أسيرة في موطنك (مكتملة)

البارت الرابع

مساء الخير أحبتي 💕
اتمنى لكم قراءه ممتعه

بقلم: زهراء البياتي

ريم..اني هنا بسرعه خفت..الاعرفه عمهم بديالي عايش
و يشتغل هناك..معقوله اسراء حتعوفني و تروح و اني ابقه هنا بدونها؟!
أمينه..يلا انزل اسوي ريوك
اسراء..اروح فدوه لاحلى بيبيه تجي من الصبح تبشرني
أمينه..انتي و هدى اثنينجن روحي من الدنيا
اسراء..فدوه لكلبج

طلعت الحجيه أمينه
و باوعت ع اسراء
ريم..اسراء ليش شنو حتروحين لديالى و تعوفيني
هيه عكدت حواجبها
اسراء..وين اعوفج انتي هم تجين ويانا

استغربت
ريم..شلون اجي
اسراء..مو اصلا احنه اصلنا يرجع لديالى و جدو و بيبي جانو عايشين هناك و بابا و عمو سعدون هم هناك انولدو..بس وراهه انتقلو لبغداد
ريم..عمج سعدون هو الي بديالى؟

اسراء..اي هو نفسه..عمو سعدون مكدر يتأقلم رجع لديالى و بابا بقه هنا و بيبي بقت يمه
بس من تقريبا ست سنوات احنه جنه مقررين نرجع لديالى..لان عمو سعدون ماشالله هناك عنده بستان شكبراته لو تشوفي تتخبلين و عنده معمل مال اقمشه و خياطين بي يعني حالته كولش زينه.. بيبي و بابا اتفقو ويا عمو سعدون يبنينا بيت يم البستان مالته يلا نرجع و طبعا بابا هناك يستلم و يساعد عمو سعدون بمعمل الاقمشه ..واحنه نعتبره ابونا الجبير و كلنا نحبه لان شايل كلب طيب..صدك هو شوي عصبي و متشدد بس يبقى احن انسان

فتحت حلكي
ريم..يعني اني هم اروح وياكم لديالى
اسراء..اي لان نفس مكتلج عمو كمل البناء مال البيت و امج هم تروح ويانا قابل تبقين بغداد
من حجت هيج انعصر كلبي..يعني معقوله حعوف خواتي
دخلت هدى و امها..لان هدى شاكيه لامها ع مشط و اجت خاله خلود ترزل اسراء

اني بقيت طول اليوم بس افكر شلون حعوف خواتي هو اني اذا هسه بالشهر مره اشوفهن شلون اذا اروح هناك

شلت شعري ذيل حصان عالي و عدلت ياخه القميص
و دنكت مسحت حذائي بوصله مبلله حته يطلع يلمع
حطيت الجنطه ع كتفي و طلعت وره اسراء و هدى

نزلنا ٣ و اتلكتنا الحجيه أمينه
أمينه..هلا هلا يلا تعالن اتريكن
تحجي و تباوع ع هدى و اسراء..اني حته متباوع عليه
دخلنا للمطبخ و اني رحت كعدت اخذت صمونه حطيت جبن و طماطه و خيار و شوي عسل و سديت الصمونه و اخذت كلينسه و لفيتها الصمونه من جوه و كمت اكل
اسراء هزت ايدها
..يعني اكلي يدون هل ترتيب و النزاكه
ابتسمت

و الحجيه أمينه باوعتلي صفح
أمينه..نفس امها
مجاوبتها ضليت اكل باللفه و اسراء تسوي لكم و تاكل و توكع ع ميز و هدى هم نفس الشي و المشكله اني ما اتحمل اشوف هيج بدي اكوم هسه انظف الميز و انطيهن لفات نفس لفتي..اخذت نفس و صبرت روحي..درت وجهي ع طباخ حته ما اباوع عليهن

اسراء..يلا امشو تره تأخرنا
بسرعه كمت لفيت اللفه بجيس و حطيتها بالجنطه
و رحت اغسل ايدي و اسراء تعيط عليه
ريم..اي اي جايه
سديت المي و اخذت كلينكس كمت انشف بأيدي و اركض وراهن