جيتي مثل الغيث والدنيا صحوه

Part 72

-بعد أسبوعين-
"عند رحاب"
كانت بغرفتها وشايله كل أغراضها بالشنط تقدمت من مكان غيث واخذته تغير ملابسه
مشاعل طقت الباب ودخلت على طول بدون ماتسمع الرد:ما شاء الله امداتس ماصدقتي على الله جمعتي أغراضتس وجهزتي
رحاب وهي تدور وابتسمت وهي تنطق:شرايتس بالله
مشاعل ابتسمت:الله يستر لايرجع للمستشفى مره ثاني بسبت الموت الأحمر
ضحكت رحاب وهي تشيل غيث بعد مالبسته ومرت من جنب مشاعل اللي كانت واقفه عند الباب وطقت كتفها:اعوذ بالله من فالتس جيبي شنطتي معتس وانتي نازله
مشاعل ضحكت ودخلت واخذت شنطة اليد حقت رحاب ونزلت
-بالصاله-
كانت رحاب لابسه عبايتها وشايله غيث ومشاعل وامها والجوهرة جالسين يطالعونها
دخل سعد:هاه جاهزه؟
رحاب وهي تأشر للدرج:هو أنا جاهزه بس فيه كم شنطة فوق نزلهم ولا عليك امر؛وابتسمت
سعد طالع لامه وخواته ورجع يطالعها:نمشيها هالمره عشان ولدتس ؛ومر بيصعد ومسك خد غيث اللي كان نايم وبدأ يصيح
رحاب بانزعاج:اشششش ،الله يسامحك توه نام
ام سعد بضيقه:الله يهديتس يا أمي كان جلستي تكملين نفاستس عندي وطارق يجي عند أهله ماهم مقصرين وتروحين له وتجين
رحاب وهي تتقدم تحب راس امها:بيتنا أريح لي وله ،استودعتس الله
نزل سعد وهو شايل الشنط:يالله عاد انتظرتس في السيارة
قاموا مشاعل والجوهرة يودعونها وطلعت وركبت السيارة وهي ضايقه صح انه بيجون يزورون طارق بالرياض بس لحظة الوداع بحد ذاتها مؤلمه
عهد وهي تأشر على فمها:بابا حلاوه ام ام
ضحكت مها ولفت على خالد:تبي حلاوه مثل عهد
خالد وهو يصفق ويضحك ويحرك راسه بـ أي:ام ام
سعد ضحك وهو يوقف عند المحطه:تبشرون ياعيالي؛ولف على مها؛وانتي وش تبين اجيبلتس
مها:جيب لي تشوكلت ؛ولفت ورا؛وانتي رحاب وش تبين ؟ ،رحابب؟
رحاب لفت عليهم:هلا،عادي اي شيء
مها وهي تطالع سعد اللي واقف عند الشباك ينتظرهم يقولون اللي يبونه:جيب تشوكلت وقهوة عشان نصحصح للطريق
سعد:زين؛وراح للبقاله
-في المستشفى-
صحى طارق وهو يطالع للمكان ولف لجهة الشباك وشاف مشعل واقف عنده وساهي ونطق بصوت خفيف:مشعل؛وجلس بتعب
مشعل لف عليه وتقدم منه وهو يمسك كفه:عيونه، تبي اجيب لك ماء؟
طارق اشر بيده بمعنى لا
مشعل:أنادي الدكتور؟ يوجعك شيء
طارق بهدوء وهو يطالع لمشعل:ابي اروح لها
مشعل زفر نفسه بهدوء:أبشر بس خل الدكتور يجي ونشوف وش يقول عنك
طارق بتعب:ابي اطلع لبيتي مابي اروح للديرة ويشوفني أبوي بهالحاله
مشعل:على خشمي بس خل نشوف الدكتور ونتطمن عليك بعدها نطلع إذا كتبلك خروج
دخل بسام ومعه الطاقم:سلام عليكم
