أسيرة في موطنك (مكتملة)

البارت التاسع عشر

مساء الخير احبتي
اتمنى لكم قراءه ممتعه

بالاول اريد احجي وياكم شي..شنو القصه اني كايله يومين نشر و يوم استراحه شو كمتو تكتبون صارلج يومين و ناس تكول تعبنا من الانتظار!!! بحيث عبالي دتشاقون وياي تره اني لحد هاي اللحضه ملتزمه بمواعيد النشر و دانشر كل يومين و يوم استراحه و حته نشر البارت يمكن اني الكاتبه الوحيده الانشره للبارت من وكت.

المهم كتبتلكم بارت طويل لعيونكم
و اريد اشوف تفاعلكم 🥺💕

بقلم: زهراء البياتي

ريم..اسبوع كامل مر.. اسبوع كامل جنت بيت جديد.
تعودت ع تنقلي من مكان لمكان..و اعتقد حبقى طول عمري اروح من بيت لبيت و من محافظه لمحافظه ماعرف شنو بعد ضامتلي الدنيا و شنو بعد حواجهه من صعوبات بحياتي.. و يمكن اوحهه بالمستقبل صعوبات اكبر من الداعيشه هسه.. لان احس اني كل ما اكبر ديزيد همي وياي.

كاعده ع الفراش الجان مفروش بالكاع يم جربايه خاله صبا.. صافنه كدامي و عيوني مورمات من البجي.
صافنه ع حضي و ع قسمتي بهل حياه.
بسبب اخر صدمه انصدمتها من اعز الناس الي و هيه امي من تخلت عني و فضلت نفسها عليه. عرفت من هذاك اليوم اني ماعندي اي سند بهل حياه.
لا اب لا ام لا اخ لا اخت ولا احد.

دخلت خاله صبا و بيدها صينيه الريوك
ابتسمت من شافتني..اني بسرعه مسحت دموعي و عدلت كعدتي
اتقربت مني و حطت الصينيه ع فراش
صبا..يا الله يمه ضهري..كعدت كبالي و مددت رجلها
بوووياي ضهري صاير يوجعني لازم اراجع دكتوره
محجيت شي دنكت راسي ع صينيه.

صبا..شوكت حتبقين هيج..ها يمه حته صايره اخاف عليج شو حته حرف متحجين و بس تتصفنين و اجي الكه عيونج مورمه من البجي. بنيتي ميصير هيج قوي ايمانج بربج ادري والله الحجي سهل و الفعل صعب
بس هاي قسمتج يا يمه.. و صدكيني حمزه لا يتقرب منج و لا يسويلج شي
رفعت راسي و باوعت عليها
هزيت راسي بلا
ريم..خاله اني مو ع حمزه..خاله اني بس هل ايام داحس مكسوره كلش داحس اني تبهذلت حته بمكان عيشتي مداستقر.. و امي من جهه عافتني بنص الطريق و دارت وجهه..هذا كله و عمري ١٤ سنه خاله.. قبل متجين جنت صافنه من اكبر لعد شحيصير بيه. 

صبا..هسه شكو تفكرين بالمستقبل..فكري باليوم لتفكرين لبعيد..بعدين احنه وياج يمه معايفيج
ريم..انتو اجيتوني هديه من رب العالمين لو شما اسوي بهل دنيا مراح اكدر اجازيكم
صبا..ليش هيج تحجين يمه اني اذا اليوم دخلتج بيتي هذا المتواضع باجر عكبه من اموت ربج يكتبلي بيت بالجنه ع هذا الاجر. و بعدين نفس مدتشوفين بس اني و هل وحيد حمزه بالبيت فأبد مراح تضرينا بوجودج بلعكس حلتهي وياج.

ريم..شكرا خاله والله حته شكرا قليله بحقكم
صبا..واجبنا يمه ميحتاج تتشكرين
و هسه اريدج تاكلين كل هل صينيه لان وراج عقد لا تتخربطين علينا لان صارلج اسبوع تاكليلج لكمتين و مي و تنامين حته ضعفتي شوفي وجهج شلون صاير.
ابتسمت
ريم..انشالله
صبا..خلكوم اني اسوي ريوك لحمزه قبل ليطلع من الشغل..كامت و هيه تحجي
ها و اليوم اسراء تجي و هديوه يمكن.