နဂါးမင်းသား၏ကံကြမ္မာ

၈၈

နဂါးမင်းသားရဲ့ကံကြမ္မာ
စာစဉ်(၇)

အပိုင်း(၈၈) မီးဝိညာဉ်အစေ့ကိုရရှိခြင်း

ချိုင့်ဝှမ်းအောက်ခြေ၌ ဇူယွမ်ရဲ့မျက်လုံးတွေက စိတ်လှုပ်ရှားမှုတွေနဲ့ ပြည့်နှက်နေလျက် ညင်သာစွာယိမ်းထိုးလှုပ်ရှားနေသည့် မီးဝိညာဉ်အစေ့ကို စိုက်ကြည့်နေခဲ့မိသည်။ ထို့နောက်မှာ သူကသူ့ရင်ထဲမှ ပြင်းထန်တဲ့စိတ်လှုပ်ရှားမှုတွေကို ထိန်းချုပ်လိုက်ပြီး လျင်မြန်စွာပင်ရှေ့သို့ လျှောက်လှမ်းသွားခဲ့လိုက်သည်။

သူကသိုလှောင်အိတ်အတွင်းမှ လူတစ်ယောက်အရွယ်အစားရှိသည့် ကျောက်စိမ်းအိုးတစ်လုံးထုတ်ယူလိုက်သလို ၎င်းရဲ့အပေါ်မှာလည်း မူလချီတွေစီးဆင်းနေသည့် အကာအကွယ်မှော်စာလုံးများစွာကို ရေးထွင်းထားလျက်ရှိပေသည်။

ထို့နောက်မှာ ဇူယွမ်ကတူရွင်းတစ်ခုကို ထုတ်ယူလိုက်ပြီး အလွန်သတိကြီးစွာဖြင့် မီးဝိညာဉ်အစေ့၏ဘေးပတ်ပတ်လည်မှ မြေစာတွေကို ကျောက်စိမ်းအိုးအတွင်းသို့ စတင်ပြီးပြောင်းရွှေ့လိုက်သည်။ သူ့အနေဖြင့် အပင်၏အမြစ်တွေပျက်စီးသွားမှာကို စိုးရိမ်မိသည့်အတွက် အလောတကြီးနိုင်စွာပြုလုပ်ရဲခြင်းမရှိခဲ့ပေ။

ဇူယွမ်ရဲ့စေ့စပ်သေချာသည့် လုပ်ဆောင်မှုအောက်မှာ မီးဝိညာဉ်အစေ့၏ပတ်လည်ရှိ မြေဆီမြေနှစ်တွေကို ဖယ်ရှားကာကျောက်စိမ်းအိုးအတွင်းသို့ ပြောင်းရွှေ့ပြီးသွားခဲ့ပြီဖြစ်သည်။ ထို့နောက်မှာ သူကအလွန်သတိကြီးစွာဖြင့် အပင်ကိုမယူလိုက်ပြီး မြေစာတွေဖြည့်ထားသည့် ကျောက်စိမ်းအိုးအတွင်းသို့ ပြောင်းထည့်လိုက်သည်။

ဒီအပင်ပြောင်းရွှေ့ခြင်းပြီးသွားခဲ့တဲ့အချိန်မှာ ဇူယွမ်ရဲ့ခန္ဓာကိုယ်က ချွေးတိုဖြင့်စိုရွှဲနေခဲ့ရသည်။ သူ့အနေဖြင့် ဒီအရာက ချီဟောင်နဲ့အပြင်းအထန်တိုက်ခိုက်ခဲ့ရတုန်းကထက်ပင် ပိုပြီးပင်ပန်းနွမ်းနယ်စေသည်လို့ ခံစားမိခဲ့ရသည်။

ဇူယွမ်က ကျောက်စိမ်းအိုးအတွင်းရှိ မီးဝိညာဉ်အစေ့ကိုကြည့်လိုက်သလို ပြည့်ဝိုင်းသည့်ပုံသဏ္ဍာန်ရှိသည့် မီးဝိညာဉ်အစေ့ပေါ်တွင်လည်း မှိန်ဖျော့ဖျော့အလင်းရောင်တစ်ခုလင်းလက်နေလျက်ရှိလေသည်။ ၎င်းကအခုအချိန်မှာ ရိုးတံတစ်ခုတည်းသာရှိနေပေမဲ့လည်း ၎င်းကိုတစ်ကြိမ်ထပ်မံပြီး အပင်စိုက်နိုင်ခဲ့မည်ဆိုပါက အစေ့များစွာရရှိနိုင်ပေသည်။