The Star Around The Sun (Burmese Translation)

- 6 -

Unicode

ပထမဆုံး အတည် ရိုက်ကူးမှု စတင်ပြီဖြစ်၏။

လှေကား‌‌ခြေရင်းတွင် ရှရှင်းချန် မတ်တပ်ရပ်နေခဲ့သည်။ သူ မျက်လုံးများကို မှိတ်လိုက်ရင်း အသက်ပြင်းပြင်းတစ်ချက် ရှုထုတ်လိုက်သည်။ ဒါရိုက်တာ၏ 'အက်ရှင်'ဟု အော်သံကိုအကြားတွင် လှေကားထက်သို့ ခပ်မြန်မြန်ပြေးတက်သွားလိုက်တော့၏။

ရန်ရို့မင်သည် လှေကားထိပ်မှနေ၍ သူအား ကြည့်နေလေသည်။

ရှရှင်းချန် ရန်ရို့မင်အား မြင်သွားသည့်နောက်တွင် သူ တစ်ခဏခန့် တန့်သွားခဲ့၏။ ယင်းနောက် ထိုသူ့အား ဖြတ်ကျော် လျှောက်သွားဖို့ ပြင်လိုက်သည်။

သူတို့ အနီးပတ်လည်တွင် အလွန်တိတ်ဆိတ်နေပါ၏။ ရိုက်ကူးရေးဝန်ထမ်းများသည် ကင်မရာမြင်ကွင်းမှ လွတ်ကင်းသည့်နေရာတွင် အသံတစ်သံမျှမထွက်စေဘဲ ရှိနေခဲ့ကြသည်။

ရှရှင်းချန်သည် အလွန်တုန်လှုပ်နေခဲ့သည်။ ထိုအခြင်းအရာက ဒီအချိန်တွင် ဖန့်ကျင်ယွမ် ခံစားနေရမည့် (သို့မဟုတ်) ခံစားနေသင့်သည့် စိတ်အခြေအနေနှင့် ပြီးပြည့်စုံသော ပေါင်းစပ်မှုဖြစ်၏။

ရန်ရို့မင်အား သူဖြတ်ကျော်သွားချိန်တွင် ရန်ရို့မင်၏ခန္ဓာကိုယ်နှင့် နည်းနည်းမှမထိမိစေရန် အထူးဂရုပြု ရှောင်ရှားလိုက်သည်။

ထို့နောက်တွင် ရန်ရို့မင်က လှုပ်ရှားလာတော့သည်။ ရှရှင်းချန်၏ လက်မောင်းအား ဆုပ်ကိုင်လိုက်ရင်း စင်္ကြံ၏ နံရံဆီသို့ ဆွဲခေါ်သွားကာ ဖိကပ်လိုက်တော့သည်။

ရှရှင်းချန်သည် ထိုအမျိုးသားအား ပြူးကျယ်သော မျက်လုံးအစုံတို့ဖြင့် ကြည့်လိုက်သည်။

ရန်ရို့မင်က ပြော၏။ သူ့အသံသည် အစမ်းလေ့ကျင့်စဉ်ကထက် ပို၍ အက်ရှလေးနက်နေခဲ့သည်။

"မင်း အပြင်မှာ ဆော့လာတာလား"

ရှရှင်းချန် ပြန်မဖြေခဲ့။

ရန်ရို့မင်သည် ရှရှင်းချန်နှင့် မျက်လုံးချင်းဆုံအောင် ကြည့်လာသည်။ တစ်ချိန်ထဲတွင်ပဲ သူ့လက်ချောင်း များသည် ရှရှင်းချန်၏ နဖူးထက်ရှိ ဆံစများအား သပ်တင်ပေးသည်။