جيتي مثل الغيث والدنيا صحوه

Part 71

-في بيت أبو ذيب-
كانوا كلهم مجتمعين بالصالة على الغداء
أبو ذيب وهو يطالع ذيب اللي سرحان:ذيب ياولدي وش بلاك علامك ماتغديت اعجل عشان تلحق عيالك عمك للعزبه
ذيب وهو يطالع للأكل قدامه:عيال عمي ماهم في العزبه ولا راحوا لها
أبو ذيب عقد حاجبينه باستغراب:وش فيهم تكلم فيهم شيء؟
ذيب رفع نظره لابوه ونطق بتوتر:طارق في المستشفى ماهو مسافر مثل ماقلت لكم
ابو ذيب وقف بغضب:وش! وش صاير فيه
ذيب وهو يمسك كف ابوه:اجلس يبه وبفهمك كل شيء
ابو ذيب وهو باقي واقف:انطق!
ذيب وهو يطالع غلا:كلمني قبل حول اسبوعين سالم وقالي انه عارف طلع من السجن وبعده بفتره يوم طارق جاله ولد جاه واحد وصوبه عند المستشفى وانحاش واللي فهمته من الدكتور انه الحين يحتاج متبرع قلب واللي اطلق عليه للحين الشرطة تدوره
ميس بخوف:يعني عارف اللي ورط رحاب هو نفسه اللي صوب طارق؟!
ذيب لف عليها:ماندري بس عمي خالد لاحد يقوله ولا يوصله الخبر تراه مايقوى خبر كذا على طارق وانتم أدرى بصحته؛ولف على ابوه وأكمل؛اجلس يبه كمل غداك
ابو ذيب:قم قم ودني لطارق!!
ذيب قام وهو يحاول في ابوه يجلس وأنهم مانعين الزياره ولو راح ماراح يستفيد شيء ولكن ابوه كان مصّر يشوف طارق
~~~~~~•••••~~~~~~
-في المطار-
كان مشعل جالس وهو ينتظر يفتحون البوابات للاقلاع وماسك جواله يخزن أسامي المستشفيات وأرقام الدكاتره ويتواصل معهم ولكن وقف بصدمه وهو يطالع للاشعار اللي جاه اللي قلب موازينه ركض بسرعه وهو يطلع من المطار ويتجه لسيارته وهو يتصل بسعد
سعد:مشعل؟ وش فيه طارق فيه شيء؟
مشعل وهو يركب سيارته ويشغلها:لا لا تكفى ياسعد تكفى يابو خالد
سعد بخوف:ابشر بعزك وش فيك
مشعل وهو يحرك سيارته بسرعه:برسلك صوره وشف الرساله
فتح سعد الصوره اللي كانت عبارة عن تهديد موثق بصوره ونطق بسرعه:مشعل منهو ذا؟
مشعل وهو يشتعل نار ونطق بغضب:مدري ياسعد مدري لكن خلك حولهم وانا بجيك
سعد بسرعه:يالله يالله بروح لهم ،بس يامشعل انتبه لنفسك ذا ماهو صاحي
قفل الخط مشعل وهو يطالع للطريق والمرايه ونطق وهو يرجع شعره بيده:اخخخ بس القاها من طارق اللي بين الحياة والموت ولا من نفسي ولا من ابوي ولا من ومن يالله عجل بالفرج يالله
~~~~~~  •  •  •  •  •  ~~~~~~
-عند الجوهرة-
كانت واقفه قدام المرايه وهي تمسح بطنها وتطالعه وهي مبتسمه وفرحانه ولكن تغيرت ملامحها وهي تفكر شلون بتقول لمشعل خصوصاً يوم طلع بدون مايرد على تساؤلاتها وقطع حبل تفكيرها وابعدت يدينها عن بطنها من دخل سهم وهو يقول:يمه انا جوعان سويلي اكل
الجوهرة ابتسمت وهي تنزل لمستواه وتمسك خده:الحين اجيبلك اكل كم عندي سهوّم أنا؟
سهم:واحد؛وتقدم يبوس خدها ومسك يدها من مدتها له ونزلوا للمطبخ
سهم:يمه،ليه ابوي مايرجعنا بيتنا ليه خلانا هنا عند جدي؟
الجوهرة وهي تسوي الاكل وتفكر لان حتى هي مب عارفه:لانه مشغول وتعرف داومه انت مايحتاج اقولك؛واعطته اكله واردفت؛إذا خلصت غسل يدينك والصحن واجلس بالصاله لا تطلع
سهم:بس أنا ودي العب مع حمد
الجوهرة:مايخالف تخلص واجباتك ومذاكرتك بعدها تلعب معه؛ولبسة عبايتها ونقابها وطلعت لبيت ابوها
سعد وهو جايها بسرعه ووقفها:الجوهرة؟ ،وين رايحه
الجوهرة بنبرة استغراب:هلا سعد ،رايحه لامي وش بلاك؟
سعد وهو يدور على سهم:وينه ولدتس ماهو معتس؟
الجوهرة:داخل يذاكر وش فيه صاير شيء؟
سعد:لا ،طلال موجود؟
