جيتي مثل الغيث والدنيا صحوه

Part63

سعد وهو توه جاي لهم من عند طارق وشافهم يمشون بسرعه وقف قدامهم:وش صاير معكم؟ اذا عن طارق فهو بخير الحمدلله عدّت هالمره
ابو مشعل وقف بخوف وبانت ملامح الخوف على وجهه:طارق؟ ؛ولف لمشعل وطلال وأكمل؛وش فيه طارق فيه شي ولا علّمتوني عنه؟ انطقوا وش فيه اخوكم؟
سعد وهو يهدّي ابو مشعل:اجلس ياعم اهدأ لايرتفع ضغطك طارق طيب ومافيه الا العافيه؛وطالع لمشعل اللي اشرله يجيه وبعدوا عن ابو مشعل اللي كان عنده طلال يهديه
مشعل:وش فيه طارق؟
سعد:شاف الدكاتره يوم اجتمعوا على غرفة عمي عبدالله بعد ماتوقف نبضه وانعشوه ورجعت له احداث وفاة جدي الله يرحمه وانهار وانفكت خياطته
مشعل:الله يرحمه،اموره زينه الحين عشان أودي ابوي يشوفه ولا تعبان؟
سعد:عادي خله يروح له يمكن يلين قلبه عليه لو شاف حالته ويرحمه
مشعل:زين؛وراح لأبوه؛ودك تشوف طارق؟
ابو مشعل وهو يقوم:ودني له؛ومسكوه مشعل وطلال يعاونونه وراحوا لغرفة طارق
لف طارق يطالع للباب وهو ماسك راسه:ادخل ياسعد
دخل ابو مشعل وقام طارق يمشي يمه ويحب راسه:شلونك يبه ليش جاي ومتعب نفسك أنا وسعد عنده
ابو مشعل وهو يلمس راس طارق اللي ملفلف بشاش:علامه رأسك ياولد
طارق:كنت مستعجل وتزحلقت وانفلق راسي
ابو مشعل:واللي مغير سيارته من؟ تكذب علي ياولد!
طارق حس بورطه وطالع لمشعل اللي فهم عليه وقال:يبه مب وقته الله يهديك
ابو مشعل:أنا ربيتكم على الكذب؟ ردوا أنا ربيتكم على كذا؟
الكل:محشوم
طارق:اجلس وروق وبقولك كل شي
ابو مشعل:عمك عبدالله
طارق طالعهم بخوف:وش فيه؟
ابو مشعل:علمني بكل شي يخص سالفة رحاب
طارق بعدم فهم:هاه؟ يبه طلبتك تقفل الموضوع هذا أبداً مب وقته الوضع اللي حنا فيه مب مناسب أبد
ابو مشعل طلع ولحقه مشعل ورجع طارق لسريره وهو ينسدح وطلال عنده اللي قال له كل شي بالتفصيل
طارق بفرح:بذمتك؟ انت صادق! طيب وراك ماعلمتني من اول
طلال:يارجال بغى يموت ابوي يوم تكلم عمي بس زين منه انه أصرّ على ابوي يسمعه لين يخلص كلامه ،اييه لو تشوف وجه ابوي يوم قال سعد طارق مابه الا العافيه مرت سليمه خاف عليك يالثور و ارتفع الضغط عنده ومسكني أنا ومشعل تهزيء وماعلمتوني ومدري وش
ضحك طارق:احسن خلكم دايم وانا آكلها عنكم جعل عمره طويل؛وسكت بعدها اكمل؛سعد درا عن كلام عمي؟
طلال بنفي:لا كان عندك وقتها
طارق:يالله هانت الحمدلله؛وطلع بعد ماكتبوا له ولابو حلا خروج
~~~~~~•••••~~~~~~
وطبعاً بعدها ثبتت براءة رحاب وأعترف عارف بكل ماثبت عليه من كلام ابو حلا
~~~~~~•••••~~~~~~
<في المجلس>
كانوا كلهم مجتمعين عند ابو حلا ويضحكون ويسولفون وكان الكل فرحانين
وطلعوا بعد ماجهزوا الفرش برا وشبة النار اللي كانت جنبها دلال القهوه وأباريق الشاهي والناس كلهم اللي دخلوا وهم فرحانين من فرحهم ونسيوا السالفه ووقفوا ابو مشعل وابوحلا وأبو ذيب وهم يطالعون لسعد ومعه طارق وهم يلعبون وقام حمد ولد ذيب من جنب سالم وهو يركض لطارق لفوا طارق وسعد له وهم يلعبون معه على العرضه ويرددون معها:
نحمد الله جت على ماتمنى
من وليّ العرش جزل الوهايب
خبر اللي طامع في وطنا
دونها نثني إليا جت طلايب
واجد اللي قبلكم قد تمنى
