နဂါးမင်းသား၏ကံကြမ္မာ

အပိုင်း(၃၁) စွမ်းအားအခြေခိုင်အောင်ပြုလုပ်ခြင်း

ရေကန်ထဲမှာရှိတဲ့ ဇူယွမ်ရဲ့ခန္ဓာကိုယ်ပတ်ပတ်လည်မှာ မူလချီတွေ တစ်ဟုန်ထိုးမြင့်တက်နေလျက်ရှိသည်။ သူ့ရဲ့အရေပြားပေါ်မှာ အလင်းတန်းတွေ စီးဆင်းနေတာကို မြင်တွေ့ရနိုင်ပြီး မမြင်နိုင်တဲ့လှိုင်းလုံးတွေအဖြစ်လည်း အပြင်ဘက်ကို ပျံ့နှံ့နေလျက်ရှိကာ သူတို့တွေက ဇူယွမ်ရဲ့ခန္ဓာကိုယ်ထဲကို ပြန်လည်စီးဝင်နိုင်ခြင်းမရှိဘဲ ရေကန်ထဲမှရေတွေကို နောက်ဘက်သို့ပြန်လည်တွန်းပို့နေပေသည်။

ရေကန်ရဲ့အစပ်မှာရှိနေတဲ့ လူတိုင်းရဲ့မျက်လုံးတွေက ပြူးကျယ်နေခဲ့ကြသလို ပါးစပ်တွေဖွင့်ဟနေခဲ့ရပြီး ဇူယွမ့်ကို စိုက်ကြည့်နေကြသည်။ ဒီလိုမြင်ကွင်းမျိုးက သူတို့နဲ့လွန်စွာမှပင် ရင်းနှီးမှုရှိလှ၏။ ဒီမြင်ကွင်းက လူတစ်ယောက်ရဲ့စွမ်းအင်ဝင်ပေါက်တစ်ခု ဖွင့်နိုင်ခဲ့သည့်အခါ ဖြစ်ပေါ်လာသည့်အရာပင်ဖြစ်သည်။

“သူ့ရဲ့တတိယဝင်ပေါက်ကို ဖွင့်နိုင်ခဲ့တာလား… ဒါက ဘယ်လိုလုပ်ဖြစ်နိုင်မှာလဲ…” လျှိုစီရဲ့ ဆွဲဆောင်မှုရှိတဲ့မျက်နှာလေးပေါ်မှာ အစိမ်းရောင်နဲ့ အဖြူရောင်တွေယှက်သန်းနေခဲ့ရသကဲ့သို့ ပူလောင်မှုတွေ ထင်ဟပ်နေရပေသည်။ သူမအနေနဲ့ အစောပိုင်းလေးကတင် ဇူယွမ့်ကို အလွန်အမင်းလှောင်ပြောင်ခဲ့ပေသည်။ ဇူယွမ်က သူမတို့တွေ ကြိုတင်မျှော်မှန်းထားခဲ့ကြသလို ဒဏ်ရာပြင်းပြင်းထန်ထန်မရရှိခဲ့သည့်အပြင် နေရာမှာတွင်ပဲ သူ့ရဲ့တတိယမြောက်စွမ်းအင်ဝင်ပေါက်အတားအဆီးကို ချိုးဖျက်နိုင်ခဲ့ပေသည်။

ဒီအခိုက်အတန့်မှာ ချီယွဲ့ရဲ့မျက်လုံးတွေက လွန်စွာဒေါသထွက်သွားသည့်အလား ပြောင်းလဲသွားခဲ့သည်။ သူက လက်သီးကိုတင်းတင်းကျပ်ကျပ်ဆုပ်လိုက်မိကာ ဇူယွမ်အား မြွေပွေးတစ်ကောင်ကဲ့သို့စိုက်ကြည့်နေခဲ့ပြီး သူ့ရဲ့နှလုံးသားထဲမှာတော့ ဒေါသတွေဆူပွက်နေခဲ့ရသည်။ သူ့အနေနဲ့လည်း အခြားလူတွေလိုပင် ဒီလိုရလဒ်မျိုးထွက်ပေါ်လာလိမ့်မယ်လို့ ထင်မှတ်ထားခဲ့ခြင်းမရှိခဲ့ချေ။

ဒါ့အပြင်ကို ဇူယွမ်ရဲ့ဝင်ပေါက်နှစ်ခုတည်း ဖွင့်ထားနိုင်သေးသည့်ခန္ဓာကိုယ်က ကျောက်စိမ်းဝိညာဉ်ရေတံခွန်ထဲမှာ တစ်နာရီကြာအောင် ဘယ်လိုများတောင့်ခံနိုင်ခဲ့လဲဆိုတာကို သူ့အနေနဲ့ နားလည်သဘောပေါက်နိုင်ခြင်းမရှိခဲ့ပေ။