الجوهرة:لا طالع مع عمي للعزبه،إلا بسألك رحاب ليه ماطلعت للحين فيها شيء؟
سعد:لا مابها غير العافيه ،بس عشان غيث تعرفين انتي مولود بدري وكذا
الجوهرة:سعد فيه شيء مخبيه علي صح؟ أعرفك لا صار فيك شيء
سعد بتوتر:لا.لا.مافيه شيء اخبيه عنتس وانا اخوتس
الجوهرة:بقولك اسمع طارق له كم يوم مختفي عن الناس لا يروح للعزبه ولا يجي هنا
سعد:وانا وش دراني عنه؟
الجوهرة:أنا ماقلت شيء وش بلاك عصبت اعوذ بالله ؟
سعد:اقول ارجعي لولدتس وخليتس حوله أنا شوي وبجيتس
الجوهرة:يوه ياسعد تعال عند اهلي بروح لامي مبطيه منها
سعد:امي مب فيه رايحه للسوق
الجوهرة:هو؟ واني داقه عليها قبل شوي قالتلي انها في البيت
سعد:ايه كانت في البيت وتوها طلعت قبل تطلعين؛ومسك ذراعها؛يالله عاد ماودتس تقهويني من زمان عن قهوتس ولا ماتسوينها إلا لابو العيال مشعل
ضحكت الجوهرة:افا الحين تنزلك احلى قهوه وفوقها حلا بعد وش تبي اكثر من كذا؟
سعد:هذي والله اختي بعدي والله؛ودخل للمجلس والجوهرة راحت للمطبخ
سهم:يمه امداتس تروحين وتجين؟
الجوهرة:خلص مذاكرتك وروح للمجلس خالك فيه
قام سهم:معه خالد ومنى؟
الجوهرة:لا بس إذا خلصت واجباتك بعزم مها تجي وتجيبهم معها
رجع سهم يجلس ويحل واجباته:تممم اخيراً بيجي احد العب معه
~~~~~~  •  •  •  •  •  ~~~~~~
-عند رحاب-
طلعت من غرفتها بخوف على أصوات صراخ ووقفت من شافت وحده كبيرة بالسن وهي تبكي وبعدت الممرضات اللي مجتمعين عليها والناس وتقدمت منها:شفيتس ياخاله ؟
كبيرة السن:ولدي ولدي يكذبون علي لاتصدقينهم هذولي كذابين
الممرضه:ولدها توفى وانهارت علينا والظاهر انها انجنت
رحاب حضنتها وهي تبكي وتمسح عليها:وحدي الله وحدي الله ياخاله ولاتقنطين من رحمة الله
كبيرة السن وهي تبكي وتصرخ:وللللدددييي رررااااح ولللللددددديييي رااااحححح تكفون لااااا تكفووونننن لا تاخذونه اببييييه ابببييييي وللللددددييي علمميييهههممم يابتني يخلونه ما مات ولدي ما مات أنا كنت عنده كان يتنفس قوليلهم !!
رحاب وهي ترفع راسها تخفي دموعها:اهدي ياخاله تكفين اهدي هو راح للي ارحم منك ومنهم هو راح لرب العالمين وحدي الله وادعيله ،هو مايبي منكم إلا الدعاء البكى يعذبه بقبره ترضون يتعذب بسببكم؟ ماترضون صح؟محد يرضاها اذكري الله وتعالي معي اشربي مويه واهدي زين؟
كبيرة السن وهي تبكي بقوه:مابي شيء مابي إلا ولدي ،خلوه عندي
رحاب وهي تحاول تهديها:لاتخافين عليه زين؟ هم رايحين يحطونه بغرفه ثانيه عشان يرتاح فيها ،قومي تعالي معي تعالي غسلي وجهتس عشان بعد شوي بيخلونتس تشوفينه تبينه يشوفتس كذا ويخاف عليتس ولا تبينه مرتاح؟
كبيرة السن بفرح:صح كلامتس ، صح يابنيتي يالله مشينا
اخذتها رحاب وراحت للحمام عشان تغسل وجهها وبعدها اخذتها معها واعطتها مويه تشربها وجلست تسولف معها وتونسها لين يجون اهلها
كبيرة السن:انتي متزوجه؟ ودي ازوجتس لولدي تراه طيب وبار فيني بالحيل وانا ادورله بنت الحلال اللي يستاهلها وتستاهله
:يمه، انتي طيبه؟
رحاب قامت من جاء ولدها وبعدت عنهم وهي تطالعهم من بعيد
كبيرة السن:أنا طيبه أنا طيبه؛ووقفت وهي تكلم ولدها؛اقول ودني لأخوك ابي أشوفه
:يـ.يـ يمه،قولي لا إله إلا الله انتي تدرين وكلنا ندري ان الموت حق
كبيرة السن قاطعته وهي تسكته بيدها ومعصبه:اقول اسكت بس تتفاول على اخوك! ؛ولفت على رحاب واردفت؛كلكم ماتصدقوني محد صدقني إلا ذي كلكم تكذبون علي!
