جيتي مثل الغيث والدنيا صحوه

Part 68

سهم اخذ الدله من امه من مدتها له:يعطيتس العافيه بس يمه لو ماعليتس امر عطيني القدوع
الجوهرة:ود القهوه اول بعدها تعال خذ التمر
سهم:زين بس جهزوه على ما اجي؛وطلع
ساره وهي تطالع رحاب اللي واقفه عند باب الخيمه:انتي وراتس رازه الطول ورا ماتجين تساعدينا
رحاب وهي تمسح بطنها البارز وتطالع لأظافرها:ماتشوفين كروشتي وبعدين خالتي قالت لا تحطين يدتس في شيء
ضحكت ساره وهي ترش عليها مويه:مهبوله اقسم بالله
ضحكت رحاب وجلست:حتى أنا نقدت على نفسي
وبعد وقت من السواليف والوناسة
-بعد العصر-
<عند الرجال>
ابو مشعل:قم يا طلال شغل السياره الليل أمسى خلنا نلحق ناصل البيت قبل تغرب الشمس
طلال وهو ينزل الدله بجنب النار:كلمتهم يبه قالوا بيجلسون الليله هنا وبكره يسرحون للبيت ولا يسرون
ابو مشعل باستغراب:وشله يجلسون هنا مالهم لزوم رح نادهم
طلال بقل حيلة:ابشر يبه؛وطلع وهو يساعد ابوه يوصله للسياره ورجع ينادي أهله ومشت الهنوف إلى ان وصلت لشباك السياره اللي بجهة ابوها وتعلقت فيه
الهنوف:يبه طلبتك بنجلس الليله هنا وبكره الصبح نسرح للبيت نبي نغير جو هنا
ابو مشعل:اقول اركبي بس
طلال:بس يبه. .
ابو مشعل:يالله بس لا نتأخر
ام مشعل:خلهم يابو مشعل الليله يباتون والعيال عندهم ماعليهم خوف وهم معهم وبعدين خلهم يأخذون راحتهم تراهم كبروا
ابو مشعل بعد عدة محاولات من مشعل وطارق وطلال:الليله بس عشان امتس لكن من الصبح ألقاكم في البيت
الهنوف وهي تحب راسه:ابشر يبه؛وبعدت عن السياره؛الله يستر عليكم؛ورجعت للبنات وباقي البنات قالوا لاهاليهم واقنعوهم يجلسون بحجة انهم ملو من البيت وبيغيرون جو كم يوم بالبر ووافقوا
-بالليل-
الهنوف وهي متكيه ظهرها على رحاب وممده رجولها:بنات طفشت مافيه شيء نتونس فيه
رحاب وهي عارفه الهنوف وشطحاتها:وش ناويه عليه اهجدي بس
رفعت راسها الهنوف تطالع رحاب ونزلت راسها بدون ماردت
الجوهرة:غريبه العيال مالهم حس شكلهم ناموا صدق
ميس:لا توني شفتهم مجتمعين بالمطبخ شكلهم جواعا
مشاعل:تصدقون حتى أنا جوعانه بس خايفه اروح الخيمه الثانيه لحالي
رحاب وهي تقوم ولبست الزبيريه:امشي بروح معتس اطلق رجولي
الهنوف:لا تتأخرون
طلعت رحاب وقامت مشاعل ولحقتها ومشوا للخيمه الثانيه اللي كانوا بيطبخون فيها
الهنوف:اقول بنات انا طفشت ومافيني صبر بروح اجيب مفتاح السياره واجي
جوهرة وهي تمسكها من ذراعها تجلسها:اقول اجلسي بس ما حنا ناقصين بعدين اللي يشوفتس يقول تعرف تسوق
الجوهرة:وجوهرة صادقه اجلسي بس خلينا نسولف
جلست الهنوف وهي تتقهوى ويسولفون هي والبنات
كانت ساره منسدحه وفزت من شافت ظلال على خيمتهم من برا واللي واضح انهم مجموعه ومعهم شيء كانهم حراميه:بنات شكله فيه احد جاي يسرقنا
الجوهرة كانت تطالع للظلال وهي تسحب سهم قريب منها لحضنها:اسكتي لايسمعونتس
وفزوا البنات كلهم واجتمعوا بجهه وحده جنب بعض وهم يحاولون يطمنون بعض
