أسيرة في موطنك (مكتملة)

البارت الثامن و الخمسون

مساء الخير احبتي
اتمنى لكم قراءه ممتعه ❤

بقلم زهراء البياتي

ريم..مرت الايام.. و الايام صارت أشهر.. و بده الدوام
اول مبده الدوام جنت متحمسه و خايفه بنفس الوكت
متحمسه لان اخر سنه دراسيه الي و خايفه لا ما اكدر انجح او انجح بس ما اجيب معدل عالي.
بس نفضت كل الافكار السيئه.. و ضليت مركزه بدراستي.. ابتعدت عن العالم الخارجي كله.. كمت احبس نفسي بس بالغرفه.. و اكعد ادرس لحد ما اتعب و امل.. اخذ شوي استراحه..انزل اكل بيها و ارجع اكمل دراستي.

حمودي كمت ما اشوفه الا بليل من يريد ينام يمي
لان من ارجع من المدرسه دائما جنت اكون تعبانه
و ترجع انام نص ساعه و وراهه ادرس.. فمصار عندي وقت اشوفه هواي. و قاسم اشوفه الصبح من ياخذني للمدرسه و من يرجعني.. و باقي الوكت ابد ما اشوفه.
لان حته من انزل ع غده او العشى.. الكاه لو بعده بالشغل لو بعده مجاي و مرات يكون موجود بس ميريد يتعشى.

سنه 2008 تقريبا مشفت منها شي بس الكتب و الملازم
بدايه السنه شوي سهله جانت بس بالنهايه كامت الدراسه تصعب بهوووواي.. بس الحمدالله كدرت اجيب درجات زينه بالشهريات.
و قبل الامتحانات النهائيه..جان عدنا شهر و نص ندرس بي.. كعدت بهذا الشهر دك دراسه من الصبح للفجر!
و كمت انام خمس ساعات و مرات اقل.
و بهل وكت اجو ناس خطابه على هدى!

بس مشفتهم و لا عرفت عنهم شي.. بس جانت هدى تجي تبدل و جانت هواي فرحانه.. اتمنيت اتصير القسمه و ربي يسعدهه و تكون هيج فرحانه دائما.
جانت شوي تحجلي عليهم. هو الولد عنده بس اثنين اخوان و هو اكبرهم.. و عمره بال 27 سنه و يدرس بمدرسه أبتدائيه.
و مره سألتها ع شكله..كالت زين مابي شي.
و من بدت امتحاناتي النهائيه.. سمعت انو محددين موعد الخطوبه بعد شهر.

ريم.. كاعده على الرحله و عيونه تنسد من وحدها
و التعب عندي فول.. سنه كامله.. دراسه.. سهر. خلصت
و اليوم اخر يوم.. وراهه حنتظر نتيجتي..وراها حعرف مصيري وين.
غضمت عيني بصبر..اريدهم بس يطلعوني من القاعه الامتحانيه.. بس جانو ميطلعونا الا نخلص كلنا.

بس بقن اثنين بنات للنهايه و اتأخرن..و من شافوهن هيج قررو يطلعونه.. اني بسرعه الضحكه شكت حلكي.
طلعت من الصف.. و التمن البنات.. نص منهن فرحانات و طايرات لان خلصنا و نص جانن ممجاوبات بالامتحان
و قسم جانن خايفات من النتائج.
واني من القسم الجنت طايره من الفرح.
ضليت يم البنات.سولفت وياهن شوي و ضلت وحده تودع الثانيه..وراهه اخذت جنطتي و طلعت من المدرسه و اني مرتاحه.

اول مطلعت شفت سياره قاسم مطبوكه ع رصيف.
ابتسمت و رحت صعدت بالصدر..هو جان مدنك ع تلفونه بسرعه باوع عليه
قاسم..بشري
ابتسمت
ريم..الحمدالله جاوبت..صح الاسئله جانت كولش صعبه
و ماعرف احس عندي اخطاء بس هم جاوبت زين.
قاسم..اي الحمدالله..المهم خلصتي
اخذت نفس براحه
ريم..اييي
قاسم..لتفكرين لا بنتيجه و لا بشي.. اشمري كلشي وراج و اتونسي بهل ايام
هزيت راسي و هو شغل السياره