
مشعل ضحك:ياخي اسحب عليهم كلها يوم وانت عريس بيعذرونك ؛وطالع لحمدان وأكمل؛ولا يا حمدان
كان حمدان لاهي بجواله ولارد
مشعل رفع صوته وهو يناديه ورمى عليه علبة مويه عشان يحس:حمداننن
حمدان وهو يشيل المويه اللي ماكانت مسكره وانكبت على ثوبه:هاه ياورع
ضحكوا مشعل والوليد وتكلم مشعل:كنا نقول انا والوليد انه نبي نسحب على الدوام بكره حضرنا انت بمناسبة انك انت واياه معرسين
حمدان وهو يطالعهم:اقول من الفجر وانت وإياه محضرين ولا الميدان يحتريكم؛ورجع نظره لجواله
قام مشعل وهو مبتسم بخبث بدون مايحس فيه حمدان وضحك الوليد من حس انه وراه شيء وشافه متجه لحمدان ومسك مشعل ذراع حمدان وهو يكتفه والوليد يطالعه
حمدان:يا ورع وش بلاك انهبلت انت
مشعل:قلنالك بالطيب ومانفع تبي تعفينا من دوام بكره ولا..؛وسكت مشعل من شاف الوليد جاهم وهو عاصب رأسه ومعه جركل مويه وضحك مشعل بانتصار
الوليد:ياولد اعجل ولا كبيته
حمدان:خلاص معفيين بس اتركوني قسم بالله انكم وراعين
مشعل:هيييه من الوراعين
حمدان:أنا بس فكني
قام مشعل عنه وراح بيطلع ولحقه حمدان وهو يكتفه:بدري عليك ياولد خالد
مشعل وهو يضحك باستفزاز:شطارتك بالغدره ياولد العم
قام الوليد وهو يفك حمدان عن مشعل ودفه حمدان وطاح الوليد على يده وهو يصارخ بألم:الله يقلعك ياحمدان استغفرالله
طلال وهو يضحك:وش بلاكم اعرستوا وانهبلتوا حلاله يالشايب لو انه موجود
مشعل قام بسرعه وهو يتجه للوليد اللي كان وجهه احمر من الغضب والألم وركض حمدان وهو يشوف الوليد وقاموا كلهم وراحوا يمه
مشعل:توجعك مره؟
الوليد:شوي
حمدان بخوف:اوديك المستشفى ؟بجيب سيارتي واجي ؛وطلع
الوليد وهو يضحك بألم:ياخي ذا غبي
ضحك مشعل وهو يساعد الوليد يقوم:من زمان وحنا غاسلين يدنا منه ذراعك توجعك اخاف كسر
الوليد:لا ماعليك رضه خفيفه يومين وتروح؛وأكمل من سمع حمدان يطنب؛ياخي احد يروح يناديه لا يزعج الشيبان
طلع طلال بسرعه وهو ينادي حمدان ويأشرله بيده:الرجال مابه شيء تعال أزعجت العالم كلها يامصروع؛ودخلوا هو وحمدان
طايل قام:تصبحون على خير أنا رايح
الكل:تلاقي خير،وانت من أهله ؛وشويات وراحوا ينامون هم بعد
<في بيت مشعل>
الجوهرة وهي تدخل بعد مارقد سهم:باليالله نام تعبني
مشعل وهو مشغول بالأوراق:ايه لانتس مغيبته اليوم وصحى متأخر اكيد بيبطي مانام
الجوهرة:اف يا مشعل ترا كان تعبان عشان كذا غيبته وش بلاك انت الله يهديك
مشعل وهو يشيل الاوراق بالملف وقام:طفي النور بنام وراي طلعه الصبح مع العيال
الجوهرة طالعته ورجعت للسرير تنام:طفه انت دامك واقف
طالعها مشعل وضحك بخفه ورفع الملف بالدرج وطفى النور ورجع للسرير ينام
~~~~~~  •  •  •  •  •  ~~~~~~
-في صباح يومٍ جديد-
مشعل:طايل رح شد الحبل من الجهه الثانيه
طارق:طايل تعال عاوني
طايل:خلاااص عاد كل واحد يناديني من عنده تراني كائن بشري زيي زيكم
مشعل:اخلص ياولد
راح طايل وهو يشد الحبل مثل ماقاله مشعل ورجع يركب مع حمدان:حرك
حمدان:شلت كل شيء؟
طايل:اييه ياولد حرك قبل ينادوني الحين ؛وحركوا للعزبه
مشعل وهو يجتمع مع بقية العيال:وينه طايل؟
طلال:مدري
مشعل:تعال اجل ساعدني انت بناخذ الخيام بنقعد كم يوم بالعزبه وطارق ياخذ الحريم معه وسعد قالي بيجيب الشيبان ويلحقنا
طلال:زين؛وراحوا هو ومشعل يشيلون الخيام عشان يسوونها قبل يوصلون الشيبان والباقين
-في العزبه-
خلصوا من تجهيز الخيام واتجهوا للسيارة ينزلون الفرشات وحطوا بعضها بالخيام ونصها الثاني فرشوها برا لجلستهم بالليل
مشعل وهو يشوف ذيب يسب في سهم وهو داخل:ذيب والله لو ماتجهد مايحصلك طيب!