<عند رحاب ومشاعل>
كانوا جالسات يأكلون وبعد ماشبعوا تمددوا يريحون عن زحمة الخيمه الثانيه اللي مجتمعين فيها البنات ويتوسعون ونامت مشاعل بدون ماتحس بنفسها ورحاب تنعس من التخمه
طارق وهو يطالع الحذيان اللي عند الخيمه كانت زبيريه توحي انه فيه رجال وجزمه والواضح انها لبنت ولف للعيال:ياعيال تشوفون اللي اشوفه؟؛وهزوا رأسهم بإيجاب وأكمل؛اسكتوا دقيقه؛وتقدم للخيمة وفتحها بشويش وهو يطالعها وكان ظلام لدرجة مايشوف يده حتى
طلال:ياولد وش العلم ابعد خلني العن ثواهم
مشعل وهو يمسك ذراعه يرجعه:طلال اركد
حمدان وهو يطالع لطلال:تعال معي بروح اشوف الحريم تلقاهم خايفين؛وراحوا هو وطلال
طلال تقدم للخيمه وهو ينادي:مها يا مها
مها وهي تقرب للباب بخوف وحذر:طلال؟
طلال:ايه طلال انتن بخير
مها وهي تطالع للبنات:ايه بس البنات راحوا للخيمه الثانيه تكفى رح شفهم قبل شوي أشوف ظل رجال عند خيمتهم لايكون حراميه ولا ناسٍ ماتخاف الله
طلال وهو يطالع حمدان:زين ادخلي داخل ان شاء الله مابه إلا كل خير؛ومشوا بسرعه للعيال
مشعل:هاه فيهم شي
طلال وهو يحكيله اللي قالته مها وأكمل:الله يستر احد يدخل ولا دخلت وذبحته هو وإياها
دخل مشعل بغضب ووقف الدم بعروقه من سمع صرخة بنت مكتومه ولف للعيال بخوف:ياعيال سمعتوا شيء
رحاب وهي تضرب رجله تبعدها عن يدها وتصرخ وهي تتغطى:الحقونييي حرامييي
طارق بصدمه وخوف:رحاب! رحاب وينتس ؛ودخل بسرعه
مشعل وهو يبعد رجله عنها:من هنا؟
رحاب وهي تصرخ بخوف:يمه ،طارق وينك فيه؟
الهنوف طلعت وهي تركض من سمعت كلامهم وعرفت انه هم اللي كانوا موجودين عند الخيمه والظلال كانت لهم ورفعت صوتها:اصبروا لا تدخلوننن البنات فيها مشاعل ورحاب والنعال كانت لرحاب لابستها
سعد:رحاب!؛ودخل وهو يسحب مشعل وطارق ويطلعهم برا
رحاب قامت وهي تمسح يدها وطلعتلهم:كسّرتوني حسبي الله على بليسكم
مشعل وهو يعطيها ظهره:وش دراني عنتس يابنت العم ولا احد يرقد بالمطبخ؟ لا ولابسه نعال رجّال
رحاب وهي ودها الارض تنشق وتبلعها:والله ياولد العم احكم نفسك ولا تتسرع؛وطلعت للخيمة حقت البنات
طارق وهو يلحقها:وش مقصره فيه نعولتس ؟
رحاب لفت عليه:كعب وانا تعبت منه قلت ابدله بنعال أريح مير ترفق وعلم العيال وروحوا ترا مشاعل بالخيمه الثانيه لا يجيها قسمها من التكسير؛ودخلت ورجع طارق للعيال ورجعوا لجلستهم
بعد وقت مشاعل صحت وهي تدور رحاب:رحاب رحاب وينتس فيه؛وطلعت من الخيمه وهي تلفت تدورها وشافت البنات وهم جايين من جهة الرجال يركضون ومشت يمهم:وش فيتسن تراكضن؟
الهنوف وهي تمشي جهة السيارات:رحت وجبت مفتاح السياره؛وورتهم وهي فرحانه
مشاعل ضحكت وهي تمشي جنبها:في ذمتس طيب تعرفين تسوقين؟
الهنوف:ايه تعلمت من اخواني كنت أشوفهم وهم يسوقون
لميس بحماس:يالله روحي شغليها وانا بروح أنادي البنات ونجي
الهنوف:الجوهرة لا تدري وتعلم مشعل
