الوليد:مشعل وش فيك؟
مشعل:أنا مشغول شوي وأبيك تروح للقسم هناك و تحقق مع واحد اسمه عبدالله والشباب بيساعدونك
الوليد:ماطلبت شي الان اروح تأمر توصي
مشعل:ابد سلامتك؛وقفل الخط
—————•—————•—————•—————
<في بيت أبو سعد>
~~على طاولة الطعام~~
رحاب وهي تلم السفره:يمه أنا بروح لبيت عمي ابو مشعل طفشت بالبيت
ام سعد:خليها العصر نأخذ قهوتنا معنا ونروح لهم مره وحده
رحاب وهي تطالع لساعتها:مابقي شي على العصر بجهز القهوه إلى ما يأذن
ام سعد:زين
مشاعل:وش تقولون
الجوهره:ابد بنروح لبيت عمي ابو مشعل لأن الرجال كلهم بيتعشون بالعزبه يعني بنأخذ راحتنا
مشاعل:قولي والله
نزل سعد:أحد شاف فراشي حق الطلعات؟
رحاب:ههههههههههههههههههههه من متى للطلعات فراش؟ بتطلع تستأنس انت ولا ترقد
سعد:ههه يا غبيه ماتضحكين قصدي حق الكشتات
ام سعد:مب في غرفتك؟
سعد:لا دورته ماحصلته
ام سعد:يمكن بالعزبه طيب
سعد وهو متجه للباب:يمكن والله
ام سعد:تعال خذ فروته احتياط
سعد رجع:اي والله انك صادقه؛
وصعد فوق بسرعه
ام سعد:الله بلاني بولد لازم اعلمه وش ياخذ ووش يسوي
الكل:هههههههههههههههههههههههههههه
سعد وهو يصرخ من فوق:وين فروتي؟!
ام سعد:لاحول ولا قوة إلا بالله قومي يا رحاب دوريها وعطيه
رحاب وهي كاتمه ضحكتها:ابشري يمه؛وقامت راحت لسعد
رحاب:سعد مو منجدك شصاير لك هههههههههههههههههههههههههههه
سعد:وش أسوي فجأه قالو يالله بنطلع للعزبه وأبوي تمم ههههههههههههههه
رحاب:كم بتجلسون فيها؟
سعد:يمكن يوم بالكثير يومين
رحاب:أووه تعال ندور فروتك ؛ودخلت لغرفته
لحقها سعد:دورت بالدولاب ماحصلتها ودورت بالمخزن بعد
رحاب:هوو وين بتكون اختفت أكيد انك مادورت زين ؛وقعدت تدورها
سعد:يا بنت والله مب فيه أقولك دورت في كل مكان مهي موجوده
رحاب وهي تمسح على ظهرها:اخخخ يا ظهري تذكر معطيها احد انت ولا يمكن احد من اخوياك اخذها
سعد وهو يحاول يتذكر:ما اذكر عطيتها احد من اخوياي ؛وتقدم للشباك من سمع صوت ذيب ينادي عليه
ذيب:سعد أعجل علي ورانا مشاوير قبل نروح
سعد وهو تذكر لما عطاها مها تتغطى فيها عن ذيب ؛ورد:طيب اركب وانا جايك ؛ونزل بسرعه
رحاب وهي تركض وراه:تعال وين رايح خذ من فراوي ابوي طيب ؛سكتت من شافته طلع وما عبرها واكملت وهي تطالع لامها وخواتها؛بكيفه الغبي
مشاعل:تعالو ساعدوني نخلص القهوه يالله
رحاب والجوهره:طيب
<عند سعد>
وقف عند الباب الخلفي لبيت أبو مشعل وكان متلطم اتجه للمخزن اللي كان بركن الحوش وهو تاره يفتح الباب وتاره يناظر وراه لاحد يشوفه
