أسيرة في موطنك (مكتملة)

البارت الثالث و الخمسون

مساء الخير احبتي
اتمنى لكم قراءه ممتعه

بقلم: زهراء البياتي

ريم..كام عمو و كلش استحه من هذني البنات دخلن
بسرعه طلع من الاستقبال و صوت البنات بالمطبخ و هنه يسألن منو هذا و منو و عمه سناء ترزل بيهن.
وصلته للباب..و قبل ليطلع باوع عليه
قاسم..ديربالج ع نفسج و لتخلين احد يضوجج
هزيت راسي
قاسم..تلفون امج عندج مو
ريم..اي اذا احتاج شي عود اخابرك
قاسم..ماشي. يلا مع السلامه
ريم..باي
طلع من البيت و اني سديت الباب و باوعت ع بيت

حسيت نفسي غريبه كلش لوحدي.. و اتمنيت لو يرجع عمو قاسم يمي و لا يعوفني لوحدي.
رحت ع كيف امشي..دخلت للمطبخ و شفت البنات نازعات عبيهن و لابسات فساتين و متمكيجات و التسريحات
سناء..صعدن فوك يم براء يلا.. اريد اشتغل بدون دوخه
طلعن البنات من المطبخ و كل وحده تطلع تباوع عليه باستغراب.

من طلعن باوعت ع عمه سناء
و هيه هزت براسها
سناء..خير شكو شعندج واكفه مثل الشمعه
ريم..تردين اساعدج
سناء..لا رجعي يم زوجج
ريم..طلع
سناء..وين
ريم..استحه من البنات و طلع
سناء..كله من وره هذني العرمات.. بس احسن طلع لان فد ٣ ساعات و يجون اهل الولد و تصير هوسه.
هزيت راسي و رحت كعدت ع كرسي يم المجمده و اباوع عليها شلون تحضر بالاكل و الكلاصات.

سناء..اي حليمو شلونها
ريم..زينه
سناء..اكيد زينه هيه امج عار ميصيرله شي
ريم..تره امي ما اقبل تحجين عليها شي
سناء..هلا هلا.. و دافعين عليها..اي طبعا غير مدللتج و مونستج و مشبعتج فلوس..سوده عليا قابل نفس براء
تبجي الليل كله لان وحيده و محد يوكف يمها.. انتي و امج تخليتو عنها و عفتوهه.. اخخخ ماكول غير حسبي الله و نعم الوكيل

ريم..اصلا بسببج براء كامت تكرهنا انتي الخليتي بعقلها هل كرهه و الحقد
سناء..انجبي و احترمي نفسج لا اكوم ادوسج برجلي
مناقصني غير الزعاطيط يحاسبوني.
كمت من الكرسي و طلعت من المطبخ و هيه تعيط وراي
سناء..و نوب تتزعل و تفتر بالبيت عبالك بيت الخلفوهه
مهتميت لكلامها..رحت بالاستقبال كعدت و اسمع ضحك البنات و صوت براء..كولش انقهرت اني اختها كاعده هنا لوحدي و هيه ويا صديقاتهه تسولف و تضحك.

شوي و اندك الباب..راحت عمه سناء هم فتحته و سمعت صوت عمو اشرف.. من سمعت صوته بسرعه كمت و طلعت من الاستقبال شفته مخبوص و لازم كرسي المتحرك البي بيبي بهيه.. بس شفت بيبي بهيه ع كرسي المتحرك و شلون كبرانه بحيث مدنكه راسها و متحجي شي
اشرف..شوي و ادخل كراتين الببسي
سناء..اي يا عيني استعجل حيجون الناس
اشرف..اي اي بس خلي اخذ الحجيه للصاله
رفع راسه و اجت عينه بعيني.. بس شافني ابتسم
اشرف..هلا بريمه

من كال ريمه بيبي بهيه رفعت راسها و من شافتني دمعت عيوني
رحت ع كيف وكفت كدام عمو اشرف
ريم..شلونك عمو
اشرف..الحمدالله بنيتي انتي شلونج
ريم..الحمدالله
اشرف..كبرانه هواي
ابتسمت و دنكت ع بيبي بهيه.. بست ايدها و راسها و مباوعت عليها بغير نضرات حته ما احرجها.
سناء..اشرف دخل الكراتين شبيك الناس حيجون