أسيرة في موطنك (مكتملة)

البارت ٦٤

مساء الخير احبتي
اتمنى لكم قراءه ممتعه

بقلم: زهراء البياتي

رفع راسه و باوع عليه..حط عيونه بعيوني و حجه بصوت ناصي
قاسم..حمزه حيتزوج

انصدمت من كلي.. قبل شهر جان كدام الباب و يعيط و يبجي عليه..متخيلت بهل سرعه راح يتزوج.. عرفت جنت اتوهم هو يحبني هواي.
بلعت ريكي..و هزيت راسي
ريم..الله يسعده
قاسم..مضجتي
هزيت راسي بنفي
ريم..لا.. شي و طويته من حياتي
قاسم..بس بعيونج مداشوف هل شي..عيونج مدمعه

معرفت شنو اجاوبه.. تنهدت و رفعت ايدي مسحت  دموعي حته مينزلن.. رجعت اباوع علي
ريم..يمكن لان انصدمت من الخبر.. بس مابيه شي
هز راسه
قاسم..يلا روحي نامي

درت وجهي و طلعت من الاستقبال.. صعدت فوك و اول مدخلت للغرفه لزمت كلبي.. رحت للحمام و كمت اباوع ع مرايا.. و اعاتب روحي
ليش هيج دمعتي لييييش.. اني صدك  متأثرت هواي بس مجرد جنت مصدومه بالخبر.. بس ليش هيج دمعت ليششش.. شوكت حسمع اسمه و ما اهتم لشوكت.
دنكت راسي ع مغسله و فتحت المي
غسلت وجهي

من خلصت رحت مددت ع جربايه  و ضليت افكر
اكيد اختار بنيه ع حسب  ذوق امه.. نفس ما امه تريد اصل و فصل و شهاده.. حته ترتاح.. بس ما اعتقد امه حتكف عن المشاكل لان خاله صبا خابزتها و عاجنتها
بالبدايه الحب و  التمثيل و وره مده يطلع وجهه الحقيقي للناس.

دخل قاسم و بسرعه اجت عيوني بعيونه
قاسم..منايمه
ريم..هسه حنام
اجه ع طرف الجربايه كعد..اخذ جكاره ورثها و مدد ع الجربايه بس جان كاعد عدل و متكي ع تاج.
و اني نايمه صفح و منطيته ظهري
قاسم..دتفكرين بي
ريم..بمنو
قاسم..حمزه

جريت نفس  و عدلت كعدتي..باوعت علي و هزيت راسي بنفي
ريم..والله ميهمني أمره..بس ما احب اجذب عليك اي جنت دافكر بي و بخاله صبا
قاسم..بشنو..جان يدخن و يباوع كدامه ميباوع بوجهي
ريم..يعني اني عشت وياهم مو سنه و لاسنتين عشت وياهم مده طويله.. عرفتهم و عرفوني.. جنت دافكر بخاله صبا اكيد فرحانه اخذت بنيه اصل و فصل نفس متريد. و حمزه هم اكيد حيرتاح ماطول سمع كلام امه و ريحيها
قاسم..وانتي بعدج تحبي
ريم..ماعرف.. بس احس من اسمع  اسمه مادري هيج انصدم و أجمد بمكاني.. ماعرف ليش هيج يصير وياي
مع العلم اني مداخلي مجال ويا نفسي افكر بي ابد

قاسم..يعني مناسيته
ريم..اجذب على روحي و عليك اذا اكلك ناسيته.
نفس مكتلك عشت وياهم مده طويله.. ابتسمت ويا روحي
بالبدايه جنت فرحانه بيهم..جنت اشوفهم احسن ناس ع الكره الارضيه هههههه
جان خاله صبا الام الحنونه.. الطيبه.. شفتهم ناس ميأذون..عايشين حياه بسيطه و فرحانين و مقتنعين بحياتهم.. اخذوني و دخلوني لبيتهم.. شربت و اكلت و نمت بدون مقابل.
هاي الاشياء مراح انساهه و خاصه من رحتلهم.. جانت حته امي تاركتني..بس همه الوكفو وياي