:يمه الله يهديتس أمشي معي نرجع البيت ونريح شكلتس تعبانه
كبيرة السن:ابعد عني وراك؛وبعدته وتقدمت للمرضه وهي تقولها توديها لغرفته
تقدمت رحاب:أنا اسفه لو عقدتها عليك لكن شفتها منهاره وكنت بخفف عليها ، هي الحين بحالة صدمه حاول تأخذها بالمسايسه
:حصل خير؛وراح لأمه
كانت رحاب واقفه مكانها وتطالعهم كان يحاول فيها تروح معه بس ماهو قادر عليها كانت معصبه منهم وتحاول في الممرضات يودونها لولدها لكن ما استجابوا لها ورجعت رحاب لغرفتها وهي تتنهد من سمعت غيث يبكي
~~~~~~ • • • • • ~~~~~~
-عند مشعل-
نزل من وصل لبيوتهم وهو يشوف ذيب وسعد واقفين عند المجلس الخارجي وتقدم لهم:وش صار معكم شفتوا احد جاء
سعد:لا من يوم كلمتني للحين مافيه اي احد جاء
ذيب:شسوات الحين؟
جاء طلال من شافهم مجتمعين:مسهم بالخير
الكل:بالنور
تنهد مشعل وهو يفكر ورجع يطالعهم ونطق:اسمعوني زين ، أنا بتولى ذا اللي يهدد وبشوف وش وضعه وانت ياطلال خلك عند طارق وانتبه له وذيب بيكون معي وسعد بيتولى أمور الأهل إلى أن
طلال:بس الأنظار الحين كلها عليك يامشعل تكفى انتبه لعمرك
مشعل:ابوي لايدري عن شيء ولا مدري وش بيصير فيه
الكل:لاتشيل هم
مشعل:ذيب تعال معي بنمشي وانتم مثل ماقلتلكم؛وافترقوا من راح مشعل لسيارته ولحقه ذيب
~~~~~~•••••~~~~~~
-بداية يوم جديد-
-عند الجوهرة-
صحت وهي تطالع لساعة وشهقت من شافت مشعل جالس بجنبها ويطالعها:مشعل! شفيك خوفتني ،متى جيت؟ مب قلت بتسافر يومين
مشعل:صباح الخير يا وجه الخير
الجوهرة بابتسامه:صباح النور
مشعل وهو يطلع الأوراق اللي معه وابتسم:حصلتها على الكومدينه وكنسلت السفره عشانها،خرّبت المفاجأه صح؟
الجوهرة بزعل:اففف يامشعل ماترتاح إلا تخرب علي المفاجأه! سو نفسك ماشفت شيء!
