أسيرة في موطنك (مكتملة)

البارت السابع

مساء الخير أحبتي
أتمنى لكم قراءه ممتعه

بقلم: زهراء البياتي

ريم..مرت الايام و الايام صارت اشهر..اتعودت ع حياتي بديالى..بقيت على نفس نمط حياتي متغير شي..اسراء بقت اعز صديقاتي و اعتبرها اختي و هدى مرات اصير صديقه و مرات عدوه..التغير بالايام و الأشهر هو المشاكل..قبل جانت المشاكل بين ماما و بيبي أمينه و خاله خلود هسه صارت المشاكل ويا الجده الفوزيه
لان كولش كارهه ماما و مطايقتها بالبيت..حته خاله صبا تكرها
جنت دائما اروح واكول لماما واتوسل بيها تتجنب المشاكل بس متسمع مني..تضل تعارك منا و منا
لحد متعبت منها و  ضليت بس اباوع عليها

مره من المشاكل ضلت تلح ع عمو خالد يجيبلي جربايه و هدى مقبلت لان تكول الغرفه اصير محلو..وهنا ماما صارت عصبيه و ضلت تعيط ع هدى و طبعا جده فوزيه ادخلت و صارت مكافش..لحد ما بالاخير اني كتلهم ماريد جربايه مرتاحه ع كاع..يلا سكتو..بس ماما اجت وراهه ضلت تحجي عليه لان تريدني نفسها اضل اعارك..بس شسوي ماتحمل المشاكل و اتجنبها بقدر المستطاع

اسراء هيه و قاسم نفس عصافير الحب
دائما الخميس تأخذني و نطلع بالختله للبساتين..تبقه هيه و قاسم بالساعه و نص و نرجع للبيت

بس بأخر فتره كامت متشوفه هواي بسبب الدراسه
لان كمنا نداوم بديالى..و هيه سادس فحبست نفسها تدرس و اني هم لان سادس ابتدائي..اما هدى هم نفسي بس ضاربه الدراسه بعرض الحايط

امتحنا اني و هدى و عطلنا..و بقت اسراء تدرس لان وره شهر امتحاناتها
اني و هدى وره ٣ اسابيع و طلعت النتائج..و اني طلعت ناجحه و معدلي بالتسعين و هيه رسبت للمره الثانيه
بيومها خاله خلود كلبت الدنيا ع هدى..و ضربتها كدام الكل..و الكل ضل يلوم بيها و يغلط عليها..جانو كولش مقهورين عليها.. بحيث حته بنجاحي مباركولي..اسمعهم  بس يعيروها بيه و يصيحون بت حليمه نجحت و انتي لا

بس اسراء فرحت لنجاحي و بنص دراستها و تعبها
كامت و سوتلي كيكه و حطت شمعه
و اني من شفت الكيكه البسيطه و فرحتها الي عندي هل شي يسوى الدنيا كلها

بس بكل ضحكه اضحكهه اذكر خواتي..كلبي نار عليهن
اتمنى اشوفهن و احضهن..شكد اكول لماما امشي نروح
بس دائما اطلع اعذار

جنت كاعده بالاستقبال..و نسمع بالراديو الاخبار اني و عمو سعدون و بيبي أمينه و الجده فوزيه متربعه تسوي  دولمه هيه و خاله خلود
سعدون..والله الوضع ميبشر بخير
أمينه..ليش يمه
حجه بصوت ناصي
..يمكن امريكا تدخل..لو صدام يسقط
أمينه..لا يمه شنو منو يسقط صدام؟ مستحيل
سعدون..يمه امريكا حتدخل
فوزيه..يمممه اسكت بلا هل حجي تره الحيطان الها اذانات..بعدين شلون تحجي هيج كدام البنيه
كومي ريمه كومي اسقي الزرع بره يمه

هزيت راسي و كمت طلعت من الاستقبال
اعرفهم يخافون كدامي يحجون ع صدام لان خاف اتعلم منهم الحجي واروح احجي يم صديقاتي او ناس غربه ..لان كلشي و لا ينحجي ع صدام كل الناس ترجف منا و احنه من اول ابتدائي نكوم و نكعد و نكول عاش صدام و عاش صدام