أسيرة في موطنك (مكتملة)

البارت السادس عشر

مساء الخير احبتي
أتمنى لكم قراءه ممتعه 💕

اعتذر اليوم اتأخرت بالبارت

بقلم:زهراء البياتي

اسراء..قاسم رزلني رزاله بعمري ممترزلتها لان كبرت الموضوع و عباله كمت ابجي ع الفستان..كمت اكله ماما تعاركت وياي بس يكولي هو صوجج انتي اكيد كتيلهم ديجبرني و اني ماريد اغير الفستان.. و نوب زعل مني هسه اني شلون اراضي
صفنت عليها و على حالتها..معرفت حته شنو احجي اذا اكللها ليش تخلي يرزلج و ليش انتي التراضي اكيد حتزعل.

ريم..كافي حبيبتي هسه هو يراضيج
لان تعرفين قاسم ابد ميكدر ع زعلج
هزت راسها و مسحت دموعها
اسراء..اريد انام لتسوين صوت لا انتي و لا هدى
مددت و جربايه و تلفلفت..عرفت بيها حضل تبجي لحد متغفى

عفتها براحته و رجعت للفراش صفنت..دروسي مخلصتهن..كلت خلي ارجع ارسم لان صارلي فتره تاركه الرسم
رحت للكنتور فتحته ع كيف حته ما اطلع صوت
و طلعت  دفتري و الاقلام

رجعت للفراش مددت و تغطيت و حطيت الدفتر بحضني..فتحت الدفتر و كمت اباوع ع رسمات و ابتسم كل سنه احس داتحسن بالرسم و اضبطه اكثر 
لحد موصلت لرسمه وجهه حمزه. جنت واصله للنص و الرسمه مو كولش مضبوطه..بسرعه شكيت الورقه و كمت ذبيتها بالزباله.
و رجعت لمكاني..فتحت ورقه جديده
و كمت ارسم اشجار و غيوم.

و اني دارسم اذكرت براء
اخذت نفس..اكيد هسه لوحدهه و ضايجه
كلت خلي اكول لعمو خالد بلكت ياخذني وره عرس اسراء.

ثاني يوم حطيت الجنطه ع كتفي و باوعت ع مرايا و ابتسمت..و هدى نترت بيه
هدى..ديلا صارلج ساعه ترتبين و تمسحين بالحذاء هيه مدرسه وين رايحين
باوعتلها صفح
ريم..تره بعد وكت
هدى..امشي اريد اروح من وكت حته انقل الواجب..والله لو عليه  و لا اروح وياج بس غير عمو ميقبل الا اثنينا
ريم..يعني عساس اني حابه اجي وياج
هدى..اهوو امشي يلا
ريم..يلا امشي كدامي خلصيني

طلعت كدامي و اني وراهه
نزلنا جوه و خاله خلود تلكتها و بيدها لفه جبن
خلود..هاج يمه
هدى..ماما ماحب جبن جان سويتي لحم شي
خلود..يمه لحم من الصبح
هدى..اوف يلا جيبي
اخذتها للفه و ضمتها بالجنطه
خلود باوعت عليه و بلعت ريكها
..تردين اسويلج انتي
ابتسمت
ريم..لا خاله شكرا

هدى..يلا تأخرنا
طلعت كدامي و اني ركضت وراهه
و صرت يمها بمستواهه امشي
هدى..صدك ريم عندي امتحان جغرافيه الاسبوع الجاي و انتي جنت هم يم نفس المدرس عود كليلي شنو حابلكم هذيج السنه
ريم..انشالله بس ذكريني
هدى..عفيه هيج احبج
ريم..قصدج بالمصالح
هدى..هو انتي لو امج مو حلميه يشهد الله جان حبيتج
ريم..اني ما اشبها لامي
هدى..اي مبين من فتنتي عليه
ريم..كم مره اكلج مجنت ادري ماما حتسوي هل عركه و صح غلطت و ماعيد غلطي بعد