ضحك مشعل وتقدم وهو يحضنها:يازين الزعولين ياناس ، قومي يالله بنطلع نودي سهم مدرسته وبعدها بنفطر برا
الجوهرة:ماراح أرضى كذا
مشعل:وش يرضيتس؟
الجوهرة:تجيبلي ذهب
مشعل بتصنع الصدمه:اوووه؛وأردف؛إذا ماجبت الذهب لتس أجيبه لمن؟،يالله مشينا نطلع ؛وقام بيطلع
الجوهرة وهي تقوم:مشعل
مشعل لف عليها:عيونه
الجوهرة:عندي موعد اليوم مايخالف توديني انت
مشعل:بس؟ ابشري من عيوني
الجوهرة:تسلملي عيونك؛واتجهت للدرج تاخذ عبايتها ونقابها وشنطتها ولحقته
~~~~~~ •  • • • • ~~~~~~
-في بيت أبو حلا-
كانت حلا جالسه عند أبوها بالصالة وهي تطالع حاله وكيف ان الكبر والأمراض تراكمت عليه حتى اقل حاجه اللي هي شرب المويه عاجز عنها تنهدت بقوه وطالعت لامها من دخلت:يالله يا امي ياحلا تعالي الغداء جاهز
حلا وهي تطالع ابوها:يالله يبه تجي تتغداء معنا؟
ابو حلا كان ساكت ويطالع للفراغ بدون رد تقدمت حلا وهي تاخذ الكرسي المتحرك ومسك ذراع ابوها وهي تحاول تساعده يوقف
ام حلا:اصبري يابنتي خليني أنادي تركي يساعدتس؛وطلعت تناديه
دخل تركي وهو يسنده إلى ان جلسه بالكرسي وأخذه معهم للصاله وجلسوا وهم يتغدون إلا حلا اللي كانت مشغوله بتأكيل ابوها
ام حلا وهي تطالعها:ماكليتي شيء يا حلا أكلي ووكليه وماقلنا شيء
حلا بابتسامه:إذا ابوي اكل كأن أنا أكلت ،صح يبه؟ ؛وابتسمت بانكسار وكملت تأكله
~~~~~~ • • • • • ~~~~~~
-عند عارف-
طلع للغرفة وتقدم للتسريحة ياخذ العطر ويتعطر واخذ اغراضه وفتح باب الغرفة بيطلع ووقفه يزيد من نطق:نعيماً
عارف بابتسامة سخرية:ينعم عليك،اخلص وش عندك
يزيد وهو يطالع عارف:سالم تحت يبي يشوفك
عارف حرك راسه بتمام وابتسم ونطق باستفزاز:ما أكون عارف إن ماوريتكم نجوم القوايل؛ونزل وترك يزيد بخوفه وأفكاره اللي تدور براسه
عارف بغضب يكتسي ملامحه:حي سالم
سالم:الله يبقيك ، شلونك
عارف وهو يجلس:بخير،اختصر
سالم بهدوء:ابد قلت اجي اشوفك واشوف أحوالك
عارف بضحكة استفزت سالم:هذاك شفتني وتطمنت تقدر تتفضل بلا مطرود!
سالم:أفا ياعارف هذي جزات العيش والملح اللي بيننا،تطردني!
عارف:العيش والملح؟؛وضحك بصوت عالي وأردف؛ليتك قدّرتها عشان أسامحك
سالم وملامح الاستياء تكتسي وجهه:توقعتك عقلت لكن هذا انت ماتغيّر لو وش ماكان
عارف وهو يطالع الكوب اللي بيده:ايه ماتغيرت يومك تغيرت علي من أول طيحة
سالم بانفعال:عارف!
عارف وهو يطالعه:لا ترفع صوتك! ولا عاد اشوفك معتّب خطوة في ذا البيت! ، اصلاً مدري وش كنت مرتجي من واحد باع اخته على اي احد يجي يستر عليها
قام سالم ودمه يفور براسه وطلع بغضب وهو يتنفس بسرعه ويفكر بسواة اخته اللي كسرت ظهره ولكن ماله احد غيرها ولا لها احد غيره وراح لسيارته بسرعه وهو يهدي نفسه
كان عارف واقف عند الشباك ويطالعه إلى ان راح وضحك بانتصار ودخل للمطبخ وهو يفتح الدرج وطلع سلاحه ودخله بجيبه وطلع من جاه إشعار بأن السايق عند الباب
~~~~~~  •  •  •  •  •  ~~~~~~
-في المجلس-
كانوا الكل مجتمعين بإستثناء مشعل وطلال
حمدان وهو يطالع الشيبان:شلونكم عساكم طيبين
ابو سعد:نحمدالله انتم شلونكم عساكم انبسطتوا بسفرتكم
حمدان وطايل:نبشرك على ماتود
حمدان وهو يطالع لذيب بعد ماطالع للي بالمجلس كلهم:وينهم العيال؟
ذيب بلع ريقه بتوتر:موجودين موجودين وطارق مسافر وبيرجع بعد كم يوم إن شاء الله
