أسيرة في موطنك (مكتملة)

البارت ٧٠

مساء الخير احبتي
اتمنى لكم قراءه ممتعه

بقلم: زهراء البياتي

باوعت علي
ريم..شقصدك
نتر بيه
قاسم..اختج دتغريني ريييييم

عكدت حواجبي
..و هذا بأي منطق يسمو اغراء.. يعني سبحت و نست ملابسها.. وين الاغراء بالموضوع
مجاوبني ضل صافن بوجهي.. دفعني من ايدي على كيف و طلع من الحمام.
بقيت صافنه هذا شبي..معقوله هيج يفكر

طلعت وراه.. اباوع علي طلع دشداشه من الكنتور
و لبسها عسريع
ريم..وين رايح
قاسم..اهج من اختج
ريم..قاسم تحجي صدك..خلي نكعد نتفاهم..قاطعني بنتر
قاسم..لا اتفاهم و لا شي.. ابقي يمها..انتي دتفضليها اصلا عليه..على شنو اني باقي هنا
راح للميز لبس محبسه و اخذ باكيت الجكاير
و التلفون حطه بجيه
رحت يمها وكفت
ريم..قاسم بس..قاطعني
قاسم..زوجج مصدكي..و صدكتي اختج الهسه يلا اعترفت بيج..هاهيه براحتج بعد

عافني و طلع من الغرفه و هو عصبي.
بقيت صافنه مصدومه من رده فعله.
بقيت افتر بالغرفه و الدمعه بعيني.. كعدت ع جربايه
و ضليت اهز برجلي بعصبيه.. معقوله حجيه صح
جايه شارده من زوجها و من ظلمه و عدهه ٣ بنات
تحط عينها على قاسم؟!

جريت نفس و كمت وكفت ع حيلي..عدلت وجهي بالمرايا و مسحت الدموع و نزلت جوه.
لكيته مدده على القنفه و طالعه زرورها.. بسرعه من شافتني نزلت رجلها و ابتسمت
براء..صاير شي
ريم..سابحه انتي بغرفتي
براء..ها اي هذا الحمام المي بي جان بارد
رفعت حاجبي
ريم..شلون شو اول مره يصير هل شي
براء..مادري يمكن هسه رجع حار بس من صعدت بغرفتج لكيت المي حار

بلعت ريكي ماعرف كمت اشك بيها جذابه
ريم..اي زين عادي تصعدين تغسلين ملابسج الي عايفتهن بالحمام
انصدمت و فتحت حلكها
براء..خرب حضي نسيتهن..شكد عيب..هسه شيكول الرجال عليه..خلصعد اغسلهن..والله فد ثوله اني صايره
كامت و هيه تلبس شحاطتها
و تحجي

اجت فاتت من يمي و صعدت فوك و هيه تكولي
براء..حغسلهن و اشرهن جوه..ما اتأخر
مجاوبتها بقيت اباوع ع بناتها و افكر.. باوعت حمودي ماكو..رجعت صعدت فوك و دخلت لغرفته لكيته نايم.
ردت اطلع بس وكفت و اني اباوع ع جنط براء.. بلعت ريكي و طلعت راسي من الغرفه شفت محد موجود.
دخلت على كيف و سديت الباب.
رحت للجنطتها الصغيره مال ايد.. جريت نفس و فتحتها و ايدي ترجف.

انصدمت من شفت كميه الذهب العدها.. و الفلوس هم
ضليت صافنه عليهن مصدومه.. سديت الجنطه بسرعه و كمت و اني اعدل بملابسي..باوعت ع حمودي بعده نايم..عفته و نزلت جوه للاستقبال.. شفت بناتها ديباعن كارتون و ملتهيات.

رحت كعدت ع قنفه و على كيف مديت ايدي
و فتحت تلفونها.. طبعا جان احدث تلفون شايله
من فتحته جان اكو رمز.. بسرعه رجعته و ضليت افكر شلون افتحه..لازم اشوف زوجها شكاتب الها..مستحيل كل هل مده ممحاول يخابرها.