حربنا لي راح عايف وتايب
ياهبيل الراي وين انت وإنّا
تحسب إن الحرب نهب القرايب
كان ما نجهل على اللي جهلنا
ما سكنا الدار يوم الجلايب
ديرة الإسلام حامينه إنّا
قاصرين دونها كل شارب
حمد:عمي طارق ابي العب معك بالسيف
سعد طالع لطارق وهو يضحك:حتى البزر عجبه لعبك
طارق ابتسم لحمد:والله ان تبشر عطه السيف ياسعد
سعد مد السيف لحمد وسحبه يوقفه قدام طارق بمسافه بعيده شوي احتياط عشان مايصير لهم شي وراح يعيد العرضه ووقف يشوف حمد وهو مركز مع طارق ويقلده بكل شي مسكت السيف والحركات وبدل نظره للناس اللي جنبه وكان يختلف كلامهم:من ولده هذا،كم عمره،شف كيف يلعب
تقدم سعد وهو يسحب حمد خوفاً عليه من العين:اذكروا الله يارجال العين حق
اختلفت ردودهم اللي يقول:ما شاء الله،ما شاء الله عليه لعيب،الله يخليه لاهله
سعد اخذ حمد معه وهو يبعده عن الرجال:رح ناد مها
حمد:طيب؛ودخل عند الحريم وهو يدور على مها وتورط من شافهم يتشابهون وراح لامه؛يمه وين مها
غلا عقدت حاجبينها وضحكت:ليه
حمد:عمي سعد يبيها
قامت غلا ومسكت يده وهي تضحك ووقفت عند مها:هذي مها وش تبي تقول لها
حمد:خاله مها عمي سعد يبيتس
ابتسمت مها بإحراج من شافت غلا تضحك:قول لعمك ماني فاضيه
حمد:بس أنا شفتك ترقصين
مها تقدمت وهي تسكته:حمود بعطيك خمسه ريال وقوله اني مشغوله تمام؟
حمد ضحك ببراءه:تمام؛وطلع لسعد
سعد:وينها جت؟
حمد:لا
سعد:ليه؟
حمد:مشغوله؛ورجع لمها وسعد رجع للرجال
حمد:خاله مها قلت له انك مشغوله وين الخمسه
مها:هذي هي خذها ؛اخذها حمد وطلع يركض للرجال وهو فرحان بالخمسه
ذيب:حمد
حمد:سم يبه
ذيب:تعال شف طارق وينه ناده لي
ركض حمد لطارق:عمي ابوي يبيك
طارق نزل الدله على النار وراح لذيب وهو يسولف مع حمد اللي كان من شدة فرحه بالخمسه ماسكها بيده ويوريها الرايح والجاي
حمدان:اخسس ياحمّود معك فلوس
حمد بفرح انه احد انتبه له:ايه عطتني إياها خاله مها
سعد:ليه عطتك إياها
حمد:عشاني قلت انها مشغوله وهي كانت تر....
مسكوه طارق وسعد وهم يسكتونه
وضحكوا العيال عليه ورجعوا يجهزون العشاء وهم يطقطقون على سعد وبعدها طلعوا وهم يودون العشاء للرجال
طارق:حياكم الله تفضلوا
قاموا الرجال يتعشون وطلعوا العيال اللي يجددون القهوه والشاهي واللي راحوا يدخلون عشاء الحريم
~~~~~~•••••~~~~~~
-قسم النساء-
الهنوف:بنات ادخلوا للغرفة عشان بيجيبون العشاء ويدخلونه الحين ؛وقاموا البنات كلهم دخلوا الغرفه ورجعت الهنوف وهي تقولهم يدخلون ووقفت عند المطبخ وهي تناظرهم داخلين وماقدرت تتحرك من دخلوا طارق وعازم وهم ينزلون العشاء وانحشرت رفع نظره من حس بحركة قريبه منه وهو يطالعها ومعقد حاجبينه من شافها واقفه تطالعه وماحس بنفسه وهو يتأملها بدون مايشيل عيونه عنها وابتسم ابتسامه هاديه وهو يشوفها تخبي نفسها بطرف الباب وطلع وهو مب عارف الشعور اللي جاه ومشى لقسم الرجال وهو ينفي شعوره وبان فارق العمر بينهم كبير من هيئتها الصغيره وجلسوا العيال وهم يسولفون وهو مب معهم كان جالس يتذكرها ويبتسم ويفكر فيها وده يعرف من تكون
طارق:وين وصلت
عدل جلسته عازم:معكم معكم
~~~~~~•••••~~~~~~
<<بالليل>>
-عند رحاب-