حمدان عقد حاجبينه باستغراب:غريبه ماقالي
ذيب وهو يبدل نظره لسعد:ايه تلقاه مايبي يزعجك،تقهو
مد حمدان فنجانه لذيب ونطق وهو يطالع لابو مشعل:اقول ياعمي ماشفت حفيدك الجديد،ماشاء الله عليه بيطلع راعي سفريات وفله
دقه سعد بكتفه عشان يسكت ولكن حمدان اكمل كلامه
ابو مشعل:اية سفريات،ادعله،ادعله يطلع بالسلامه
حمدان بخوف:علامه
ابو مشعل:تعيبان
حمدان:الله يطلعه بالسلامة يارب،اجل أنا استأذنكم بروح أريح
الكل:أذنك معك
-في المستشفى-
"عند الدكتور بسام في مكتبه"
كانوا كبيرة السن وولدها موجودين عنده وقاعد يكلمهم عن التبرع
كبيرة السن وهي تبكي بحرقة:مستحيل ،مستحيل ولدي مات
بسام وهو يبدل نظره لولدها وتحولت ملامحة من أسى إلى جدية:الحالة جداً خطيرة وصعبة وممكن بأي لحظة نفقده، وش قلت؟
:اقدر أشوف زوجته واتكلم معها؟
بسام ابتسم باسىء:طبعاً، تفضل معي وانا بترك الممرضه تعطيها مهدىء وتتنوم اليوم إلى أن تهدأ؛وطلعوا
-في غرفة رحاب-
:اعتذر منتس يا أختي بس صعبة علي صعبة اني أتبرع بقلب اخوي
رحاب وهي تطالع لغيث ونطقت ببكي:ترضى يعيش يتيم بدون أبو؛واكملت وهي تمسح دموعها؛أنا ما أستهين با ألمكم ،انتم ذقتوا الم الفقد وعرفتوه وانا ما اقوى الفقد انتم لو تبرعتوا بتنقذون روح وراها عائلة وعيال ،بتنقذون روح تحت رحمة الله ،فكر يا اخوي ولكم اللي تبونه بس طلبتك مابي ولدي يعيش يتيم وماله سند
تنهد وهو يطالع غيث ونزل نظره للأرض وأردف:بفكر بس ما أوعدتس اني بوافق؛وطلع
بسام وهو يشوفه طلع أردف:لا تلومينه ترا جرحهم ماهو هيّن وانا أوعدتس بحاول معهم ؛وطلع وقفل الباب وهو يستند عليه وزفر نفسه وبعد وقت من التفكير رجع لمكتبه
-عند بوابة المستشفى-
نزل من السيارة ووقف وهو يمد يدة لجيبه من تغير هدفه من طارق إلى غيره وهو يطلع سلاحه ويوجهه عليهم من شافهم واقفين أمام الباب ونطق قبل يضغط على الزناد:هذي عن سواتكم فيني وانا ولد راجح؛وأطلق عليهم
مشعل صرخ بفزع وخوف من طاحت قدامه:الجووووهههههررررررة!
ضحك من شافهم طاحوا بالأرض أمامه بسبب إصابتهم ورجع ركب السيارة وتحرك بسرعه يلحق على الطيارة قبل تقلع
مشعل وهو يطبطب على الجوهرة بخوف وعيونه حمراء من تراكم الدموع فيها:الجوهرة فيتس شيء قوليلي لا تكذبين علي! ؛وصرخ ينادي الممرضات
الجوهرة وهي ترفع يدينها لتحاوط وجهه:أنا بخير لاتخاف
مشعل وهو ينهار:أكيد مافيتس شيء؟ طلبتس قولي الصدق
الجوهرة وهي تطالعه وتشد على يده:قلتلك دامني معك فا أنا بخير؛ونطقت بعد هدوء ؛بس ما أدري إذا البيبي بخير ولا لا
مشعل بعد عنها من جو الممرضات يساعدونها ويرفعونها للنقاله ودخلوها تحت أنظاره نزل للأرض وهو ياخذ شماغه ويتلثم فيه ويخفي دموعه من خوفه عليها ودخل وهو يبلغ الامن يراجعون الكاميرات ويقدمون بلاغ وراح يتطمن على الجوهرة
-عند رحاب-
دخلت ساره وهي مبتسمه:مساء الخير،كيفتس اليوم وكيف غيّوث؟
رحاب ابتسمت وهي تطالعها:مساء النور؛وطالعت غيث واكملت؛احسن منه قبل انتي ؛وطالعت ساره واكملت؛كيفتس وكيف الدوام معتس
ساره:الحمدلله بخير والدوام برضوا حلو عندي لتس خبرين ايهم أبدا فيه؟
رحاب:ايه تكفين مبطيه من الأخبار الزينه اسلمي
ساره وهي تمد لها الاوراق ومبتسمه:هذي أوراق غيوثي كتبوله خروج
رحاب اخذت الاوراق وهي تقراها وضحكت بفرح:هذي صدق ولا حلم !
