جيتي مثل الغيث والدنيا صحوه

Part 60

رجع ودخل للبيوت وهو يشوف بيتهم خالي ونزل وهو يسابق خطواته ويدعي مايكون اللي بباله وطق الباب بأقوى ماعنده:رححاااب رحاااب إذا تسمعيني اطلعيلي رحاااب!!
طلع ذيب من بيتهم:وش بلاك انت انهبلت؟ نبي نرقد مع المسلمين
طارق صارخ بوجه:ايه رح نمّ محد ماسكك ؛واكمل وهو يطق الباب
ذيب:لا حول ولا قوة إلا بالله البيت مابه احد يامسلم شالوا عفشهم وراحوا
للرياض
وقف طارق يطالعه بصدمه:متى راحوا؟
ذيب:قبل ساعه
راح يركض لسيارته طارق وركب وشغلها ومشى بسرعه صحت الكل من نومه من صوت الكفر وهو يحاول يمسك نفسه من جاه ألم بصدره ويحاول بكل مافيه يتجاهله حتى يوصل لهم واخذ جواله يتصل برحاب:ردي رديي!
؛ورجع اتصل مره ثانيه ولا ردت ورمى جواله بالمقعد اللي جمبه؛اف يارحاب اففف؛ولف يطالع المرايا اللي يساره وزاد سرعته لف لجواله من جاه اتصال وأخذه يرد عليه:وينك ياولد
طارق بصراخ:ليش ما مسكتهم ليشش خليتهم يروحون!!
مشعل:طارق هدّ وارجع البيت أتفاهم معك
طارق:ماني راجع إلا وهم معي ماني براججججعععع؛وقفل جواله بكبره
تنهد وتكى بذراعه على الباب وهو ساند راسه على يده ويطالع القمر اللي خذاه لبعييد خذاه لأول اعترافاتهم وأول سوالفهم يخيله وجهها النيّر اللي كما البدر ورده لواقعه السياره اللي شطفته من يسار ومعلقه على البوري لف الدركسون بقوه لجهة اليمين إلى أن ارتطم بعامود وحس بطعم الدم اللي ملأ فمه ووجهه وقام اول شي وهو يدور على عقدها اللي اخذه معه من باب الذكرى:وين راح؟! ؛ومسك رأسه وهو حاس بدوخه وألم فتح باب السياره ونزل وهو يكح وشغل الانوار الداخليه وقعد يدوره تحت المقاعد:وين طاح كان هنا! ؛وراح جهة باب المعاون وجلس يدور وفتح ادراج السياره يدور فيها لكن ماحصله ورفع التكايه اللي كانت موجودة بين المعاون والسايق وحصله طايح تحتها وأخذه وجلس وهو متكي ظهره على السيارة:أخيرًا اخخخخخ يارحاب اخخخ ؛رفع يده وهو يطالع العقد وماحس إلا ودموعه تخالط دمه
وقف احد الاشخاص ونزل من سيارته يركض من شاف الحادث:انت بخير؟؛ولكن ماحصل رد وتقدم لطارق يرفع رأسه واكمل؛ياخوي فيك شي؟
طارق:فيني علّةً مالها علاج
بسام وهو ماسكه يحاول يوقف طارق:قم تعال معي اوديك المستشفى
طارق وهو يسحب ذراعه منه:اتركني لازم الحقهم
بسام:يارجال امش معي بس بتموت وانت تهذري؛وركبه معه بسيارته ومشوا
~~~~~~.....~~~~~~
-بالسيارة-
بسام وهو يحاول يبقيه مصحصح معه لان فيه ضربه براسه بسبب الحادث ولو رقد ممكن تسببله مضاعفات:وش موصلك لهذي الحاله تهلك نفسك بنفسك
طارق وهو يطالع للطريق:
واهني اللي وصلها وذاق الزلال
‏رشفة مع غفلة الناس من فيها لفيه
يا أول أحلام الطفولة على حد الخيّال
‏الرجا بالي حمى البيت من حملة بريه
‏هيه ياللي غرك الحسن وأطغاك الجمال
‏والله ان أموت ما شفت لأوصافك شبيه
لو يُسام الحسن والتيه بجنيه وريال
‏ما بقى في سوق غيرك ريال ولا جنيه
‏ كيف أهدّك للمقادير وأنتِ راس مال
‏راس مال ومال والمال ما يُعطى السفيه
بسام نزل من وصلوا وجاب كرسي لطارق وفتح الباب:اسأل الله ان ينظر في أمرك؛ودخل للمستشفى وحطه بغرفة التنويم ووصى الممرضات عليه وراح يعبي بياناته ورجع له بعد مابدل
بسام تقدم وهو يفحص الجرح اللي براسه:اووه يبيلك غرز؛وكلم الممرضة تجيب له أدوات الخياطه
طارق وهو يحاول يميزه:طلعت دكتور وش اسمك
بسام:معك الدكتور بسام
طارق:مب غريبٍ علي اسمك
بسام ضحك بخفه:وصلت خير أنا اللي كنت ماسك حالتك...