مشاعل:لا معليتس مهب طبعها الحرَش
وركبوا هي والهنوف
الهنوف:ودتس نطعس ونسحب على البنات ؛وما مداها تكمل جملتها إلا وجت لميس والبنات معها وركبوا
رحاب:من اللي بتسوق فينا
الهنوف:أنا معليتس تراني اعرف أسوق زين
مها بخوف:بنات خلونا نعوّد بس
الهنوف وهي تطالعها:تبين تعوّدين عوّدي لحالتس حنا بنروح ننبسط ونستانس
مها:ياليلي منتس دام كلّتسن بتروحن ماني جالستن لحالي؛وركبوا البنات وشغلت الهنوف السياره ومشت
رحاب وهي تطق على سقف السيارة بوناسه:اسرعي يالهنوف تكفين
الجوهرة وهي خايفه من سرعتهم وحاطه يدها على صدرها:ياربي وليدي مابي اموت واخليه لحاله
-عند العيال-
طايل وهو ماسك الملعقه بيده ويطالع للعيال وهم جالسين ببيت الشعر ويسولفون:ياعيال الغاز خلص والأكل مابعد خلص
مشعل قام وهو يجيب الحطب:جبه بنشب النار هنا ونكمله
طايل وهو يدخل للمطبخ:زين بس احد يجي يساعدني
قاموا طارق وسعد وراحوا لطايل وجابوا الاغراض يكملون طبخهم ببيت الشعر
طايل وهو ينزل جركل المويه:نسيت الصحن هناك ياعيال احد يجيبه تعبت وانا رايح جاي؛وجلس وهو يصب لنفسه شاهي
طلال قام:خلاص بجيبه بس انتبه تكب بيالتي
طارق وهو يمد الفنجان لمشعل:سمّ
اخذه منه مشعل:سلمت
طايل:الشيبان وش معجلهم يوم يسرون كان جلسوا هنا لبكره
سعد:هم زين تركونا نجلس هنا كم يوم باليالله اقنعته اجلس ؛وجلسوا يسولفون ومروقين
طايل وهو يرفع الاكل عن النار:خلص العشاء ياعيال قرب الصحن ياولد
طلال وهو يحاكي مشعل:مشعل الصحن عندك
مشعل اخذ الصحن ونزله قدامه واخذ القدر من طايل وقلبه بالصحن وكانوا العيال يصارخون بتعزيز
طلال:يوووه يالريحه ماقصرت يا طايل
طايل:عافيه مير تراه اول وآخر مره اطبخ لكم من غير شر
سعد وهو يشمر كمه لف على حمدان اللي كان جالس بعيد عنهم:حمدان اقرب تعش قبل يبرد
حمدان:مالي فيه بالعافيه
ولما سمّو وخلاص بياكلون طارق لف من سمع صوت صراخ وكل ماله يقترب منهم ووقف من شاف سياره جايه باتجاههم وركض هو وسعد اللي انتبه للسياره وطلعوا
طارق وهو يصرخ للباقين:يا عيال هجوا ولا تشهدوا
سعد وهو مكمل ركض:عسى ماهو ذيب بس
مشعل قام بسرعه وطلع ولف لطايل وهو رافع صوته:جب الصحن العشاء ياولد ماتسوى التعب كله يروح بلمح البصر
طايل وهو يشيل الصحن:ابك نعنبو بليسك بموت وانت تبيني اجيب صحن العشاء؛وطلع بسرعه وهو شايل الصحن ومشعل ماسكه معه من جتهم ام الركب
تقدم حمدان من مسكت بريك بقوه ووقفت السياره وهو يشوف اللي يسوقونها بنات:هذولا من معطيهم السياره؟
طلال وهو يتقدم للسياره:مريضه انتي بغيتي تذبحينا يقلع بليستس؛وطالع للبنات اللي معها؛ماشاء الله اللي معتس هذولا جيش ولا قبيلة تعززلتس
مها وهي تنزل من الحوض:عليك فيها يا طلال بغت تقلبنا لولا الله ثم جيتنا صوبكم
طلال مسك راسه:لا بالله مب صاحين انقلبوا بعيد عنا جايين صوبنا ليه بتذبحونا
مشعل جاهم وهو ماسك ثوبه ويطالعها بصدمه من نزلت:هنوفوه!