ذيب وهو ماسك حمد:شف سوات ولدك ربّه زين ولا خلني أربّيه
حمد وهو يطالع لابوه:بس يبه حنا كنا نلعب ونمزح مع بعض
ذيب:اقول اسكت بس دافنك بالتراب وانت تدافع عنه
مشعل طالع لحمد:خلاص اطلع العب انت بتفاهم أنا وأبوك
طايل:قولوا لا اله إلا الله السالفه بسيطه لا تكبرونها
سهم كان واقف عند فتحة بيت الشعر ويطالعهم ورجع بخوف من طالعه ذيب
ذيب وهو رافع صوته:تعال
مشعل بحده وغضب:ذيب! أقصر صوتك وإذا بتتكلم تكلم معي أنا
سعد دخل وهو يتنحنح عشان يفهمون انهم وصلوا:اذكروا الله يارجال طالعين ننبسط لا تنكدون علينا بسبت أطفال كانوا يلعبون
طلال:حمد سهم تعالوا معي؛وأخذهم وطلعوا
تقدم مشعل لذيب:سهم ان شفتك جايه لا تلوم إلا نفسك مشاكلنا ماتدخل عيالنا فيها فهمت ولا أعيد !
ذيب بحده:ولدك لا يلعب مع ولدي
مشعل وهو يطالع سهم وحمد وهم يلعبون مع طلال وهم يضحكون مع بعض ابتسم بإستهزاء:شكله لقى له عرب احسن من عربه
طالع ذيب لحمد وناداه بغضب:حمد مشينا رح نادٍ على امك؛وطلع لسيارته
ضحك مشعل ورجع يجلس واخذ دلة القهوة يتقهوى
دخل ابو مشعل:السلام عليكم ؛وبعده ابو سعد والباقين
الكل: وعليكم السلام والرحمه
‏أبو مشعل وهو يطالع لسيارة ذيب من مشت: علامة ذيب وراه مشى
طارق:يقول ان أهله تعبانين
ابو مشعل:اييه مايشوف شر
سعد طالع لمشعل وهز رأسه باسئ منه واخذ الدله وهو يقهويهم
سهم وهو تو يدخل:السلام عليكم؛وتقدم يحب راس جده
ابو مشعل وهو يطالعه:هلا وعليكم السلام علامك ياسهم خاطرك كنه ضايق
سهم وهو يجلس جنب جده:والله ياجدي مدري وش فيه عمي ذيب فجأة وحنا نلعب نادى حمد واخذ مرته وراحوا مافيه احد أتونس معه خالد وعهد باقي صغار
ابو مشعل ابتسم:تبيني العب معك قمت ولعبت
ضحك سهم وقام اخذ الدله من يد سعد يصبها لجده
<عند البنات>
مشاعل:هو علامه اخذ مرته وراح
الهنوف وهي تشعل النار:هو متى جلس في العزبه اصلاً
مشاعل:في ذي صدقتي
جوهرة:ياخي غريب غير عن عيال عمنا كلهم
لميس:من بعد ما اعرس على هالقشرى وهو متغير حتى نفسيته شاينه
ميس وهي تطق رجل لميس عشان تسكت:امي جت لا تسمعتس
ام ذيب:خلصت القهوه يابنات
جوهرة:شوي ياعمه وتجهز
ام ذيب:زين بس اعجلوا ابطيتوا ؛وراحت للخيمه الثانيه
رحاب وهي توها تدخل عليهم:وين سهم ماجاكم؟
الهنوف:لا وش بغيتي
رحاب:لا بس كنت ابيه يجيب شوزي تعبت من الكعب
الجوهرة:وش الله حادتس تلبسينه بالبر خبله انتي؟
رحاب:يقالكم شهر عسل وبتكشخ الشنطه كلها كعوب
ضحكوا عليها البنات واخذت اقرب علبه ورمتها عليهم وطلعت وهي تشوف سهم يركض ودخل عند البنات ورجعتلهم
سهم وهو حاط يدينه على ركبه ويتنفس بسرعه من الركض مد الدله عليهم:جددوا القهوة ولا عاد تطلعون جيران جدي اللي حولنا هنا جايين
رحاب اخذت الدله منه:هلا بقليبي سهومي هلا بحبيب خالتو
سهم:وش عندتس اخلصي المحبه مهيب لله
ضحكت رحاب وهي تطق كتفه بخفه:رح ازرف اطرف شوز وجبه
سهم طالعها وضحك
رحاب:ما امزح يالله بسرعه
سهم:كلهم زبيريات
رحاب:اجدد زبيري جبه
سهم راح وهو يطالع لا احد يشوفه واخذ اقرب زبيريه ورجع فيها ركض ورماها لرحاب:لو احد نشدني عنها بقول رحاب قالتلي
رحاب:انت اسكت ومحد داري معليك
-انتهى✨