ضحكت ساره:صدق صدق ،شكلتس ماودتس تسمعين الخبر الثاني؟
قطعت عليهم الجوهرة من دخلت:السلام عليكم
رحاب وساره:وعليكم السلام
رحاب تقدمت وهي تسلم عليها:هلا بجوجو شلونتس يابعدي ،عسى ما شر وش جايبتس المستشفى؟
الجوهرة ضحكت:بخير بخير ؛ولفت على ساره واردفت؛اجل ماقالتلتس للحين زين لحقت عليها
ساره ضحكت:توني كنت بقول إلا دخلتي علينا
الجوهرة لفت على رحاب وهي تنطق بحماس وفرح:أنا حامل
رحاب مسكت يدين الجوهرة بفرح:مبروك ياروحي الله، يتمملتس على خير؛وحضنتها
الجوهرة بابتسامه:امين امين؛وابعدت عنها واكملت؛جمعتي أغراضتس انتي وغيث؟
رحاب وهي تطالع الغرفه ورجعت تطالع الجوهرة وتنهدت:ايه
ساره وهي تطالعهم:ماودتس تسمعين الخبر الثاني؟
رحاب حرّكت راسها بفضول
ساره ابتسمت بوسع مبسمها:وافقوا انهم يتبرعون ولوجه الله ،بس ننتظر احد يخلص الإجراءات والتوقيع
بكت رحاب بفرح ورفعت يدينها وهي تمسح وجهها:الحمدلله الحمدلله الحمدلله يارب ؛ولفت الجوهرة وراحت لها وهي تحضنها
الجوهرة كانت بحالة صدمه وساكته ولكن بادلتها الحضن وهي الف سؤال يدور برأسها
بعدت رحاب عنها وهي تمسح دموعها واردفت:مشعل موجود ،خليه يخلص الإجراءات
الجوهرة وهي تطالعهم بحيره:ايه موجود ،بس أبيكم الان تقولولي وش سالفة التبرع ووش صايرله اصلاً؟
رحاب طالعت لساره ورجعت تجلس جنب الجوهرة وبدت تقولها السالفة من أولها
الجوهرة نزلت راسها بحزن:لا حول ولا قوة إلا بالله، عمي للحين مايدري ولا حنا ندري بعد ،قالوا لنا انه مسافر برا بس ماتوقعنا يكون صاير له شيء ؛ولفت على رحاب واردفت؛وانتي طول هالمده تدرين ؟
رحاب بحزن:ايه ،بس صدقيني غصبن عني أخبي عليتس مابيتس تشيلين هم
الجوهرة وهي تحضنها من جنب:أفااا، لاعاد تعيدينها إذا ماشلت همتس أشيل هم من؟
رحاب:الله لايحرمني منتس
الجوهرة:ولا منتس ؛ووقفت واردفت؛يالله لمّي أغراضتس عشان نطلع للبيت ترتاحين
ساره:وانا بطلع اخلص كم حاله وبجيكم لا تطلعون بدوني!
ضحكت رحاب ورجعت تشيل أغراضها الخفيفه اللي كانت على الطاوله
-عند بسام-
بسام:جزاك الله كل خير والله يجعلها بميزان حسناتك،تفضل هذي الأوراق اقراها و إذا خلصت وقعها عشان نخلص الإجراءات ونبدأ بالنقل لان الوقت مايسعفنا
:بس يادكتور انت قلت . .
بسام:الحاله ميؤس منها وانا اخوك ،اخوك جسد بلا روح هو متوفى دماغياً اثر الضربه اللي بالرأس ولا تنسى انه طايح من مرتفع يعني نسبة حياته جداً ضئيلة ،واذا حيا فا بيكون عاجز كلياً ،ولا أخفيك بعد الاجتماع الأخير مع لجنة الأطباء كلهم اقروا بفصل الاجهزه عنه
:إن لله وإنا إليه راجعون،لا حول ولا قوة إلا بالله لا حووللل ولاااا قووووة إلا بالله
~~~~~~  •  •  •  •  •  ~~~~~~
-في بيت أبو مشعل-
ابو مشعل:وينه مشعل؟
طلال:مداوم
ام مشعل:تغدوا انتم لاتشيلون همه بقيت له بالمطبخ
طلال رفع صوته وهو ينادي الهنوف:الهننوووفففف يالله اعجلي علينا خلينا نتغدا
الهنوف جت تركض وجلست:هاه جيت خلاص لاتصارخ
ام مشعل:كم مره أقولتس لا تركضين!