الهنوف بخوف:طلبتك لا تنطق بشيء طلال كفى ووفاء وبعدين انتم سالمين وحنا سالمين هذا اهم شيء
كان مشعل يطالعهم بصدمه وما استوعب ولا شيء
رحاب ضحكت:افا ياولد العم وشبها رجولك تراقل
مشعل وهو ينزل ثوبه:بلاتس ماشفتي الموت جايتس
ضحكوا البنات على اشكالهم اللي اقل ما يقال عنهم طايره عقولهم
سعد وهو جاي يمهم ولمح مها ونطق بصدمه:مها؟!! وش موديتس معهم
مها انحرجت وهي تخبى ورا البنات:تبيني اجلس لحالي؟كلهم راحوا قلت اروح معهم
سعد:وانتي اي احد يقولتس شيء قلتي معهم معهم علاهم علاهم ،والعيال عند من؟
رحاب ردت بسرعه:عند حلا
طارق:حتى انتي معهم! نعنبو بليستس لو صاير فيتس شيء ماتخافين على عمرتس انتي؟ حتى كرشتس ماهجدتس يالخبله
رحاب:ياويلي انت من وين جيت
طارق:امشي بس للسياره انتن ماورا جمعتسن خير
رحاب:لا تكفى مابي البيت توبه أطاوع الهنوف بس خلني معهن الليله
طارق:امشي بس امشي؛وراح لسيارته
رحاب وهي تطالع الهنوف:اففف كله منتس يالهنوف
مشعل وهو يطالع الهنوف والجوهرة:يالله حتى انتم شيلوا أغراضكم وصحو سهم بنمشي
الجوهره:زين ؛وراحت هي والبنات من تنكدت طلعتهم بسبب تهور الهنوف
~~~~~~ • • • • • ~~~~~~
-بداية يوم جديد-
ابو مشعل وهو رايح للصاله:اصبحنا وأصبح الملك لله يالهنوف اعجلي وانا ابوتس بالفطور
الهنوف من المطبخ:يالله ابشر؛ولحظات وجهز وقدمته
طلال نزل ومشى للصاله يحب راس ابوه وأمه:صبحهم بالخير
ابو مشعل:بالنور
طلال جلس يفطر معهم:اليوم لا تحسبون حسابي بالغداء يمكن اتغداء بالدوام
ام مشعل:زين
ابو مشعل:اهم شيء قبل العصر وانت بالبيت عمتك نوره بتجي هي وعيالها عندنا اليوم بيخطبون أختك الهنوف وكلم اخوانك يجون بعد
طلال قام من شبع وغسل يدينه ومشى للباب بيطلع:ابشر على هالخشم ، الله يحييهم؛وطلع
ابو مشعل:أنا بطلع امر على اخوي عبدالله اشوف احواله وبجيكم
ام مشعل:فيه شيء؟
ابو مشعل:سخونه وما سخونه
ام مشعل:اجل بسويله مرقه وبرسلها مع الهنوف لكم
ابو مشعل:جزاتس الله خير يا ام مشعل؛وطلع
ام مشعل قامت وهي تطالع للهنوف:اخلصي بسرعه والحقيني عاونيني
الهنوف بحلطمه:ابشري يمه
-في الطريق-
نوره:اخيراً ياوليدي اقتنعت وبتعرس
ابتسم عازم:وش حاجتي من الدنيا غير رضا ربي ثم رضاتس يالغاليه
نوره:ياحبيبي
النارا وهي تسوي ميكبها:شغل لنا أغنيه شيء
عازم لف عليها وهو ماسك ضحكته:ايه خير ان شاء الله
النارا وهي تطالعه وتطالع امها:وش فيه وجهي فيه شيء؟
نوره ضحكت:مدري عنتس انتي اخبر بعمرتس
عازم وهو يحرك المرايا جهتها ومبتسم بوسع مبسمه:ابو قاسم وش جايبك معنا
النارا وهي تطالع انعكاسها وشهقت من شافت الايلاينر محيوس:يالليل لازم أعيده من اول وجديد
