أسيرة في موطنك (مكتملة)

البارت الخمسون

مساء الخير احبتي
اتمنى لكم قراءة ممتعه❤

بقلم: زهراء البياتي

من اليوم بعد اي وحده اشوفها بالتعليقات تغلط عليه اني و تسب بعد ما اسكت بسرعه بلوك و احضرهه من التعليق بالقصه🖤
اما النقد المحترم و بأسلوب راقي ع راسي❤

ريم..عوفني عمو
جريت ايدي و هو بلحضه سريعه.. صار كدامي كولش
و لزم وجهي بأيده الاثنين..و تقرب مني عسريع و باسني من شفايفي.

انصدمت و ضليت مجمده بمكاني.. بس من استوعبت الأني بي.. بسرعه دفعته من صدره و فتحت حلكي مستغربه
اباوع علي و لا عبالك اكو شي..طلع باكبت الجكاير حته يورث.
حجيت بصوت يرجف
ريم..هاي شسووويت شسوويت؟!
حط الجكاره بحلكه و اخذ الجداحه يشعلها.. و يحجي وياي
قاسم..مسويت شي.. وخر الجكاره و باوع عليه
حبيت اذكرج انتي ع ذمتي

دمعت عيوني و بسرعه عفته و طلعت من المطبخ و جسمي كله يرجف.. رحت صعدت فوك للحمام..دخلت و رحت غسلت وجهي ٣ مرات.. و اني اغسل دموعي تنزل
رفعت  راسي و باوعت ع روحي بالمرايا.
حجيت بيني و بين نفسي
دتلعب نفسي منهم.. كلهم كلهم واحد واحد ديستخدمني عبالك لعبه مو انسانه عدها احاسيس و مشاعر  .. يلعبون بيه نفس ما همه يردون.. من حمزه لعمو قاسم.. و اني اني شنو؟! اني محد مهتم لأمري و لا لمشاعري اني مجرد لعبه بأيدهم.

سديت المي و طلعت من الحمام.. رحت للغرفه اول مدخلت و شفت حمودي اجت ع بالي اسراء الله يرحمها
رجعت دموعي تنزل ع خدي.. رحت ع كيف و نمت بالفراش ع ضهري.. احس من اشوف شكله لحمودي داشوف اسراء دتعاتبني. ضليت اتكلب بالفراش و مأجاني نوم.. و بس افكر و ارجع ابجي.. ماعرف شسوي احس عقلي كله متخربط.. من جهه حمزه الخربطلي كل مشاعري و من جهه عمو قاسم الصرت اخاف منه.. وعدني ميتقرب و بعدنا ممزوجين و خلف بوعده اذا اتزوجه لعد شلون.احس صايره ما أمن بأي بشر كلهم جذابين و كلهم يمشون وره مصالحهم.

ضليت للفجر بالفراش بس اتكلب..لحد منعست و نمت
و كعدت ثاني يوم للدوام بلكوه.. اجر بروحي جر.. و عيوني افتحهن و يرجعن ينسدن.. رحت غسلت و رجعت لبست القميص الابيض و الصدريه و الجواريب و شلت شعري كبايه.. و لفيت الحجاب عدل.. اخذت الجنطه و كمت تشوف الجدول و احط بالكتب و اطلع الكتب الماريدهن.. رجعت سديتها و حطيتها ع كتفي.. باوعت ع حمودي نايم و فاتح ايدينه اثنينهن و فاتح حلكه.. ابتسمت ع شكله و رحت غطيته زين و بسته من خده ع كيف.

طلعت من الغرفه.. اخذت نفس و بكلبي كلت راح اكدر اواجهه كلشي و ما اتأذه لان المريت بي هم مو سهل و كدرت اتعايش ويا كل الضروف الصعبه..و هسه هم حرجع اتعايش ويا ضروفي لحد متجي رحمه الله عليه
نزلت جوه و رحت للمطبخ سويتلي لفه جبن و خاله خلود سألتني
..يمه اصبلج جاي
ريم..لا خاله ماريد.. حطيت اللفه بالجنطه و هيه حجت بتنهيده
خلود..شكد جنت اتمنى الغبره هدى تكمل دراستها بس حضي بعد
باوعت عليها و ابتسمت ابتسامه خفيفه
ريم..يمكن ترجع تكمل خارجي
خلود..لا يا خارجي اني اعرف بنتي.. حاده سنونها ع دراسه متتحمل تلزم كتاب بأيدهه.. عكس المرحومه اسراء..سوده عليا جانت تقره من الصبح للمغرب.
ريم..الله يرحمها