أسيرة في موطنك (مكتملة)

البارت السابع و الخمسون

مساء الخير احبتي
اتمنى لكم قراءه ممتعه ❤

بقلم:زهراء البياتي

ريم..اجه تقرب مني..اني بسرعه دنكت راسي بخوف
هو اجه..جرني من معصم ايدي و اخذني للباب..فتحه دفعني ع كيف
قاسم..طلعي..ماريد اشوف وجهج
سد الباب حيل بوجهي و اني بقيت صافنه.

درت وجهي و لكيت ماما متخصره يم الدرج
و كاعد تنتنظرني.. جريت نفس بصبر و رحت للغرفه و هيه اجت وراي.
دخلت و بسرعه نترت بيه
حليمه..شمسويه
ريم..ممسويه شي
حليمه..احجي
ريم..ماما مالي خلك
حليمه..احجي يمصخمه الرجال ليش هيج فاير..يريد ينفجر بالاكل احجي شمسويه

مددت بفراشي و اخذت الريموت اكلب
اجت هيه تخذت الريموت و نترت بيه
ريم..شمسويه
اخذت نفس
باوعت عليها و شفتها عصبيه و تريد تنتظر مني احجيلها.
من شفتها هيج كلتلها كولشي شلون بيبي امينه اجت و طلبت مني اشوفه لحمزه.. و رحت و حجيت ويا.
هيه من سمعت ضلت تلطم ع جلهه
حليمه..عفيه عفيه.صخام الصخمج..عفيه عليج زين سويتي والله.. اني اريد افتهم عقلج شبي.. اريد افتح عقلج اشوف شبي..شلوووون تمشين وره امينه..مكلتي راح اكيد تكله.. شلوووووون ولج هاي شوكت اتمنت الج الخير حته تأمنين بيها.

باوعت عليها
ريم..اني ممتندمه ابد..و لو يرجع الوكت هم اروح و اشوفه.. اني مغلطانه.. اني ردت اخلي نهايه بيناتنا
ردت اريح نفسي و احجي البكلبي.
حليمه..بدون علم زوجج
ريم..لو كايله لقاسم.. تتوقعين حيقبل
حليمه..لا اكيد
ريم..هذا هو خلص اني عرفت لو كايلتله جان هم مقبل
لهذا مكتله
حليمه..حقه ميقبل حقه.. وين اكو واحد يقبل زوجته تروح تلتقي بطليقها
ريم..ليش دتحسسوني رحت لبيته هو من الباب.

حليمه..صخام الصخمج..صخام الصخمج.. و نوب مصره ع كلامج..ولج يمكن اصلا باجر يطلكج الرجال ع سوايتج
ريم..خلي يطلك
حليمه..اي و وراهه ترجعين لقصرج الدينتظرج.. هو اذا يطلكج وين نولي يمعزايه..وين نولي نرجع للشوارع نكدي
انتي غبييييييه بدال متتمسكين بي دتضيعي من ايدج
اني خلص كلبي منج.. وشيسوي بيج قاسم تستاهلين
دارت وجهه و طلعت من الغرفه بعصبيه

رجعت راسي ع مخده و غمضت عيوني بتعب
شوي و دخلت هدى تباوع عليه بفضول
هدى..شصاير شكو شبي قاسم وياج
جريت نفس
ريم..ماكو شي
هدى..شنو ماكو شي..انتي ليش متحجيلي كولشي
ريم..هدى تعبانه والله و مالي خلكج
هدى..تدرين هو مو صوجج صوجي اني الاحجي وياج
رجعت طلعت من الغرفه.. و اني لفلفت روحي باللحاف
و نمت

ثاني يوم كعدت الصبح..غسلت و شلت شعري عالي.
و نزلت جوه.. دخلت للمطبخ..شفت الكل كاعد يتريك ماعدا قاسم و عمو سعدون بالشغل.
خاله خلود بسرعه من شافتني سألتني
خلود..صباح الخير يمه.. خير شصاير بارحه..اكو شي؟
ريم..صباح النور خاله..لا ماكو شي
اباوع ع بيبي امينه تشرب بالجاي و هيه مبتسمه
خلود..تعاي تريكي