طارق:ايييه ذكرتك؛وسكت من دخلت الممرضه ومعها أدوات الخياطه
تقدمت ساره وهي تنظف الجرح وبدا بسام بالغرز
شد طارق على يد بسام وهو يبعدها بألم:اخخخخخخ شوي شوي
بسام:يالله خلصنا اصبر شوي بس
طالعته ساره ونطقت بصدمه:طارق!
طارق رفع نظره لها بتعب:من انتي؟
بسام لف لها:تعرفينه؟
طارق وهو عرفها من تذكر صوتها:شلونتس يا ساره
ساره:الحمدلله، وش اللي صاير معك وراك كذا؟
~~~~~~.....~~~~~~
رحاب نزلت من وصلوا واتجهت لغرفتها ووقفت امام الشباك وهي تطالع للابراج وتسمع أصوات الشوارع اللي من المستحيل انها تفضى
مشاعل:رحاب!،يالله تعالي تعشي
رحاب وهي تطالعها:ماني مشتهي اتعشى ؛وأكملت وهي تتنهد؛بنطول هنا؟
مشاعل وهي سانده ظهرها بجمب الباب:مدري عن ابوي
دخلت أم سعد عليهم:تعشوا ثم رتبوا اغراضكم بالدواليب وناموا لاتسهرون
مشاعل:أبشري يمه
رحاب من طلعت أمها راحت لسريرها وانسدحت وهي تلتحف بالبطانيه
مشاعل مشت يمها وجلست وهي تسحب البطانيه عنها:اعرفتس مابعد نمتي
رحاب وهي تبكي ضمت مشاعل من شافتها فاتحه يدينها لها:أنا تعبت يامشاعل تعبت كل مازانت صار شي وتنكد كل شي مشاعل قوليلي وش أسوي تخيلي انه ابوي قايل له يطلقني وابوه بعد ليه هم مصرين يبعدوني عنه ليييه مستكثرين السعادة علينا حنا وش سوينا لهم ابي بس سبب واحد سبب واحد يكفيني والله لو يتركني طارق مدري وش يصير فيني مقدر بدونه والله العظيم مقدر أنا اتعب بمجرد أفكر انه يتركني شلون لو سواها والله اموت يامشاعل اموت!!!
مشاعل وهي تبكي معها وتمسح عليها:بتهون يارحاب بتهون صدقيني مستحيل طارق يسويها إنتي ماتعرفين طارق زين طارق يموت بارضتس اللي تمشين عليها ضنتس كلامهم بيأثر فيه؟
~~~~~~.....~~~~~~
<في بيت أبو ذيب>
ذيب وهو يلعب مع حمد:يقولون اليوم بالجلسه جاهم سالم
غلا:سالم؟ ليه وش دخله؟
ذيب:يقولون انه يعرف اللي ورا سالفة رحاب
غلا عقدت حواجبها وهي ترتب ملابس حمد:شلون؟
ذيب وهو يعطيها حمد:مدري خذيه نوميه بنام أنا وراي دوام الصباح؛وانسدح واعطاهم ظهره
اخذت غلا حمد وهي تحطه بسريره وشالت الملابس وانسدحت وهي تفكر وش دخل سالم برحاب إلى ان نامت
~~~~~~•••••~~~~~~
-بالمستشفى-
قام طارق بعد ماخلص المغذي واخذ جواله وأغراضه وكان بيطلع
دخل بسام:حصان ما شاء الله عليك
طارق ضحك بخفه:ماصدقت على الله يخلص برجع البيت
بسام:شلون بتروح؟انتظرني ابدل بس واجيك
جلس طارق بالممر وماسك جواله متردد يتصل عليها ولا لا واتصل على رحاب بس ماردت عليه وقام من شاف بسام جاي يمه
بسام وهو يمشي:طلعتك بس ها لازم بكره تمر علي عشان نشوف تخطيط القلب
طارق ابتسم:ان شاء الله على خير
بسام وهو يركب:وش بتسوي بسيارتك؟
طارق ركب:كلمت سطحه توديها للورشه لين متى مافضيت لها وصلحتها؛وحركوا للبيت
نزل طارق من وصلوا:مشكور يابسام ماقصرت جعل عمرك طويل
بسام:واجب ياخوي تأمر توصي
طارق:ابداً سلامتك؛ووقف لين شافه طلع من الديره ودخل للحوش وهو ماوده يشوف احد واخذ جواله من دق يصمته بربكه
مشعل:جيت؟
طارق:شفيك تدق هالوقت ياخوي
مشعل وهو يطالع للمواقف:وين موترك؟
طارق:بالورشه
مشعل وهو مايشوفه من المكان اللي واقفين فيه ظلام:ليه موديه الورشه؟
طارق وهو يسحب يد مشعل:مدها!