نوره:اعجلي ترانا قربنا نوصل
النارا:عازززمممم نقص سرعتك وش معجلك مب طايرين البنت واهلها
عازم وهو يوقف عند محطه يعبي بنزين:يالله معتس 10 دقايق تخلصين فيها على ما اعبي السياره واخذ ثوبي من المغسله
النارا:جعلني فدوتك عزوّمي
ابتسم عازم ونزل للمغسله وقفل الباب
لفت نوره على النارا:وش هالكلام؟
النارا وهي تحدد شفايفها ونطقت بعدم فهم:وش؟
نوره كانت بتتكلم بس سكتت من جاهم عازم
عازم ركب وهو يفتح درج السياره:نسيت بطاقتي؛واخذها ونزل وراح يدفع ورجع بسرعه وهو يركب:ها خلصتي ياروحي
النارا وهي تلبس نقابها:ايه
مد لها عازم كيس فيه أغراض جايبه من البقاله للطريق وشغل سيارته وحركوا لبيت ابو مشعل
<في بيت ابو مشعل>
كانوا كلهم واقفين عند الباب ويرحبون في العمه نوره
طارق:ارحبي ياعمه شلونتس عساتس طيبه ، تفضلي حياتس
نوره وهي تدخل:المرحب يبقى ، نحمدالله شلونكم انتم
طارق:على ماتودين،يا مها افتحي الباب الثاني
راحت النارا تدخل من الباب الثاني ووقفت من ارتطمت بأحد واقف جنب الشجر وما شافته وبعصبيه:بسم الله الرحمن الرحيم قلت الأماكن
طلال وهو يبعد عنها:م.معليش بس ترا انتي اللي جايتني ماجيتس
النارا سفهته ودخلت من شافت مها عند الباب:السلام عليكم
مها:وعليكم السلام يامرحبا الله يحييتس
النارا:البقى يامرحب
مها:تفضلي المجلس شوي واجيتس؛وطلعت لطلال؛وش فيك متنح هنا؟
طلال بتوتر:لا لا ولا شيء بس كنت بفتح الباب وفتحتيه انتي بروح للرجال؛ومشى وهو يفكر
مها دخلت المطبخ تاخذ القهوه وطلعت للمجلس:تو مانور البيت با اهل الشرقيه
النارا بابتسامه:منور باهله شلونتس شلون التؤام
مها وهي تمد الفنجان للنارا:كلنا بخير انتي شلونتس
النارا:الحمدلله بخير وينها الهنوف
مها:شوي وبتجي
رحاب:هلا بالنارا
قامت النارا تسلم عليها:هلا فيك ياعيوني شلونك
رحاب:بخير ابشرتس وينها عمتي؟
النارا:عند خوالي بالمجلس
رحاب:زين بروح اشوف الهنوف أنا واجيكم؛وقامت طلعت
مها ابتسمت للنارا:البيت بيتس خذي راحتس بخلص شغيله واجيتس مانيب مطوله؛ولحقت رحاب؛وين انتي رايحه؟
رحاب وهي تحط يدها على صدرها:اعوذ بالله شفيتس خرشتيني يامهبوله
مها:توتس بالشهور الاولى وش مرقيتس الدرج؟
رحاب:ترا مشيت شوي شوي مشيها عاد انتي
مها تنهدت:الله يعينني عليتس بس؛ودخلوا عند الهنوف
رحاب:عشتوا الناس تحتريتس تحت وانتي تغنين هنا
الهنوف:يووه كانهم اول مره يشوفوني تراني الهنوف نفسي نفسي
ضحكت رحاب:اخلصي بس انزلي الرجال يحتريتس
الهنوف وهي تطفي الاغنيه اللي مشغلتها:بسم الله الرحمن الرحيم اللهم اجعل من أمامهم سداً ومن خلفهم سداً فاغشيناهم فهم لا يبصرون؛واخذت البلشر وهي تزيده وبعدها اخذت الروج
