أسيرة في موطنك (مكتملة)

البارت الرابع و الاربعون

مساء الخير احبتي
اتمنى لكم قراءه ممتعه

بقلم: زهراء البياتي

كتبته واني منعسه غلسو ع سحك!

دخل عمو قاسم.. بس شافني صاحني
..تعاي
اخذت نفس و كمت ع كيف
طلعت من الغرفه و باوعت علي
ريم..ها عمو
قاسم..حضري نفسج ..اخذج لبغداد

بس كال بغداد..ابتسمت و طلعت سنوني
ريم..صدك عمو حتاخذني
هز راسه
قاسم..اي باجر بالعشره الصبح نطلع
ريم..اي اي اني اجهز نفسي بسرعه
هز راسه و رجع دار وجهه و راح لغرفته
من راح ضليت صافنه..شعجب اجه الي بنفسه حته بدون ما اطلب منه.

نفضت افكاري و رجعت للغرفه..كعدت اصفط بالملابس
و اني متحمسسسه كلش..واخيرا حشوف اختي مشتاقتلها كووومه اريد بس اشوفها احضنها و ابوس بيها.. و اني داصفط..لكيت العلبه بين الملابس و دفتر الرسم.. بعدت الدفتر مال الرسم و اخذت العلبه فتحتها و شفت قصايد حمزه.. بس شفتهن دمعت عيوني.. جريت نفس و رجعت حطيتهن بالعلبه و باوعت ع محبس زيدون..بس شفته ابتسمت
اخذته و كمت اباوع علي
و بكلبي كلت
ريم..يا ترى زيدون شنو اخبارك

رجعته بالعلبه و مسحت دموعي و سديت العلبه و رجعت اصفط بالملابس و رجعت نزلت جوه اخذت علاكتين و صعدتهن حطيت بيهن الملابس و خليتهن وره الباب.. و ماما جانت ماعرف شبيها تدخل تعلج..تباوع عليه و ترجع تطلع.

بالعشى نزلت وياهم بالمطبخ اساعدهم
و جانت خاله خلود تحجي وياي
خلود..يعني بعد حترجعين يم اختج
ريم..انشالله خاله
هدى..يعني بعد متشوفين حمودي
رفعت راسي بسرعه و باوعت علي شلون يباوع تلفزيون و مندمج
ريم..شلون ما اشوفه اكيد اجي دائما ازوره
ماما فاتت من يمي و كالت
حليمه..سلميلي ع براء

اخذت نفس و رجعت اكصكص خيار
خلود..ليش متروحين ويا بنتج
حليمه..اروح انشالله بس مو هسه..شوي عندي شغل
هدى..شنو الشغل العندج خاله
ماما باوعتلها باستغراب
حليمه..شعجب صحتيلي خاله
هدى..قصدي حليمه

كلبت عيونها
حليمه..و شدخلج انتي بأشغالي
هدى..مو انصدمت يعني الاعرفه انتي أشغالج بس مشاكل
حليمه..خلود سكتي بنتج
هدى..اني محد يسكتني
حليمه..ترديني اني اسكتج؟؟؟!

دخلت بيبي امينه للمطبخ و هيه تنتر بينا
أمينه..شنو هذا صووووتكم شنووو؟ ماتبطلون عرك انتو
حليمه..حجيه جنه دنتاقش منو كلج دنتعارك
أمينه..صبو العشى و خلصونا..وانتي حليمه حجيت لخالد هستوني كولشي سويتي اليوم ويا صبا و سعدون هم سمع و قاسم ويا
و هسه يردوج بالاستقبال.
حليمه..يمه يمه يمه خفت
بيبي امينه باوعتلها بعصبيه و هزت راسها بتوعد
ماما ابتسمت و باوعت عليه
حليمه..خلروحلهم..اكيد هسه حيعاقبوني و يوكفوني قصاص
راحت طلعت من المطبخ و هيه تدلع

اباوع ع هدى فاتحه حلكها مستغربه
رجعت باوعت ع امها
هدى..هاي تره كارثه
خلود..معليج بيها يمه و لتتجادلين وياهه.. تره مناقصني مشاكل اني
هدى..والله عاد اني ما اكدر اسكت لازم اخذ حقي
خلود..استغفرالله..كومي سوي لفه لحمودي جاع
هدى..مبيحيلي..خلروح اسمع شراح يحجون ويا حليمه
كامت بسرعه و طلعت من المطبخ
ريم..اني اسويله هسه اكل
خلود..اي يمه فدوه لايدج