يزيد :وين الصينيه ما اشوفها؟!
جمانه:يوه نسيتها الحين أجيبها ؛ورجعت بتدخل لكن أوقفها يزيد وهو يقول:روحي أنا بجيبها ؛ودخل
—————•••••—————
جمانه :الله ياخذتس يا الجوهره
<<فلاش باك>>
رشا:وش بلاتس تهرجين نفستس
جمانه :الزفت يزيد ما صدق على الله يشوف بنت كل شوي داخل طالع من عندها
رشا ضحكت:هههههههههههه تغارين عليه
جمانه :هههه يضحك مرره ؛وراحت عنها ولحقتها رشا
رشا:وش فيتس امزح ترا لاتزعلين مني
جمانه:ابي افتك منها قاهرتني هي وياه
رشا:عندي لتس فكره منها نفتك من مشاكلها ومنها تفتكين منها
جمانه:وش؟
رشا:عطيها جوالها تتواصل مع احد فيه بس بشرط ماتبلغ علينا وتهرب في وقت مايكونون الرجال فيه
جمانه:تتوقعين بتسمع كلامنا؟
رشا:ترا هي اللي كانت معنا الدافوره الهطف الجوهره اللي كنا نطقطق عليها والواضح انها ماتغيرت هههههههههههههههههههههههه
جمانه :شورتس وهداية الله
~~~~~~ • • • • • ~~~~~~
<عند حلا>
قامت تتجهز تروح للجامعه ونزلت:السلام عليكم
الكل:وعليكم السلام
ابو حلا:على وين؟
حلا :شفيك يبه نسيت بروح الجامعه
ابو حلا:مافيه جامعه
حلا:شلون يبه!
ابو حلا :كلامي ما اعيده مافيه يعني مافيه ويالله قومي على غرفتس
قامت حلا وراحت لغرفتها وهي تبكي
جوهره:حتى بالاوف ما اتهنى وش فيتس؟
حلا:ابوي مايبيني اروح للجامعه يا جوهره
جوهره:لاحول ولا قوة إلا بالله وش يحس فيه ذا يالله صباح خير
حلا:اففف شسوي الحين
جوهره:غيبي
حلا:مافيه غير ذا الحل؟
جوهره:فيه غيره بس ماراح تقدرين
حلا:وش؟
جوهره:تواجهينه
حلا:جوهره !تستهبلين صح؟
جوهره وهي ترجع تنسدح:ياليت اجل نامي
دخلت ندى:وش تسولفون فيه
حلا:ليتها سالفه
ندى:اجل وش؟
حلا:ابوي مب راضي يخليني اداوم
ندى:غيبي طيب ترا يوم مابيأثر
حلا:كلكم نفس التفكير مابي أغيب مامعي عذر!
ندى:طيب كلمي تركي يوديك
حلا:تتوقعين بيوديني؟ طيب لو درى ابوي؟
ندى:عادي خطيبتس وبيصير زوجتس بعد كم شهر
حلا:هو حتى شوفه ماخلانا نشوف بعض والله ان ينجلط هههههه
جوهره:الحسنه الوحيده ذا اليوم لو صارت
ندى:اعوذ بالله من قسوة القلب!
حلا:بكلمه واشوف ؛وارسلت لتركي :صاحي؟
تركي:مين؟
حلا:نسيت أرسلك من أمس أنا حلا
تركي:هلا والله كيفتس
حلا:الحمدلله بخير وانت كيفك؟
تركي:بخير امريني؟
حلا:مايامر عليك ظالم ابيك توصلني للجامعه إذا يمديك
تركي باستغراب من طلبها:تمام ربع ساعه وانا عندتس
حلا:بس عادي تجي من الباب اللي خلف البيت
تركي:ليش؟
حلا:مابي ابوي يشوفنا
تركي:ماعليتس منه اصلاً صرتي زوجتي باقي الزواج لاتنسين اني اقدر اخذتس بدون زواج بعد هههههههه بس لازم مابي نقصتس عن البنات شي
حلا:مابي مشاكل معه اساساً ماكان يبيني اداوم وشكله يبيني اترك الجامعه بعد
تركي:مب على كيفه ولو قالتس كذا علميني دراستس بتكملينها يعني بتكملينها ولو رفض بقدم الزواج عشان اخذتس تكملينها عندي
حلا ابتسمت:تمام اجل انتظرك؛وقفلت جوالها
ندى:عسى دوم وش قال؟
حلا:بيجي
ندى:قلتي له يجي من الباب الخلفي؟
حلا:ايه ابوي موجود؟
ندى طلت من الشباك :لا تو طلع بيمشي
حلا:الحمدلله؛وقامت تتجهز
بعد ربع ساعه عند تركي طلع جواله وارسل لحلا:انزلي وصلت
حلا:ثواني وانا عندك ؛ونزلت
بالصاله كانت ام حلا جالسه:حلا على وين يا امي؟
حلا:هلا يمه ؛وراحت تسلم عليها قبل تطلع؛بروح للجامعه تركي بيوديني
ام حلا:زين بحفظ الرحمن؛وطلعت حلا وركبت السياره
تركي:تو مانورت السياره وزانت ياهلا
حلا ابتسمت بخجل:بنورك
تركي:كيفتس
حلا:تمام انت كيفك؟
تركي حرك السياره:بخير الحمدلله كيف الدراسه معتس
وقعدوا يسولفون
تركي وقف عند كفي ولف لحلا يسألها:وش قهوتك؟
حلا:امريكانو
تركي:حار ولا بارد؟
حلا:حار
تركي طلب مشروباتهم وأخذ الطلب ومد الكوب لحلا:سمي هذي قهوتس
حلا:سم الله عدوك؛واكملوا طريقهم للجامعه
<الساعه1:30PMفي بيت ابو مشعل >
اجتمعوا مشعل وطارق وطلال والهنوف بعد ماعلمهم طلال بغرفة العيال
مشعل:الهنوف رجاءًا مانبي احد يعرف عن شي وماتقولين لاحد لان لو وصل طرف خيط لاحد ممكن تكبر المشكله
الهنوف:والله ما قلت لاحد خلونا نبدا الوقت راح
طلال وهو متقروش:ذيب من اليوم يدق!
