أسيرة في موطنك (مكتملة)

البارت ٦٩

مساء الخير احبتي
اتمنى لكم قراءه ممتعه

بقلم: زهراء البياتي

ريم..يممممه برااااااء
رحت دنكت و كمت احرك براسها
براء براء فتحي عينج
فتحت عينها ع كيف و رجعت سدتهن.

من شفتها هيج تخبلت..كمت من مكاني عسريع و رحت للمطبخ ركض و الجهال يبجون و يعيطون.
اخذت التلفون و دكبت ع قاسم بسرعه..ايدي جانت ترجف و جسمي كله..خايفه عليها.. لا يصير بيها شي و بالطفل.
قاسم..الو حبيبتي
شهكت بجي و هو بسرعه عاط
قاسم..شكووووو شببيج
حجيت بصوت يرجف
ريم.قااا..قاسم برراء براء..وكعت وك..وكعت من الدرج
حب..حباب تعال .بس..بسر..بسرعه
قاسم..على كيف حبيبتي..جاي..هسه دقايق و اوصل يمكم.
سده و اني شمرت التلفون و رجعت ركض اباوع عليها تنزق هواي.. كمت ادك ع رجلي و ابجي بحركه.

مطول قاسم عليه.. بسرعه اجه..و دخل للبيت و هو مخروع
بسرعه صاحني اجيب عبايه.. صعدت فوك اخذت عبايتي و نزلت..غطيتها بالعبايه شلون مجان و قاسم بلكوه شالها لان حامل جانت و ثكيله..جان يمشي عسريع و اني وراه امشي و ابجي
ريم..قاسم اجي وياك
قاسم..ابقي يم الجهال انتي
صعدهه بالسياره..و رجع باوع عليه يهدي بيه
قاسم..مابيها شي انشالله..بس اهدي انتي و رجعي يم الجهال.
ريم..اي اي بسرعه اخذها للمستشفى بسرعه

هز راسه و راح صعد بالسياره و اني حاطه ايدي ع وجهي و ابجي.. طلع من الكراج و كعدت افتر ع طول الكراج ادعيلها و ابجي.. بالاخير حسيت رجلي كامت متشيلني..دخلت و كعدت بالكليدور..لزمت راسي بوجع و ضليت ابجي.. و بناتها يمي يعطون و يبجون.

مسكتتهم و لا شي البيه مكفينيو كل بالي يمها..بس الطفله الصغيره انطيتها ممه و وراهه
رحت للمطبخ..كعدت ع كرسي و اني لازمه التلفون
و ايدي ترجف..خابرت على قاسم مجاوب.. رجعت انتظره يخابر و اباوع ع ساعه بخوف.
مرت بالساعتين و نص و ماكو اي اتصال منه.. رجعت دكيت و اني ابجي و امسح بدموعي
جاوبني بسرعه و اني فزيت
قاسم..الو
ريم..ها شصار قاسم طمني
قاسم..اختج مابيها شي.. لتخافين
جريت نفس براحه و حطيت ايدي ع كلبي
قاسم..بس سقطت

حطيت ايدي ع حلكي بصدمه
قاسم..اهم شي طلعت هيه بالسلامه.. ليضل بالج انتي
وخرت ايدي و هزيت راسي
ريم..الحمدالله..المهم هيه بخير..وينها هسه هيه
قاسم..خابرت قبل نص ساعه امج و اجت يمها.. و قبل شوي طلعت من العنايه و حطوها بغرفه..و امج يمها يعني ليضل بالج
ريم..عنايه؟
قاسم..اي جانت حالتها خطره كلش..هواي نازفه و الوكعه وكاعتها ع البطن.
ريم..يصير اجي اني هم اشوفها
قاسم..وين تجين.. امج يمها. ديحجي و انكطع الخط
باوعت ع تلفون و اخذت نفس

رجعت اباوع كدامي
اكيد انقهرت من عرفت سقطت بتها.. مسحت دموعي و كمت ع كيف رحت يم الجهال.. طمنت الجبيره ع امها و كتلها يومين و تجي.. رجعت سويتلهم عشى.. و كعدتهم يتعشون.
الساعه بالعشره بليل..اندك الباب.. بسرعه ركضت
فتحته و شفت قاسم
جان تعبان كلش
ريم..رجعت
هز راسه و دخل للبيت و هو ينزع بحذائه
ريم..و براء
قاسم..امج يمها حتبات
ريم..شلونها
قاسم..مابيها شي زينه..حته من عرفت سقطت مضاجت
كالها و هو يمشي بتعب للدرج
الجهال وين
ضليت صافنه شلون مضاجت..فزيت من الصفنه و كتله
ريم..ديباعون كارتون