مشعل وطارق:وعليكم السلام
بسام وهو يطالع للجهاز وابتسم:لا ما شاء الله وضعك ممتاز ،تحس بألم بتعب شيء؟
طارق:لا الحمدلله
بسام:قدامك العافيه،عموماً حنا بنكتب لك خروج اليوم بس ها ترا عندك مراجعات بعد اسبوع لازم تجي
طارق ابتسم:إن شاء الله،يعطيك العافية يا دكتور
بسام:استاذنكم بطلع خذوا راحتكم؛وطلع وطلعوا بعده الطاقم تبعه
مشعل وهو يطالع الدرج:ما اضن فيه شيء،ولا حاط فيه شيء من ورانا وتتدلع علينا
ضحك طارق وطالع الباب من طق
مشعل:تفضل
دخل سعد وبيده ورد:صبحهم بالخير
مشعل بابتسامه:صبحه بالنور
تقدم سعد وهو يسلم عليهم ووقف جنب طارق ونزل الورد ونطق بابتسامه:لا باس ماتشوف شر ،حصان اليوم ما شاء الله عليك
طارق ضحك بهدوء:الحمدلله،شلونك انت والأهل
سعد:ابشرك كلهم بخير ويسألون عنك
طارق:الله يجعله،عاد أنا قلت لمشعل بقعد ببيتي كم يوم لين أطيب وبعدها بطلع للديرة
سعد:لاحقين على الديرة ماهي طايره اهم شيء انت وصحتك
مشعل ضحك:ادخلي ادخلي
دخلت مها ومشت بسرعه وهي تحضن طارق وتحب راسه:الحمدلله على سلامتك ، خوفتنا عليك!
طارق ضحك:الله يسلمتس من كل شر ،انتي اللي خوفتيني بمداهمتس هذي،شلونتس شلون عيالتس
مها أبعدت عنه وهي مازالت تطالعه:بخير بخير نحمدالله كلنا بخير انت شلونك اليوم ماقالوا متى بيطلعونك
طارق:هذا أنا قدامتس بخير وعافيه نحمدالله ونشكره،قالوا بيطلعوني اليوم وبروح لبيتي ارتاح
مها:زيين الحمدلله ؛ولفت لسعد ورجعت تطالع اخوانها؛نستأذنكم حنا بنمشي ،تبوني أساعدكم بشيء؟
مشعل:يعطيتس العافيه مافيه شيء تساعدينا فيه،تراكتن عيالتس لحالهم وجايه؟
مها بخوف:في السيارة مع رحاب مب صايرلهم شيء ان شاء الله
طارق:رحاب؟ هي جت معكم؟
سعد بابتسامه هاديه:ايه عجزنا فيه تجلس ملّزمه تجي
مها:مع السلامه،قدامك العافيه وانا اختك؛وطلعت وطلع معها سعد
~~~~~~  •  •  •  •  •  ~~~~~~
-في بيت طارق-
كانت رحاب ترتب البيت ومها تساعدها وسعد طلع يجيب الأغراض اللي يحتاجونها
رحاب:مها تعالي شوفي مكان السرير وقوليلي يحتاج اغير مكانه ولا مكانه مناسب؟
مها وهي تطلع للصالة:تراه مب نفاس،حلو مكانه
رحاب ضحكت:امشي معي بس خلينا نشوف وش نسوي غير القهوة ؛ونطقت بسرعه وهي تاخذ جوالها؛بجيب كيكه شلون نسيت
مها:لاتطلبين قولي لسعد يجيبها وهو جاي
رحاب بتفكير:اسويها ولا اجيب جاهزه؟
مها وهي تفكر:جاهزه مابيمدينا نسوي قد هم بيوصلون
رحاب:تمم قلت لسعد يجيبها وهو جاي بطريقه
وطلعوا رحاب ومها من المطبخ وهم يشوفون خالد وعهد جالسين مع غيث ويتهاوشون
عهد وهي تأشر على نفسها:نونو حقي!
