ပြိုမယ်မိုးလေး မသည်းစေလို.....

Final (Uni & Zawgyi)

Warning 20+.......

...............

ကျားကြီးဆိုသည့် အဖမ်းခံလာသည့် ထိုလူ၏ဝန်ခံချက်များကြောင့် မမအားသတ်ခဲ့သည့် လူသတ်မှု၊ အစောအား လိင်သုံ့ပန်းအဖြစ်ရောင်းဝယ်၊ငှားခဲ့သည့်အမှု၊ ဆေးရုံ မီးလောင်မှုတွင် ငွေယူကာကြံစည်မှု၊ ရဝေ့ကို သတ်ဖြတ်မှုနှင့်အတူ
လူသေအောင်ကြံစည်မှု၊ များစွာသောအမှုတွေဖြင့်
ထောင်ဒဏ် တစ်သက်တစ်ကျွန်းလောက်တော့ကြမည်မှာအသေအချာပင်။ အစော ကိုတော့ ခိုင်းစေ၊ကြိုးကိုင်မှုတွေဖြင့် ကျွန်တော်ကိုယ်တိုင်တရားစွဲဆိုမည်။

'မင်းကိုလဲ တစ်သက်လုံးခွင့်မလွှတ်ဘူး အစော.....
မင်းကိုလဲထောင်ထဲထည့်မယ်.......'

ကားကိုအိမ်စင်ဝင်အောက်တွင် ရပ်ပြီးနောက် လမင်းလေးအခန်းရှိရာသို့ တက်လာလိုက်သည်။

.......

မောင် အခန်းထဲဝင်လာသည်ကို တံခါးသံကြားရသည်ကြောင့် လမင်းသိလိုက်သည်။ နာရီကိုလှမ်းကြည့်မိတော့ ည၁၀နာရီထိုးနေလေပြီ။ လမင်းအား ပွေ့ချီပြီး လမင်း၏
အိပ်ယာဘက်အခြမ်းသို့ပို့ပေးသည်။

"နိုးသွားတာလား ကလေး....."

ခေါင်းလေးခါပြသည့်ကလေးငယ်အားကြည့်ကာ မျက်ရည်များဝဲတက်လာသည်ကို ထိန်းလိုက်သည်။
ညမီးအိမ်၏အလင်း ဖျော့ဖျော့လေးအောက် ထိုမျက်ရည်များအား လမင်းမမြင်ပါစေနဲ့ဟု ဆုတောင်းရင်း
အကြောများအလုပ်ကောင်းကောင်းမလုပ်သေးသည့် ကလေးငယ်အား ပွေ့ဖက်ကာရင်ခွင်ထဲထည့်ပြီး အိပ်မောကြစေရန် ကျောလေးအား ပွတ်သပ်ပေးနေမိသည်။

ကျွန်တော့်မျက်ရည်များကတော့ တာကျိုးခဲ့သည့် ဆည်အလား အဆက်မပြတ်စီးဆင်းနေတော့သည်။
အရာအားလုံးသည် ကျွန်တော့်ကြောင့်ဟု ခေါင်းစဥ်တပ်ကြမည်ဆိုလျှင် နိဂုံးတွင်လည်း အနှစ်ချုပ်အနေဖြင့်
ပါဝင်သင့်သည်မဟုတ်လား။

'မင်းကိုခွင့်မလွှတ်ဘူး စောမင်းရန်....'

ရင်နာရသည်။ အချစ်ဆုံးသူငယ်ချင်း၊ အယုံကြည်ရဆုံးသောလူတစ်ဦးသည်က နောက်ကျောမှဓားဖြင့်ထိုးနေသည်ကို ပြုံးပြုံးကြီးနှင့် ခံနေခဲ့ရသည့်အဖြစ်။