مها وهي تمسك ذراعها وتسحبها معها للباب:يالله هنوفوه مب وقته اللكاعه
الهنوف:اصبري بس عطر تكفين آخر شيء
رحاب:خليها تعطر وانتي اخلصي بسرعه وانزلي
الهنوف:انتظروني بنات ولا والله ما انزل
طالعوا بعض مها ورحاب ووقفوا ينتظرونها وبعد وقت نزلوا والهنوف معهم على زغاريت الحريم
ام مشعل:بسم الله ما شاء الله الله يحميتس يابنيتي
وتقدموا الحريم وهم يعطونها هداياهم
غلا بابتسامه مدت للهنوف كيس هديه:مبروك يا الهنوف واعذرينا على القصور
الهنوف اخذته منها بابتسامه:الله يبارك فيتس وعقبال نردها لتس بالأفراح
طلال:احم احم
ام مشعل:سم يا طلال
طلال:وينها الهنوف
تقدمت رحاب وهي تلبس عباتها وشيلتها وتغطت وهي تطالع الهنوف ومسكت كفّها ومشوا لطلال اللي كان واقف عند الباب ينتظرها توقع
رحاب:وقعي
الهنوف وهي ماسكه القلم وترجف:وين اوقع
طلال ابتسم وهو يأشرلها:هنا؛ورفع نظره يطالعها؛ماتوقعت بيوم اشوفتس راكده كذا
الهنوف من دون نفس:ننننن
رحاب ضحكت وهي تطالع للهنوف اللي متوتره:ما مداك تمدحها حتى
الهنوف:اففف والله لاهج ان ماسكتوا ترا اللي فيني مكفيني
طلال تقدم يحضنها بعد ماوقعت:مبروك ياخيتي ولا تخافين دامه عازم
الهنوف بطيف ابتسامه:الله يبارك فيك والعقبال لك
طلال ضحك:امين امين يالله 5 دقايق واناديتس لاتروحين بعيد؛واخذ الدفتر وطلع
دخل عازم للمجلس وبعد كم دقيقه دخلت الهنوف بهدوء:السلام عليكم
عازم رفع نظره يطالعها بلع ريقه وهو يتذكرها ،هي نفسها اللي ذاك اليوم هي الهنوف:هلا وعليكم السلام والرحمه
جلست الهنوف وهي تطالعه بتمعن ومن طاحت عينها بعينه نزلت نظرها بتوتر
عازم وهو يطالعها:مبروك لنا يالهنوف ؛وأكمل وهو يحاول يقطع صمتها؛ادري انك مستحيه ومتوتره، بس وش الفايده من هذا كله لو سكتنا ، لا أنا استفدت ولا انتي ، ماتعرفنا على بعضنا وش ودك تعرفين عني
الهنوف بهمس:ياويلي وش بقول
عازم بعد طول صمت وقف ونطق:عموماً بخليك على راحتك ومتى ما بغيتي نتكلم عن الزواج واي شيء علميني واللي تبينه تبشرين فيه ؛ ولف عليها وأكمل؛ودعتك الله يالهنوف ؛وطلع
كانت الهنوف جالسه وبعد ماطلع رفعت يدها وهي تهف على وجهها من حست بحراره وتقدمت للشباك وهي تفتحه تحس الجو حار وبعد ما التقطت انفاسها رجعت لفت على مكانه اللي كان جالس فيه وهي تفكر بكلامه وكيف أنها كانت ساكته مانطقت إلا بالسلام اول مادخلت ومع ذلك كان يحاول فيها تتكلم ووقفت باعتدال بسبب توترها من درعم عليها طارق
طارق وهو يشوفها واقفه:وش بلاتس يالطيبه تحنطتي
الهنوف بتوتر:هاه؟ لا ولا شيء كنت بروح بدخل اصلاً بس قلت يمكن تبي شيء
طارق ضحك من عرف انها تكذب عليه وتقدم وهو يباركلها وبعدها دخلت
طارق وقف عند الباب وهو يتنحنح:يمه
