Poems - Tula (Book 1) Published by: Ukiyoto

"Gibati'g Kaanyag"

(Visaya Version)

Ako ang bituon sa langit nga naga sidlak-sidlak
Ako ang humot simhuton nga bulak
Ug ang Anghel sa langit nga walay ampak
Apan ang akong kaanyag sama sa diyamante nga naga silak-silak
Ug panigurado tanang lalaki mo hilak kung di maka hikap.

Ako ang aninipot sa matahum nga kagabhion
Ang suga sa dalan nga dapat nimong sundon
Ug ako ang birhen nga sayon kab-uton
Tanan nimong mga pangamuyo akong tumanon
Basta ang atong sabot di lang nimo pakyason.

Walay makalabaw sa akong pagka gwapa
Labi na sa akong kustis nga murag artista
Ug sa akong lawas nga sama sa coca-cola
Asa pa ka ana? Di ka kaha matumba?
Busa ayaw'g tan-aw sa akoa kay basig madasmagan ka.

Mao nang mura kag irong buang
Pirme mag laway kung ako masimhutan
Ayaw'g palabi kay basig wa nay laway imong tutunlan
Di madugay ikaw ray ma but-ukan
Basig uroy sa ospital ka mabuntagan.

Bitaw, ayaw nalang diha ug palag
Sa karon gibati ra kog kaanyag
Di bitaw ko gwapa pero ako ang uso
Naa ra sa imo kung di ka motuo
Basta kadaghanan maoy sulti nila sa ako.

Hay! Kaanindot unta sa kinabuhi
Malipayon ka maski walay laki
Importante dawat nimu kung kinsa ka
Kay ang tanang butang mangahanaw ra
Bahalag wala'y kwarta basta nag uros-uros ang ka gwapa.

- January 13, 2018