كانت بغرفتها واقفه عند الشباك وهي تطالع للعيال وهم جالسين يرتبون وهو معهم واتصلت عليه
قام وهو يبعد عن العيال ورد عليها وهو ينتظرها تتكلم:رحاب؟
رحاب:وينك؟
طارق:قريب بغيتي شي
رحاب وهي تطالع أظافرها:عمي اليوم كلم ابوي
طارق بخوف:وش قال؟
رحاب ابتسمت:يبي يحدد موعد الزواج
طارق بفرح وضح من صوته:في ذمتس
رحاب ضحكت بخفه:وربي
طارق:ويل أمها طلع يعرف المفاجآت الشايب
ضحكت رحاب:تراه ابوك يالاهبل
طارق وهو يضحك:اَي والله اهبل اخخخ أخيرًا بتصيرين عروستي أخيرًا
سكتت رحاب بتوتر من قال عروستي وهي ماتدري وش صار فيها خوف وتوتر وفرح تراكمت عليها المشاعر من الصدمه
طارق:الووو وين رحتي
رحاب:موجوده
طارق:متى قال عرسنا؟
رحاب انحرجت من سواله وقفلت الخط
بعد طارق جواله عن أذنه وهو يشوفها قفلت وعض شفته وضحك من عرف انه احرجها ودخل لغرفته وسحب على العيال
~~~~~~•••••~~~~~~
<في بيت أبو مشعل>
نزلت الصينيه الهنوف وراحت فوق لطارق وطقت الباب ودخلت:طارق قوم انزل افطر ورح للعزبه اخلص لا تتأخر؛وراحت يمه وهي تسمعه يتكلم في نومه وطالعت طلال اللي صحى وكان جالس على سريره ويطالعهم هي وطارق ونطقت:هو كذا دايم يكلم نفسه؟
هز طلال راسه بتأييد
الهنوف:مب صاحي ذا مهبول؛وصارخت وهي تحركه؛طاررررقققققق قممم انززلللل افطططررررر
فز طارق:يارب مب حلم! ؛ومسك صدره من شافها واقفه قدامه عند راسه
الهنوف ضحكت بقوه واعطته مويه:ياخي انت مريض اقسم بالله قم اخلص ابوي ينظركم على الفطور اخرتوه؛وطلعت وتركتهم
لف طارق على طلال ورمى عليه علبة المويه من شافه يضحك عليه:ياخي انتم مب صاحين مب مرتاحين لين تطيرون عقلي ياااووووككككك
طلال بعد ماوقف ضحك وهو ماسك بطنه:والله انت اللي بتطير عقلي اليوم صحيت لقيتك تسولف مع نفسك وانت نايم بس كذبت على الهنوف قلت هو دايم كذا؛وغمز؛بس قلي ماني قايل لاحد ليش قلت يارب مب حلم وش اللي وصلك لمرحلة تتكلم في نومك؟
طارق وقف وهو يمشي بسرعه لطلال وهو ماسك ضحكته من عرف ان طلال اصلاً ما كان نايم لانه صاحي من الفجر ومسك فمه:ياويلك ياطلال لو تنطق بحرف لا العن شكلك
طلال بعد يد طارق عنه وقام يركض وهو يضحك:اللي مآخذ قلبك يتهنى ابه
طارق لحقه ومسكه قبل يطلع وضحك:يابزر اعقل!!
طلال:يارب مب حلم اجل؟؛وضحك
طارق دفه داخل الحمام واخذ المفتاح وقفل الباب:أوريك يا طلالوه
طلال وهو مكمل ضحك ويطق الباب:افتح طارق ياولدد
لبس ملابسه طارق وطلع وتركه مقفل عليه
-بالصاله بعد الفطور-
ابو مشعل:اسمعوني زين كلكم ؛ولف لطارق اللي كان يلعب مع سهم بحضنه ويضحك؛أكيد ان الهنوف علمتك اعرفها ماتمسك العلم
ضحكت الهنوف:ييبببه تراني هالمره صدق ماتكلمت
ابو مشعل وهو يطالع لطارق:تكلمت مع عمك ابو سعد وحددت موعد زواجك
طارق طالع لهم بصدمه مزيفه ووقف وهو شايل سهم:أسألكم بالله
الكل ضحكوا عليه
الهنوف:حبيبي انتبه ترا معك طفل وطبعاً كلنا ندري انك تدري الا انت ولا احد يكشخ من صباح الله خير
طارق أعطى سهم لمشعل وهو يضبط شماغه:وش الجديد طول عمري أنا كاشخ
الكل:واضح؛وضحكوا
الكل ضحكوا وقاموا يباركون وقام ابو مشعل وبعده عياله للمجلس عشان الحريم يأخذون راحتهم بالسواليف والجلسة
-انتهى✨