الهنوف:عاجبتس ولدتس اللي لو ماجيت أكلني بصراخه
ابو مشعل:هنوفوه وينه مشعل
الهنوف ابتسمت وهي تطالع امها:اخذ المدام وطلعوا يفطرون برا واضن اضن بيتغدون برا بعد
طلال تنحنح من طالعه ابوه بنص عين وقال له:أنا داري انك كذوب مقطع أربع
ضحكوا ام مشعل والهنوف وسرعان ماسكتوا من طالعهم ابو مشعل
طلال بتوتر:وش تبيني اقولك يبه اقول طالع مع ام العيال
ابو مشعل وهو يكمل اكل:تغد تغد ماضنتي انك بتفلح بكذبك هذا
~~~~~~  •  •  •  •  •  ~~~~~~
-في صباح يومٍ جديد-
"في المستشفى"
كانوا مشعل وسعد موجودين عشان اليوم هو موعد عملية طارق
بسام وهو يطلع من عند طارق ووقف بالممر مقابل مشعل و سعد :انتهينا من الإجراءات وخلصناها والطاقم قاعدين يجهزونه للعملية ،ضروري تكونون قريب عشان في حالة لو احتجنا دم تكونون موجودين
مشعل:يعطيك العافيه يا دكتور ماقصرت
بسام بابتسامه:أنا استأذنكم عندي مرضى لازم اشوفهم وأمر عليهم،قدامه العافيه؛وراح
تنهد مشعل وهو يدخل يدينه بجيوبه ويفكر بالعمليه اللي مدتها طويله وصعوبتها
سعد رفع يده ووضعها على كتف مشعل وهو يربت عليه:بيطلع بالسلامه إن شاء الله،اذكر الله انت الحين وهدّ نفسك،ولا اقولك امش نطلع نغير جو عن المستشفى جابلي غلقه
مشعل بهدوء:رح انت أنا بقعد هنا
سعد وهو يمسك يده ومشى فيه:اقول امش بس ؛ونزلوا للكافي
"في بيت أبو سعد"
ام سعد وهي تطق الباب:رحاببب،رحاب يا امي قومي افطري وعيّني من الله خير
الجوهرة:يمه! ،شفيتس الله يهديتس خليها ترتاح توها طالعه من المستشفى واكيد انها تعيبانه
مشاعل:ايه والجوهرة صادقه
ام سعد:اقول روحي عني انتي وإياها؛ورجعت تطق الباب
مشاعل ابتسمت وهي تسحب امها:تعالي معي وخلي رحاب ترتاح وبعدين ترا عندي لكم خبر
ام سعد:اللهم اجعله خير ان شاء الله
ضحكت مشاعل ونزلوا للصاله
الجوهرة وهي تطالع وجه مشاعل اللي كانت تضحك:انطقي وش الخبر؟
مشاعل:هم تدفعين واعلمتس
الجوهرة:على حسب الخبر
مشاعل:ماراح اقول
الجوهرة:ماعندتس سالفه؛ومشت باتجاه المطبخ
مشاعل:أنا حامل بصير أم؛وضحكت من شافت وجيههم مصدومه
الجوهرة وهي تضمها:وه وه ياقليبي انتي مبروووك ياعيوني
ام سعد:الحمدلله يارب الحمدلله مبروك يابنيتي الله يتمم عليتس حملتس ويرزقتس الولد الصالح المعافى
مشاعل وهي حاضنتهم:الله يبارك فيكم،امين امين؛وطالعت الجوهرة واكملت؛عاد تراني مشتهيه اكل من يدينتس هالله هالله بالكبسه
الجوهرة وهي تأشر على عيونها:من عيني هذي قبل ذي كم عندي شعوّله انا؟ وحددده وتسوى الدنيا،ينزلتس احلى غداء انتي امري وتدللي بس؛وراحت للمطبخ
~~~~~~  •  •  •  •  •  ~~~~~~
-في بيت أبو حمدان-
حمدان:أنا استأذنكم بطلع للعيال
ابو حمدان:آجل أنا بأخذلي قيلوله واذا جو عمامك علمني
وقف حمدان:ابشر،سلام عليكم؛وطلع للمجلس
طلال:ارحب وينك فيه من اليوم مغير جالس مع هذولا ولافيهم اللي يلعب زين
حمدان:قيم ثاني قيم ثاني ناوي اكسر راسك اليووم؛وجلس جنب طلال واخذ اليد من مدها له
طايل وهو يطالعهم ويصب شاهي:من يبي أصبله ياعيال
ذيب وهو يمد بيالته:صب صب ثم تعال اكسر راسك بالبلوت
طايل وهو يصب له:ما منكسر إلا راسك
ذيب:احححححح اح! يدي ياورع ؛ومسكها وهو يتألم من الحرق
حمد فز وهو يبعد يد ابوه اللي ماسك يده الثانيه فيها:يبه وش فيك !
ذيب:مافيني شيء ياحمّودي جبلي ماء بارد
حمد:ابشر؛وطلع يركض
طلال وهو يضحك:كنه ركضت ابوه ذاك اليوم
ضحكوا حمدان وطايل وهم يطالعون ذيب
ذيب:ها لو ماطلع على ابوه يطلع على من؟؛وأكمل من دخل حمد وعطاه المويه؛حي الله ولد ابوه، بعدّي اي والله؛وقعد يكبها على يده تخفف الحراره
حمدان بهمس:اقول طلال وشلونه طارق
طلال:على ماهو عليه والحمدلله لقو متبرع واليوم عمليته ان شاء الله
حمدان صرخ بفرح:اييييه قلتلك بكسر راسك ؛ونط وهو مكمل صراخ؛قلت ولا ما قلت هاه قلت ولا ماقلت!
