Poems - Tula (Book 1) Published by: Ukiyoto

"Kay Uman Dajun"

Kasagaran sa mga ulitawo ug dyaga kuman
Waya nay kahadlokan
Labi na pagmakita nan away
Grabe dajon magpahambugerohay.

Maski nasakitan na
Di gihapon magpahalata
Pasumangil dajun pa waya-waya
Am baja kay an mata mo luha.

Labi na kun uyab an hisgutan
Halos tanan makalimtan
Magpahilum-hilom na dajun
Pero an kasing kasing kagawason.

Igo ra mo laong "Uman dajun
Kun amu ako ini
Umay labot nijo
Ya man kamu mahibayo".

Sus gajod loy/day
Pagkapilosopo rakan
Di kaw motuo sa mga tambag
Kay an imo ra an matuman.

Isahay di mo sila masabtan
Lahi-lahi man gud an mga batasan
May mga pasaway
Sanan may hilig makig-away.

Kun sa pag eskwela sab an hisgutan
Pagkahilig rakan gajud mo lakwatsa
Di mo suyod sa eskwela
Kay jadto sa barkada nakigtagay
Iban an mga klasmeyt na pasaway.

Mag problema raba dajun pag ting exam na
Ya nay maibajad kay hurot na an kwarta
Parahubog man lage
Amo jaun pirme rakan mag promi.

Pero kun si Tatay ug Nanay makahibayo
Labi na makadawat nan grado na yay klaro
Ajaw rakan pagpakita
Kay bun-og ray im makuha.

Amo kay di man magtarong pag eskwela
Imbes kay jaun sila nagsuporta
Amo loy/day kay ato ra man tag baliwaya
Kuman igo rakan ta mag tanga.

Kuman loy/day ya na man kaw tagpa eskwela
Kay amu ra man gihap matod pa nila
Basin aja ra kaw mo laong sa ila
"Kay uman dajun di man kun kamu an mag problema".

- April 26, 2008