فالاسفل ..
العشا كان كايتحط على الطاولة وحكيمة كاتسنى فنورا تدخل ... ومتوترة علاش تعطلات كاع قد هاكا ... وشافت عند ايطو
حكيمة : داك لبنت لفوق ماتخطيناش شوية من الفشوش وتنوض من النعاس تعشا .... زااادت فيه
ايطو: فاقت ( بضحكة ) فرحتها ملي قلت ليها الحاج غايهضر مع تونار عليك وهي تنوض ناشطة ....
حكيمة ضحكات ضحكة دبزز حيت عقلها غير مع نورا فين تعطلات .. حتى بانت ليها من السرجم حطاتها واحد طموبيل وهي تمشي كتجري عندها لباب كطلعها وتهبطها
حكيمة : ( كاتمسح ليها فمها ) اش هاد التعكيرة دايرة ليا ابنت الحراااام فين كنتي
نورا : ماماااا طلقي .. فين غانكون ؟؟؟ خرجت نبدل الجو دالزفت لي عندكم هنا فالدار ... يخ ضروري تخرجو من الواحد فرحتو ....
تخطاتها ودازت
حكيمة : سيري غسلي عليا داك الوجه وبدلي داك الحوااايج واش بغيتي تشووووهيني على خر يامي باااركة عليا غير وحدة ....ياسيدي يااااربي عفو عليا ...وواااانزلي دغيا تعشاااي
دخلات لدار ... وايطو مربعة يديها فوق كرشها كتسنى
ايطو : اوا هاد العشا برد ... مغاينزل حد يتعشى
حكيمة : راه طلعات لفرملية تهبط لحاج .. بغى يتعشى معانا هنا قنط فلبيت غاتهبط ليه الكرسي ديالو ....اوا و العرسان الغفلة ديالنا فين هوما ؟؟؟ مغايهبطوش
ايطو : طلعات نعيمة علماتهم ....
حكيمة شافت مع جنابها وقربات عند ايطو
حكيمة : يكون داكشي گر زعما ؟ ياك العشّاب قالينا هادشي كايبان فنهارو .. قبيلة هبطات بسالفها هو هاداك ؟؟؟
ايطو : ( تنهدات ) انا ماااعجبنيش هادشي اختي حكيمة ... كون غامدرنا والو ...
حكيمة : وتانتي بلا متغبني عليا .. اصلاا ماكلاتش من داك طبسيل كاع ... ولكن والله حتى تشوف معايا المرااااار وداك الزين لي عاجبها مغااانخلي فيه والو وهاهي عقلي عليها... بديت ليها بداك السالف دالعودة .. وغانكمل ليها بداك الكمارة ... غابلاتي عليها نوريها الكدوب على حكيمة شحال ساوين .. نشوفو هاد تونار هذا اش غايبقى عاجبو فيها ....واش عاااجبها فيه هي اصلا لا هي لا الهم لي خليت من كرشي
ايطو : انا مدخلينيش احكيمة مناقصة دنوب دحد ...
حكيمة : نت ديها غير فكوزينتك ... يااااااربي فوقاش ينزلو هادو ... رجعي رجعي سخني هاد الحريرة تاني بقينا هنا
أنت تقرأ
توناروز TOUNAR'Z
Fantasía🔥أخييييرا من بعد طول انتظار ...تم اطلاق سراحها من رف السنين ●رواية : TOUNAR'z/من منفى إلى آخر ●من تأليف : كاميليا جود ●الغلاف من تصميم المبدعة : So Phie