سحب الباب من شاف القفل فتح ودخل وهو يدور على فروته لعلهم مغبينها فيه وضل يدور عليها إلى ان فقد الامل وطلع وصادف وحده طالعه من المطبخ
سعد:يابنت
كانت معطيته ظهرها وماسمعته
سعد:يا الهنوففف
الهنوف لفت بخرعه:بسم الله من انت؟
سعد:أنا سعد لاتخافين شلونتس
الهنوف:بخير انت شلونك
سعد:الحمدلله بخير
الهنوف:شعندك بالمخزن؟
سعد:معليش العذر والسموحه بس كنت ادور على فروتي قلت لعل وعسى أحصلها بالمخزن
الهنوف:ايه موجوده بجيبها لك الحين انتظر
سعد:طيب؛وفتح جواله يناظر فيه إلى ان تجيب فروته
الهنوف وهي تلقط انفاسها:سعد.د.د هذي هـ. هـي
طارق طلع وهو يضحك ووراه طلال
طارق وقف بتعجب:الهنوف شعندك هنا؛وطالع ليدها اللي ماسكه فيها الفروه؛حقت مين هذي؟
سعد من سمع صوت طارق تخبى ورا اقرب جدار له
الهنوف:ه.ه.هاه ه.هذي فروت ع.ع.عمي جابتها رحاب اغسلها ونسيتها عندنا قاعده انتظرها تجي تأخذها أنتم ليش مارحتو للحين؟
طارق:هذا حنا رايحين بس شفناتس هنا واستغربنا
الهنوف:مشعل مب رايح معكم؟
طارق:إلا بس يقاعد يلبس اعجلي وادخلي الجو بارد
الهنوف:إن شاء الله بحفظ الرحمن
راحوا طارق وطلال وطلع سعد
الهنوف:خذها وروح بغيت انكب
سعد:يعطيك العافيه
الهنوف:الله يعافيك؛ودخلت وسكرت الباب
مشى سعد لبيتهم بعد ما تأكد انه مافيه احد بالحوش وراح مع ذيب للعزبه
<بعد صلاة العصر>
رحاب:يالله يمه مشاعل الجوهره يالله بسرعه
مشاعل وهي تلبس شيلتها:يالله ازعجتينا جينا خلااص
رحاب اخذت القهوه واشرت لـ الجوهره:خذي الحلا وانتي يا مشاعلوه نادي امي والحقونا
مشاعل:طيييب؛وطالعتهم لين طلعوا ورجعت لامها؛يمه يالله مشينا البنات راحو
ام سعد:زييين يالله قروشتوني
وطلعوا لبيت ابو مشعل
<في العزبه>
بعد مانزلوا العيال الاغراض راحوا للإبل عشان يجيبون الحليب للشيبان
طارق:أنا بروح اسوي القهوه وانتم اعجلوا عشان نسوي العشاء أبيكم تساعدوني
مشعل:زين رح واخذ ذيب معك أنا وسعد نكفي
ذيب:جايك جايك ؛وراح لطارق ركض وهو عينه بجواله
والشيبان كانوا جالسين ببيت الشعر ويسولفون
ابو مشعل:طارق
طارق جاء لابوه:لبيه سم يبه
ابو مشعل:وينكم من اليوم وش تسوون تسعسعون مامنكم فايده وين القهوه؟
طارق:ان شاء الله دقايق وهي عندك ابشر على خشمي
ابو مشعل لف لأبو ذيب:رح وأعجل علي يالله
طارق طلع وشاف ذيب طايح وفز يساعده :ذيييب وش فيك وش جاك
ذيب:مافيني شي بس رجلي لفت كنت جاي امشي وماشفت حبل الخيمه ووطيته وطحت طاح طارق جمبه وهو ميت ضحك عليه وماسك بطنه
طارق:ههههههههههههههههههههههههه اخخخخخ ياحمارر حبل وش طوله ماتشوفه والله انك غبي امش امش خلنا نسوي القهوه؛وساعد ذيب يقوم وراحوا مع بعض وبدا طارق يسوي القهوه