مشعل:شدها!
طارق:ونعم ياخوي طلبتك مالي خلق اشوف احد الايام هذي ابي سيارتك فتره بس امشي أموري فيها
مشعل:وش مسوي بسيارتك انطق؟
طارق:خلنا نروح مكان ثاني وأعلمك ماينفع بنص البيوت الجدران لها اذان
مشعل حك حاجبه:بس لازم تدف السياره معي لين الشارع عشان الصوت
طارق ضحك وهو يتألم من جرح راسه:احح تم ازهل؛وفعلاً دفوا السياره لين الشارع وركبوا وتحرك مشعل لمكانهم اللي متعودين عليه
مشعل:وش بلاه راسك يادافع البلاء
طارق:شطفني واحد مشرع بالطريق ولفيت عنه وصدمت
مشعل:صاحي انت؟ ورا مادقيت علي قلتلي
طارق:يارجال عدت بسيطه
مشعل:والله ياخوك ما كل مره تسلم الجره ؛ونزلوا من وصلوا
مشعل طلع دخانه واخذ وحده وشغلها وتكى على واجهة السيارة وطارق يمينه:غرد
طارق:اييه يامشعل وش تبيني اقول
مشعل:قلي وش مشغلن بالك
طارق تنهد وهو يطالع للمنحدر اللي قدامهم:من مشغلن بالي هالقضيه هذي لعبت فيني لعب كل ما ها عدلت شي زادت تعقيداتها
مشعل:مب وكلت محامي انت
طارق لف عليه:وش دراك؟
مشعل وهو ينفذ الدخان:الوليد قالي
تنهد طارق:ايه وكلت محامي لـ. .
مشعل:من وين لك فلوس المحامي انت؛واعتدل بوقفته؛لايكون بايعن سيارتك وقاعد تكذب علي؟
طارق وقف وهو يطالع مشعل اللي منفعل:هييه اهدى من كذا مابعتها قلت لك بالصناعيه واذا عن الفلوس يسرها ربي الحمدلله
مشعل:لايكون سارقها؟
طارق:اعوذ بالله،مشعل وش ذا التفكير المخرف؟
مشعل كتم ضحكته من رد طارق اللي كان معصب:اجل؟
طارق ناظره ورجع يناظر قدام:هذا انت مستحيل تتغير كل ماشكيت لك قعدت تضحك مررريض اقسم بالله
مشعل ضحك بقوه:خلاص يا طارق بتجيب اجلي انت
طارق ابتسم بانكسار:ما كلمت سعد؟
مشعل:إلا
لف طارق على مشعل بسرعه:وش قال؟
مشعل ابتسم ابتسامه واسعه:لهذي الدرجه يطيرك طاري احد من اهلها؟اسال الله ان ينظر في امرك
طارق وهو متكتف ومتكي ظهره على السياره اخذ نفس:
يامل قلب يسج وفيه دولاجه
‏من واهج ٍبالضماير قام يدرجها
‏مغير أهوجس تقول مضيّع ٍحاجه
‏واخذ وأسنّد على روحي وأهرجها
‏وادوج لو كان ما رجلي بدواجه
‏أدله النفس لين الله يفرجها
‏في معزل ٍعن كثير الخلق وازعاجه
‏ما سمع من الناس لو تكثر لجالجها
مشعل:لجالجها أنا اشهد
-انتهى✨
Insta:rwaaai0