خالد:حقي ؛ولف على امها يبيها توقف بصفه؛ماما هذا حقي؟
مها ورحاب ضحكوا وهم يطالعون بعضهم
تقدمت رحاب وهي تشيل غيث:ياعزتيلك ياوليدي توزعت بين الأخوان ؛ولفت على خالد واردفت وهي تطالع مها ومبتسمه؛قول لبابا نبي نونو صغير
مها:رحاببب!
ضحكت رحاب من شافت خالد وعهد يركضون لامهم ويقولون لها نبي نونو:كفو عيال اخوي ايييه
مها وهي تعطيهم أكلهم:الله يسامحتس ابلشتيني معهم اثنين ولا قدرت عليهم تبين واحد زياده فكيني منتس تكفين
رحاب ضحكت:مها بالله شوفي القهوة نسيتها على النار
مها:ايه اضحكي لكن اوريتس؛وراحت للمطبخ
بعد عدة دقايق دخل سعد وبيده الاغراض:سلام عليكم،هذي كل الاغراض اللي طلبتيها قولي لزوجتس ترا الفواتير موجوده خليه يسددها
ضحكت رحاب:ماتقصر جعل عمرك طويل
سعد:ما امزح من جدي خليها يسددها وعشانتس فيه تقسيط
رحاب ضحكت:اف يا أنا طلعت عندي واسطات ماني بسيطه ما شاء الله علي
ضحك سعد وجلس من شاف عيالها يركضون له وهو فاتح يدينه لهم
رحاب وهي تشيل الكيك:كم يبيلهم ويوصلون
سعد:على وصول مابقي شيء،القهوة خلصت؟
رحاب:ايه بس بالله لاتروحون للمجلس خليكم بالصاله هنا أريح له
سعد:زين
مها من المطبخ:سعد،الغاز خلص بالله جيب غيره
ضحكت رحاب من فهمت انها منحرجه من كلامها لها وأنها تعذرت بالغاز اللي من يوم جابوه ما استخدموه
سعد:وش بلاتس تضحكين
رحاب بابتسامه:ولا شيء رح جب غاز؛وضحكت
سعد وقف وهو يطالعهم:والله مدري عنكم لكن وراكم شيء ولا تبون اعرفه الله يستر بس؛وطلع ورجع وهو يرحب
ركضت رحاب للغرفة ومها لحقتها:وش فيتس؟
رحاب وهي تحط غيث بسريره:وصلوا وصلوا
مها:طيب؟
رحاب:والمفاجأة؟
مها عضت شفتها بورطه:ماكان قصدي لكن زلّ سعد بالمستشفى وقال له انتس جيتي
رحاب بصدمه:بذمتس؟
مها:والله ؛واتجهت لباب الغرفة تفتحه من طق
طارق:مها؟ وش جايبتس هنا
مها:كنت اسأل رحاب عن مكان الاغراض في المطبخ؛وطلعت
دخل طارق وهو يسكر الباب ووقف وهو يطالعها ويتأملها كانت واقفه أمام المرايه وهي تعدل شعرها ولفت عليه من حست بنظراته لها وتقدمت له واردفت بابتسامتها اللي تأسره:الحمدلله على سلامتك يا ابو الغيث خطاك الشر
طارق وهو يتمعن فيها:خطاتس اللاش
رحاب ابتسمت بإحراج من هدوءه ونظراته لها:جهزت لك ملابسك بدل وانا بصحي غيث يشوف أبوه؛ولفت لسرير غيث
سحبها طارق من ذراعها لجهته بقوة تسببت بانتثار ريحة عطرها بأرجاء الغرفة وشعرها اللي انزاح على ظهره ونطق وهو يطالع عيونها:
ليلك نثر عطره على شاطي النيل
وانا ضواني ليل نجد وسريته
يامطوّل الغيبات يامطول الليل
توّي دريت انّه سواد وجفيته
أثر النجوم اكثر من الجدي وسهيل
