مساء الخير احبتي
اتمنى لكم قراءه ممتعه
بقلم: زهراء البياتي
ريم..من شفتها ماعرف شصار بيه احس ممصدكه.
براء و كدامي واكفه..اباوع ع الجهال كلهم صغار.
جانن ٣ بنات و هيه حامل و بطنهه جبيره.
حليمه..اختج محتاجتج ريم..و أجت علمودج ندمانه على كلشي.
دمعت عيوني..و ركضت عليها هيه هم اجت بسرعه اتجاهي..حضنتها و هيه حضنتني حيل.. ضلت تبجي و تشهك.. كمت ابجي وياها و احضن بيها حيل
واني حاضنتها رجعت لقبل 14 سنه.. من جنت احضنها هيه و زهراء.
براء..أسفه
بوستها و باوعت عليها و عيوني مليانه دموع
ريم..اني هم اسفه..اخر فتره ابد مأجيت و لا حاولت اشوفج
هزت راسها بنفي
براء..متندمه ع كولشي سويته وياج.. جنت غبيه من اطرد بيج.. جنت محاسه بنعمتج.. هسه يلا حسيت بيها
من نكسرت حسيت بنعمتج..حسيت بنعمه الاخت. تحجي و تشهك من البجي
مسحت دموعها و كمت اهدي بيها
ريم..كافي حبيبتي..كافي لتبجين اني مزعلانه منج ابد
و لا شايله بقلبي عليج.. انتي اختي..من روحي و دمي
قاسم كام وكف ع حيله بس جان ضايج حيل
..اني راح أصعد فوك اكمل شغلي..و انتو تفضلو بالاستقبال اخذو راحتكم..البيت بيتكم
حليمه..متقصر ابو محمد
هز راسه و رجع سد الباب و عينه ع البنات الصغار
و براء وكفت يمي تمسح بدموعها و اني اباوع ع ماما اريدها تكلي شلون اجت و ليش هيج حالتها بس جانت تباوع عليه بقهر. فمهمت شي من نظراتها.
قاسم اخذ حمودي و صعد فوك للغرفه.
و اني دخلت براء و بناتها للاستقبال.. و ماما ورانا
كعدنا و اني كعدت اباوع ع براء ممصدكه.
و جنت اتمعن بملامحها..كبرانه ..بس صايره سمينه
و وجهه ذبلان و اصفر.
حليمه..ريمه.. هذني بنات اختج..الجبيره نورها عمرها ٤ سنوات و الثانيه اسمها زهراء سمتها ع اختج الله يرحمها عمرهه ٣ سنوات جابتها وره نورهان بأشهر و الصغيره اسمها ساره عمرهه سنه ونص.
ريم..ماشالله
اباوع عليهن كلهن صغار و حنطاويات..و يباعن ع بيت مستغربات. رجعت باوعت ع براء الحامل
ريم..و هسه حامل هم ببنيه
هزت راسها
براء..اي بشهر السابع هسه
ضليت مصدومه شكد جايبه جهال..و نوب هسه حامل
ريم..براء فهميني..ليش هيج حالتج
حليمه..شوفي يمه..اني رحت لفاتحه بيبتج بهيه
و هناك و شفت براء.. بس شافتني حضنتني و ضلت تبجي.. عبالي ع بيبتها..بس طلع مو هيج الموضوع
ريم..لعد
حليمه..اخذتني لغرفه و سولفتلي معاناتها كلها ويا زوجها. شلون يمشي وره كلام امه.. اذا امه تكله اكتلها يكتلها..هاي من غير الكنس و التنظيف و المسح.. كايمه بالبيت كوم..و نوب عنده خوات ميجرعهن الله.
و من غير عماته الكلساع زياره و داكات بيها دك..عبالك خدامه يمهم..و اختج كل هل سنين صابره و متحمله.
بس بالاخير اجت سالفه الولد..يروح و يرجع يكللها اريد ولد يشيل اسمي..و امه هم تصيح اريد ولد و اريد
ولد.. نوب حض اختج المصخم..صارت حامل و طلع بيها بنيه..من كلتلهم حته كتل هو و امه كتلها و اتخيلي
ضليت فاتحه حلكي مصدومه و براء مدنكه راسها و تبجي.
حليمه..و بعد خلي اكملج
بالاخير لابسه اسود و جانت تبجي رايده تروح لفاتحه بيبتها..جان زوجها الشفيه يكللها متروحين.. تبقين تساعدين امي بالبيت..اختج متحملت تعاركت ويا
شو هذا يكلج مصدك جر اختج هيه و جهالهه و شمرهه بره و امه وراه تصيح تكله اطردهه احنه شمحصلين منها ازوجك تاج راسها.
أنت تقرأ
أسيرة في موطنك (مكتملة)
General Fictionقصه عراقيه..حقيقه فتاه صغيره..تعيش مع أبيها و خواتها تتغير حياتها حين تعلم أنها أبنت شخص ثاني و تنتقل للعيش مع أمها فماذا تواجهه من صعوبات؟ و ماذا يكون مصيرها زهراء البياتي
