နဂါးမင်းသား၏ကံကြမ္မာ

အပိုင်း(၇၀) အကူအညီရရှိခြင်း

ကျယ်ဝန်းသည့်အခန်းအတွင်းမှာ အနက်ရောင်အခိုးအငွေ့တွေက ဆိုးရွားလှသည့်အနံ့အသက်တစ်ခုနဲ့အတူ ကြိမ်ဖန်များစွာ ထွက်ပေါ်နေလျက်ရှိပေသည်။

သို့ပေမဲ့လည်း အခန်းတွင်းရှိလူတိုင်းက ဒီဆိုးရွားလှသည့်အနံ့အသက်ကြောင့် စက်ဆုပ်ရွံရှာမှုအနည်းငယ်လေးမျှပင်ဖြစ်မသွားမိခဲ့ကြဘဲ ထိုအစားပျော်ရွှင်မှုတွေကိုသာ သူတို့ရဲ့မျက်နှာထက်မှာ မြင်တွေ့ရနိုင်ပေသည်။

ဒီလိုမျိုးအနက်ရောင်အခိုးအငွေ့တွေ ကြိမ်ဖန်များစွာထွက်ပေါ်နေခြင်းက နတ်ဆိုးမြူအဆိပ်ကို ထပ်ခါထပ်ခါဖယ်ရှားရှင်းလင်းနိုင်ခဲ့ခြင်းဖြစ်သည်လို့ ဆိုနိုင်သည်။

ဝေကန်းလန်ရဲ့မျက်လုံးထဲမှာ စိတ်လှုပ်ရှားမှုတို့ဖြင့် ပြည့်နှက်နေခဲ့ရပြီး သူကဝေဘင်း၏ခါးနေရာကို ကြည့်လိုက်မိသည်။ ၎င်းနေရာမှာရှိသည့် အနက်ရောင်အကွက်တွေက ဆက်တိုက်ဆိုသလိုပင် လျော့ပါးပျောက်ကွယ်နေရကာ အနက်ရောင်အစုအဝေးက မူလတုန်းကလို နက်ရှိုင်းခြင်းရှိမနေခဲ့တော့ပေ။

သူ့ရဲ့ဘေးတွင်ရှိနေသည့် ဝေချင်းချင်းက သူမရဲ့လက်ကို တင်းတင်းကျပ်ကျပ်ဆုပ်ထားမိလိုက်သည်။ သူမရဲ့ပုံစံက သူမရဲ့အလွန်အမင်းစိတ်လှုပ်ရှားနေမှုကို ထိန်းချုပ်ထားနိုင်ရန် ခက်ခဲနေရသလိုပင်။

သူတို့နှစ်ယောက်စလုံးက အလွန်အမင်းစိတ်လှုပ်ရှားပျော်ရွှင်နေခဲ့ရသော်လည်း ဇူယွမ်ကိုအနှောင့်အယှက်ဖြစ်သွားမှာစိုးသည့်အလား အနည်းငယ်မျှဆူညံမှုလေးကိုပင် ပြုလုပ်ခဲ့ခြင်းမရှိခဲ့ကြပေ။ ဇူယွမ်ရဲ့မျက်နှာက လက်ရှိအချိန်မှာ လွန်စွာလေးနက်တည်ငြိမ်နေသကဲ့သို့ သူ့ရဲ့နဖူးပြင်ထက်မှာလည်း ချွေးသီးချွေးပေါက်တွေဖြင့် ပြည့်နှက်လို့နေရပေသည်။

သူ့လက်ထဲရှိကောင်းကင်ယွမ်စုတ်တံက ဆက်လက်၍ကျဆင်းနေခဲ့ရသလို မူလမှော်စာလုံးတွေကလည်း ထပ်ခါထပ်ခါတိုက်ခိုက်လာသည့် နတ်ဆိုးမြူအဆိပ် အပိုင်းအစတွေကို ဆက်တိုက်ပင်ပျောက်ကွယ်သွားစေခဲ့သည်။

သို့ပေမဲ့လည်း ဒီလိုအဆက်မပြတ်တိုက်ခိုက်နေရမှုတွေကြောင့် မူလမှော်စာလုံးတွေရဲ့နေရာတော်တော်များများက ပျက်စီးခဲ့ရသည်။