نجمٍ كتب همّي..ونجمٍ محيته
ياصاحبي عطشان..عطشان لك حيل
مظمي وهمّال السهر ماقويته
رد السلام لمترفات المناديل
كحل العيون ودمعك اللي نسيته
الدرب ميت والخطاوي مقاتيل
وان لاح طيفك مت فيه وحييته
الله على الضحكه نهار المواصيل
هاك النهار اللي بعمري فديته
قبل اتقهوى من كسالا مظاليل
قبل السلام وقبل جاني وجيته
ضم الحشا واكسر جمود التفاصيل
ماعندي اغلى من خفوقٍ كويته
لمصافحك كف وقصيد وهلاهيل
اما زبنك القلب ولاّ خذيته
لويغري القمرا ذبول القناديل
بعت النهار لجيتك واشتريته
رحاب وهي تطالع عيونه:
خذ عيوني معك لانويت تغيب
مافي بعدك احد يستاهل اشوفه
تقدمت وهي تحضنه وتروي عطش روحه وشوقه لها :اشتقتلك واشتقت لحضنك
طارق وهو يمسح على راسها وابتسم من حس بدموعها على صدره:حتى انا اشتقتلتس ولا كان للحين ماجيتس
رحاب وهي تمسح دموعها:لا تقول كذا مره ثانيه الله يخليك
طارق:افا تبتيسن؟
رحاب مسحت دموعها بطرف كمها بسرعه:من قال اني ابكي؟ ، غبار غبار عشان من زمان ماجيت البيت
ضحك طارق واتجه لملابسه واخذها ودخل للحمام ورجعت رحاب عدلت ميكبها بسرعه وراحت تلبس غيث
~~~~~~  •  •  •  •  •  ~~~~~~
-في العزبه-
كان ابو مشعل جالس قبال مكان إبله وطلال يساره يصب القهوة وذيب يمينه يسولف
لف ابو مشعل على ذيب ونطق وهو عاقد حاجبينه من قوة الشمس وإنزعاج من ذيب اللي من جلسوا ماسكت:اسكت،انت لو محد سكتك ماتسكت؟
ذيب ضحك بصدمه وهو يطالع طلال:ابشر ياعمي
ولف ابو مشعل على طلال وأردف:وانت اخوك ماقالك متى بيجي
‏طلال شبك يدينه بعض بتوتر: هو الصراحة يبه . .
‏طالع طلال لذيب ورجع يطالع ابوه:هو . .؛وسكت
ذيب عض شفته بورطه وأردف:اللي يبي يقوله طلال . .
~~~~~~ • • • • • ~~~~~~
-في بيت أبو ذيب،تحديداً جناح ذيب وغلا-
اتصل ذيب بغلا وقالها تجهز بسرعه وأنه جاي بالطريق جهزت غلا وجهزت حمد ونزلت وحصلتهم بالصاله لابسين عباياتهم وأبو ذيب ماسك عصاته وساندها تحت دقنه ويفكر وهو ينتظر ذيب
غلا:عمتي وش السالفه؟
ام ذيب بقلق:والله يابنتي ماندري دق علينا ذيب وقال اجهزوا وجهزنا ولاحنا فاهمين شيء
لميس وهي تحاول تهديهم:إن شاء الله مافيه إلا كل خير
ميس قامت وهي تطالع جوالها:يالله ذيب برا ينتظرنا؛وطلعوا للسيارة
ركب ابو ذيب قدام ولف على ذيب وهو يسكر الباب:وش فيه وش اللي صاير عمك ابه شيء؟
ذيب عقد حاجبينه:عمي من؟
ابو ذيب:انت وين انت قالعنا الحين؟!
ذيب:ايييه عمي عبدالله قصدك مافيه إلا العافيه ،رايحين للرياض
لميس وهي تتقدم بين ابوها وذيب:وليه ان شاء الله؟
ام ذيب وهي تسحبها ترجعها مكانها:اهجدي يابنت ترانا بخط!