<ببيت الشعر>
أبو سعد:اي والله الله يعين على أمور الدنيا اللي ماتخلص
أبو مشعل:اقول يا أبو سعد
أبو سعد:سم
أبو مشعل:ودنا بالقرب منكم ولدي طارق يبي رحاب على سنة الله ورسوله والبنت مالها غير ولد عمها ياخوك وحنا كبرنا محد دايم لاحد
أبو سعد:والله ان طارق ونعم الرجال ويبشر بالخير لكن يبيلنا يومين ناخذ رأي البنت ونردلكم
أبو مشعل:والله انك ونعم ياخوي على خير ان شاء الله
أبو سعد:أبو مشعل أقول وينه أبو حلا له كم يوم ماشفته لايكون ابه شي
<عند العيال>
ذيب وهو يصور:وهذا الشيخ طارق يسوي القهوه ارحب ياطارق
طارق وهو منسجم مع ذيب والتصوير:أبقه يالله ارحب يابو حمد ؛
وفز يمسك الدلة من شاف القهوة تفور وهو يردد بيت شِعر :
تسبدي اللي تشادي دلةٍ يوم فاحت
سج عنها المقهوي فوق جمرٍ تفوحي
ذيب وهو يصيح:ااااايه صح لسانك يابو خالد
طارق ضحك من تعزيزه:هههههههههههههههه صح بدنك ؛
واخذ الدله وطلع للشيبان
مشعل جاهم وطق كتف ذيب:وشبلاك تناهق انت !
ذيب وهو يوريه المقطع
مشعل:وينه طارق؟ صار ليده شي
ذيب:يالليل انت بعد مافيه إلا العافيه راح يقهوي الرياجيل
مشعل:امسك سخنه وعطهم يشربونه؛ومد له الحليب
ذيب:وانت وش شغلتك
مشعل:ذيب ترا ماني رايق لك بسوي العشاء ولا بتسويه انت؟
ذيب :لا سوه انت بسوي الحليب أنا خلاص
سعد:عيال طلال وينه؟
ذيب:سافر
سعد:متى؟
ذيب:الصبح
طايل:عيال من بيروح معي نجيب أغراض
ذيب:وش اغراضه؟
طايل:أغراض للعشاء مشروبات وخضار
ذيب:أنا ماني برايح شفلك احد
الوليد دخل عندهم:السلام عليكم
الكل :وعليكم السلام
مشعل:ارحب الله حيه شلونك بشرني عنك
الوليد:والله الحمدلله بخير يالله لك الحمد انتم شلونكم
الكل اختلفت ردودهم:الحمدلله بخير؛بخير ؛نحمد الله
الوليد:الله يجعله تبون مساعده شي
مشعل:رح اجلس نخلص حنا ونجيكم
الوليد:شباب اللي ماعنده شي يجي برا ابيه
طلع طايل ووراه ذيب
ذيب:وش العلم
الوليد:مافيه إلا كل شيٍ خير جايب أغراض وأبيكم تساعدوني
تقدم طايل وهو ينزل الاغراض ومعه ذيب والوليد ودخلوها داخل
مشعل:كثر الله خيرك والله ماكان له داعي تكلف على نفسك ياخوك
الوليد:لا كلافه ولا شي مابينا
-انتهى🦋✨-
لاتنسون تقيمون الرواية بـ⭐️🤎🤎
أنت تقرأ
جيتي مثل الغيث والدنيا صحوه
غموض / إثارة> رواية تجمع مابين أجواء الديرة والحب الشريف العفيف والأكشن تبتدي قصة الأبطال من طفولتهم وتجمعاتهم في صغرهم وكبرو وكبرت معهم مشاعرهم اللي كانت متبادله للبعض والبعض الآخر لا وتصادفهم مشاكل وصدف هل بتستمر مشاعرهم أم لا ؟ . . . هذا ما ستعرفونه من قرا...