ذيب وهو يرمي عليه المسباح وبغضب:وجعاه استغفرالله ،مهبول انت!
حمدان:تعال تعال اكسر راسك انت الثاني
طلال:لا يغرك ترا ماكان لي خلق العب وانت تدري ليه بالي ماهو معي؛وطلع
حمدان بصدمه:شفيه ذا لايكون زعل؟!
طايل وهو يطالع حمدان اللي واقف ويطالعهم:ايييه زعل بسبب سؤالك له ،يوم رد قعدت تصارخ وفرحان انك فزت ،معه الحق يوم يطلع وزعل ،مريض انت؟ ماعندك احساس ولا ضمير؟
حمدان وهو يطالع للباب:وانا وش دراني إنه بيزعل
ذيب وهو يلف على يده شاش:الله يقلعك رح ناده لايجيب الطامه عند عمي الحين
حمدان:والله ! ،يعني مانتم ناوين تعلمونه؟
طايل بانزعاج:حمدان صحصح تكفى،انت شايف حالة عمي! مغير على الأدوية والضغط ماينزل بسرعه رح ناده
طلع حمدان وهو يشوف طلال يدور بالحوش ويكلم:طلال ؛وتقدم منه؛طلال أكلمك أنا ! ،لا تسوي فيها زعول خلاص عاد امش تعال اجلس معنا
طلال:انتبه لنفسك وطمني وش يصير معكم،استودعتك الله،مع السلامه ياهلا؛ودخل جواله لجيبه ولف على حمدان؛تشوفني اكلم تناديني ليه؟
حمدان:هذي جزاتي جاي أناديك تجلس وتسولف معنا
طلال:توكل توكل قدامي للمجلس اشوف؛ومشى حمدان ومشى بعده
حمدان وهو يدخل للمجلس:جبته ياعيال
طلال وهو يطالعه:جابتني رجولي ولا انت اخبر وش تجيب؛وجلس وهو يطقطق بجواله
الكل ضحكوا على حمدان اللي واقف يطالع طلال بصدمته
~~~~~~  •  •  •  •  •  ~~~~~~
-بالمستشفى-
طلع الدكتور من غرفة العمليات وهو ينزل الكمام وتقدموا مشعل وسعد بسرعه:هاه بشر يادكتور
سعد:يادكتور!
مشعل:محتاجين دم؟
الدكتور هز راسه بـ لا
مشعل وهو يطالع الدكتور بصدمه ينتظره يقول الكلمه هو عرفها بس ينتظره يجزمله اللي صار كان يطالع الدكتور ولاهو قادر يتحرك ولا هو قادر يحرك حتى جفنه بدت رجفته في جميع أنحاء جسمه يحس الدنيا بدت تدور فيه يحسها قاعده تضيق وتضيقها عليه رؤيته بدت تتلاشى كان ينتظر كلمه كلمه وحده من ثلاث حروف لكن توزن كم هائل من الألم اللي بدأ تأثيرها فيه من هذي اللحظه
الدكتور:مبروك نجحت العملية
صرخ سعد بفرح وسمح لدموعه اخيراً بالحريه:الحمدلله يارب الحمدلله كما ينبغي لجلال وجهك العظيم الحمدلله؛وتقدم يحضن الدكتور وأردف؛شكراً شكراً يادكتور لولا الله ثم انت كان ماندري وش صاير الحين
طاح مشعل على ركبه وهو منهار نفسياً وجسدياً وعاطفياً انهار وهو يسجد لله سجود شكر وهو يبكي ،كان يبكي وهو مب داري على اي سبب من همومه المكبوته بكى من فرحه ولا من الهم اللي انزاح عن صدره ولا لان الله رجع له عزوته وسنده بكى وكأنه طفل صغير صحيح هو يقوى كل شيء بالدنيا بس مايقوى شيء واحد الا وهو ان اقرب الناس له يتأذون
تقدم سعد ونزل لمستواه وهو يحضنه:الحمدلله على سلامته يامشعل الحمدلله ،اذكر الله اذكر الله واشكره اللي رد له عافيته؛ومسك ذراع مشعل وهو يساعده يقوم
مشعل مسح وجهه ووقف قدام بسام وأردف:والله مدري شلون بلحق جزاتك يابسام ،الله يسعدك ويحفظلك أحبابك ولا يريك فيهم مكروه
بسام ابتسم وهو يربت على كتف مشعل:واجبنا وانا اخوك،الحمدلله على سلامته ما يرى باس؛وتركهم ومشى
لف مشعل على سعد وتنهد براحه وابتسم وطلعوا يصلون صلاة العشاء
-انتهى✨
Insta:rwaaai0
Tik:olom_410