رجعت لميس مكانها وهي تطالع للشباك من طنشها ذيب
ابو ذيب بإنزعاج من صمت ذيب:ولد!،انطق ليه مودينا الرياض
ذيب لف على ابوه وابتسم:طارق طلع ابشرك وخلص عمليته
ابو ذيب بفرح:الله يبشرك باللي يسرك،وعمك درا؟
ذيب زفر نفسه:لا قلنا له انها جاء من السفر وطلال بيجيب أهله وعمي عبدالله والباقين بيجون بعد
ام ذيب وهي تطالع ابو ذيب وذيب:وش صاير وش بلاه طارق؟
ذيب:مسوي عمليه وقصةً طويله بس لاتجيبون خبر لاحد
ام ذيب:زين زين ؛ونزلوا من وصلوا
-في بيت طارق-
كانوا الكل مبسوطين ومجتمعين ويسولفون ويضحكون
طارق:عاد كنت بطلعلكم في الديرة لكن سبقتوني وجيتوا هنا
ابو مشعل:مابغيت تجي وانا ابوك ؛وأردف وهو يأشر بعصاته على طلال وذيب؛ فقعوا كبدي هالاثنين في العزبه أقولهم يمين يروحون يسار واقولهم يسار يروحون يمين محدن يجي مثلك وانا ابوك
طارق بابتسامه:الله يعزك ايه هذا الكلام ولا بلاش ، اقول يبه وشرايك تترك الديره والعزبه وترجع للرياض
ابو مشعل:اعقب! ،أنا اترك عزبتي وحلالي واجي هنا بين اربع جدران
طارق وهو يضحك:ما كانه اللي قضى نص عمره في الرياض، طلع للديرة فتره وأدمنها
ضحك ابو مشعل وأردف :ما ألوم جدك وحبه لهالديره ، بعيد عن زحمة المدن والغلقه كل ما ضاقت عليه الدنيا طلع لعزبته ورجع لبيته مبسوط
طارق:اي والله
ابو مشعل وقف وهو مستند على عصاته:أكرمك الله ياولدي ،تمسوا على خير
وقف طارق وهو يعدل ثوبه ونطق وهو يحاول يمنعه يروح:يبه توكم جايين اليوم امرحوا عندنا الليله وباتسر كأنكم بتروحون روحوا على راحتكم ،ترا البيت بيتكم يا ابوي،وترا هاه بكره الغداء عندي قل تم
ابو مشعل وهو يطالع لطارق:لا والله إلا عندي ؛وطالع للي بالمجلس ونطق بصوت عالي؛حياكم الله بكره عندي على الغداء ولاحد يتعذر بمناسبة رجعت طارق ؛وطلع هو وطلال بعد ما تمموا الكل
-في قسم النساء-
أم مشعل:يالله يا بنات مشينا لانطول عليهم اكيد انهم تعبانين
رحاب:أفا ياخاله أنا اتعب منكم؟
ام مشعل:معليه يابنيتي بكره نجيكم ان شاء الله؛واكملت وهي تطالع بناتها؛يالله قوموا الحقوني
قاموا مها والهنوف وهم يودعونهم وطلعوا بعد امهم وابتدوا الكل يمشون وانتهى يومهم السعيد
~~~~~~ • • • • • ~~~~~~
<بعد عدة أشهر>
"في بيت طارق"
كانت رحاب في غرفتها تتجهز وحاطه بشعرها لفافات وجالسه أمام المرايه وهي تحط المناكيرعلى أظافرها ولفت من دخل طارق عليهم بسرعه وهو يصارخ:اخيراً يارحاب اخيراً ، زوجتس صار محامي رسمياً!!