ام مشعل جت عنده:هلا وش بغيت
طارق:ولا عليتس امر نادي رحاب ولا مها تجدد القهوه والشاهي
ام مشعل وهي تاخذ الصينيه منه:زين الحين نجددها ونجيبها بس تأكد من الغداء طولوا
طارق:ابشري الحين اتصل في مشعل اخليه يعجل؛وطلع جواله يتصل فيه
~~~~~~  •  •  •  •  •  ~~~~~~
-بعد 6 شهور-
في نهاية يومهم السعيد ولقاء الأحباب الوليد اخذ جوهرة وحمدان اخذ مشاعل وطايل وندى اجتمعوا
ابو حمدان وهو يودع حمدان:الله يستر عليك ياولدي ويبني بيتك وجعل اول ذرك ولد
حمدان وهو يحب يد ابوه:امين ، ودعتك الله؛وركب سيارته
ابو حمدان:توقع بالخط
ام حمدان:الحمدلله ان ربي عيشني لذا اليوم اللي اشوف فيه عيالي معرسين
ابو حمدان بابتسامه ماليها الحزن:والله وكبروا وكلن فتحله بيت؛وركبوا سيارتهم بعد ماودعوا طايل ومشى
كانت ساره طول الطريق هي تحاول تكتم بكيتها
ام حمدان بصدمه:سوير علامتس يابنت
ساره:ليه اعرسوا من احارش الحين بالبيت ياشين البيت من بعدهم فاضي
ابو حمدان:كلها كم يوم وبيجون اتركي الدلع عنتس
ام حمدان:الله يهديك يا ابو حمدان مب وقت كلامك الحين
~~~~~~ • • • • • ~~~~~~
<في بيت ابو مشعل الساعه 12AM>
بعد يومهم المرهق كانوا طارق ورحاب بجناحهم لان مامداهم يرجعون لبيتهم بسبب انهم رجعوا من الزواج بوقت متأخر وحلف عليهم ابو مشعل يجلسون عنده لين يجي الصبح وبعدها بكيفهم
صحت رحاب على ألم فضيع وصحّت طارق
رحاب:طارق ودني المستشفى ماني قادره أتحمل الوجع
طارق وهو يفتح عيونه بنعاس وخوف:وش فيتس بوش تحسين
رحاب:بطني ياطارق
طارق جلس بخوف وهو يمسك يدينها يهديها:اهدي مب صاير إلا كل خير يالله ببدل واوديتس اخلي امي تروح معنا؟
رحاب وهي تتقلب من الألم وتبكي:لا امي بسرعه ياطارق بموت
طارق قام بسرعه وهو يأخذ مفاتيحه ويلبس ثوبه واخذ عبايتها واعطاها وساعدها تلبسها ومسك يدها وطلعوا للسياره وبعد ماركبّها راح لبيت عمه ابو سعد
طارق وهو يطق الباب على ام سعد:ياخاله ، ياخاله ام سعد
ام سعد وهي تفتح الباب بخوف:طارق! وش جايبك هالوقت
طارق وهو خايف ومتوتر:اخذي عبايتس وتعالي
ام سعد:طارق وش بلاك انطق!
طارق:رحاب ياخاله تبيتس وبوديها المستشفى
ام سعد:ياقليبي يا بنيتي يالله دقيقه بجيب عبايتي واجيك انتظرني؛ودخلت بسرعه
الجوهرة وهي تطالع لامها تدور بالصاله ونطقت بخوف:وش فيتس يمه
ام سعد وهي متوتره:رحاب تعبانه وين عبايتي جيبيها!
قامت الجوهرة بسرعه وراحت تجيب عباية امها ومدتها لها:طمنيني عليها يمه
ام سعد وهي تلبس عبايتها وطلعت بسرعه:زين زين
جلست الجوهرة بعد ماقفلت امها الباب وهي خايفه على رحاب ولاهي عارفه وش فيها ومافهمت من امها إلا ان رحاب تعبانه
-انتهى✨