مشعل:لاترد عليه قفل جوالك مره وحده
طلال نفذ كلام مشعل:دن
طارق وهو يطالع مع مشعل باللابتوب :الهنوف عطيني رقم الجوهره
الهنوف طلعت جوالها وبدت تمليهم الرقم
مشعل فز بفرح:طلعلي موقعههااا
طارق:حلو حلو احفظه احتياط لو طفى جوالها ولا شي
طلال اخذ اللابتوب وهو يحفظ الموقع
الهنوف بحزن:يعني كلكم بتسافرون؟
طارق:ايه
الهنوف :كم يوم بتجلسون هناك؟
طارق ضحك:ههههههههههههههههههههههههه ماحنا جالسين هناك على طول بنجي بس إذا جاكم ذيب ولا احد وسأل عنا قولوا طلعوا للمزرعه مدري العزبه لاتحددين جوابتس
الهنوف:طيب بس كل شوي دقو علي ولا ارسلولي وش يصير معكم
طلال:ابشري من عيوني ؛ولف لطارق ومشعل؛يلا خلونا ننزل قبل احد يشك
وطلعوا كلهم ينزلون يتغدون
<الساعه 2PM>
كانوا كلهم مجتمعين بالصاله
طارق ارسل لـ الهنوف:هنوفي حاولي تخلينهم يروحون عشان يمدي نطلع
الهنوف بصوت مسموع وبتمثيل انها نعسانه: أنا بروح اخذلي قيلوله تعبانه مره
ام مشعل:والله حتى أنا ؛وقاموا لغرفهم
ابو مشعل انسدح على الكنب :لا إله إلا الله؛وحط شماغه على وجهه ونام
طلال قام وراح للغرفه ياخذ الشنطه وجهازه وطلع للسياره وهو يمشي على أطراف رجوله مشعل قام وبعده طارق اخذ مشعل مفاتيحه وركض للسياره وطارق كان يحبي لان ابوه كان يتحرك
ابو مشعل جلس وهو يهاوش:ولد! وش عندك متبطح بهالارض
طارق وقف وهو يمسك جيوبه:هـ . هلا يبه لابس جوالي طاح تحت الكنب وجلست أدوره كمل نومتك أنا بطلع شكلي أزعجتك
ابو مشعل:يالله رح؛ورجع ينام
طلع طارق وهو يركض ونسى نعوله وجلس ينط من حرارة الشمس في رجوله :احححح ؛وفتح باب السياره وركب :ياعيال اللي ماني قايل ليه تسحبون علي؛وطق مشعل على كتفه وبعدها شغل المكيف وحط رجوله عليه
مشعل:وش فيك؟
طارق ضحك:هههههههههههههههه شافني ابوي وانا منبطح بالارض كله منك صحيته ونحشت وقفطني أنا وهاوشني
مشعل ضحك:ههههههههههههههه لدرجة نسيت حذيانك وجيت
طارق:حذيانك موجوده؛وأخذ شوز ابيض ولبسه
مشعل طقه:ياحمار إلا ذا حتى أنا مالبسته شاريه جديد
طارق:ههههههههههههههههه خله يتبارك؛ودف يد مشعل عنه
مشعل:ولد نزله!
طارق: هههههههههههههههه ماني منزله
طلال صارخ ولف يطقهم:ولد انت وياه ! الرحله بتروح وانتم تطاقون على شوز
مشعل عدل جلسته ولف قدام وحرك السياره للمطار :أوريك بعدين
<في بيت ابو ذيب>
دخل ذيب واهله كانوا مجتمعين بالصاله ووقفوا اول مادخل ذيب
ابو ذيب:حي الله ذيب الحمدلله على السلامه؛وناظر ورا ذيب واكمل؛وين مرتك؟!
ذيب بتوتر:عند أهلها
ابو ذيب:عسى ما شر قايل لمرتك شي مزعلها؟
ذيب:يبه تراني جاي من سفر وتعبان بطلع فوق ارتاح؛وسلم عليهم وطلع لغرفته على طول
ام ذيب:لاحول ولا قوة إلا بالله وش بلاه الولد
ابو ذيب:مصيرنا بنعرف خليه بس يقوم
لميس وميس التزموا الصمت وهم مستغربين أسلوب ذيب اللي تغير فجأه
-انتهى🦋✨-
أنت تقرأ
جيتي مثل الغيث والدنيا صحوه
Mystère / Thriller> رواية تجمع مابين أجواء الديرة والحب الشريف العفيف والأكشن تبتدي قصة الأبطال من طفولتهم وتجمعاتهم في صغرهم وكبرو وكبرت معهم مشاعرهم اللي كانت متبادله للبعض والبعض الآخر لا وتصادفهم مشاكل وصدف هل بتستمر مشاعرهم أم لا ؟ . . . هذا ما ستعرفونه من قرا...