وقفت رحاب بصدمه تطالعه ونطت وهي فرحانه وتصارخ معه وحضنته وهي باقي تنط:مبروك ياطارق مبرووك اخييرررراً
طارق ضحك وتركها وبعد عنها وهو يطالعها:اي والله اخيراً والله لا اعيشتس ملكة يا ام غيث ؛وطالع لساعة جواله واردف وهو يربت على كتوفها؛بعدين نكمل فرحتنا يالله اجهزي عشان نطلع لان كلهم وصلوا هناك للقاعة ؛وراح يلبس ورجعت رحاب تحط ميكبها بسرعه وقامت بربكه وترجف من فرحتها واخذت فستانها ولبسته وراحت لغيث اللي صار يبكي من صراخهم ونيمته ورجعت تكمل تجهيزها ،طلع طارق من غرفة تبديل الملابس وهو يسكر كبكه ويشوفها وهي تتحلطم من المناكير اللي خرب من تحركت بسبب دخول طارق وتقدم وسحب كرسي واخذ علبة المناكير منها وجلس وهو ماسك كفّها اللي صار على ركبته وابتدأ يحطه لها
رحاب وهي تطالعه ومركزه معه وهو يسويه لها:طارق بسألك فيه كلمة قلتها لي يوم ملكتنا ممكن تعيدها كان فيها اسم غيث؟
رفع نظره لها وابتسم ورجع يكمل يحط لها المناكير وهو يتكلم:جيتي مثل الغيث والدنيا صحوه؟ ادريبتس مافهمتي برّدها لتس بسؤال هو إذا كانت السماء صافيه مابها غيوم نقدر نقول انه ممكن يجينا غيث؟
رحاب وهي تطالعه بتمعن:لا
طارق رفع نظره لها وهو يمسك كفّها ويوقفها:يعني معناها اني ماكنت متوقع انه بعد كل اللي مرينا فيه بنتخطاه وبتصيرين ام عيالي ولكن حاولت وقمت وطحت لين اخذتس وهذي اعظم إنجازاتي ودام الله معنا ومع الحق ماكان صعب علينا نجتمع؛ولف على غيث اللي بسريره؛ونجيب غيث
رحاب ابتسمت على كلامه وهي تطالعه:الله لا يحرمني منك يا ابوغيث
طارق وهو يطالع عيونها:ولا منتس يا أم عيالي؛ولبست رحاب عبايتها وتقدم طارق يشيل غيث وطلعوا لزواج عازم والهنوف
-انتهى✨
~~~~~~ • • • • • ~~~~~~
طبعاً طارق ورحاب صار عندهم غيث وجابوا أجمل بنوته وسموها ود
وسعد ومها مكتفين بتؤامهم خالد وعهد وتركي وحلا رزقهم الله ببنت وحده وسموها ملك وكانت اسم على مسمى وماقدرت حلا تحمل مره ثانيه وتبنوا بنوته ومشعل والجوهرة صار عندهم سهم ومنى وحمدان ومشاعل صار عندهم ولد واسمه مالك وكان يجمع حرفين من اسمائهم وطايل وندى صار عندهم ولدين حاتم وماجد والوليد وجوهرة ينتظرون أجمل بنوته تجي بالسلامه وعازم والهنوف جابوا ولد اسمه عبد الكريم
-تمت بحمد الله-
أول كتاباتي
الحمدلله على إتمام اول كتاباتي جيتي مثل الغيث والدنيا صحوه أتمنى انها حازت على اعجابكم عشنا رحلة جميلة مع أبطالنا وحياتهم اللي ماكانت تخلوا من العقبات عشنا معهم حلاوة الأحداث ومرها شهدنا على حبهم وترابطهم مهما كانت الظروف اللي يمرون فيها وشهدنا على تضحياتهم عشنا بين تنوع المجتمعات اللي جسدته لنا بشكل واضح كان الفرق بين غلا وبينهم كبير جداً وشهدنا على الصداقة ومشاعرها وجمالها اللي جسّدوه لنا مشعل والوليد وشهدنا على حب الخوات اللي مثل سعد والجوهرة وطارق والهنوف وشهدنا على حلاوة الأقدار اللي جمعة تركي وحلا وكان عوض لكل اللي مرت فيه وشهدنا على تغير ابو حلا بعد مرضه
اتمنى اني أكون أعطيت كل شخصية حقها
ختاماً لن اقول وداعاً بل سأقول لكم إلى اللقاء القريب🤎
لو كنتوا حابين تعرفون اي شيء هذا حسابي في الانستا قولوا اللي ودكم(rwaaai0)..