Unicode
ဟွမ်းကျီရှင်းက ရိုက်ကွင်းရှိနေရာ စတူဒီယိုသို့ ပြန်သွားကာ စာချုပ်ကိစ္စကို ဖြေရှင်းသည်။ ထို့နောက် ရှရှင်းချန်၏ ကြော်ငြာရိုက်ကူးရေး ပြီးသည့်အချိန်အထိ ထိုင်စောင့်နေပါ၏။
အပြန်လမ်းတွင် ရှရှင်းချန်သည် ဟွမ်းကျီရှင်း အလွန်အမင်း တိတ်ဆိတ်နေသဖြင့် ထူးဆန်းနေသလို ခံစားလာမိရာ မေးလိုက်ပါ၏။
"မင်း ဘာလို့ စကားမပြောတော့တာလဲ"
ဟွမ်းကျီရှင်းက သူ့အား နောက်ကြည့်မှန်မှ ဖျတ်ကနဲလှမ်းကြည့်ပြီး ပြန်ဖြေသည်။
"ငါ့မှာပြောစရာစကားမှမရှိတာ"
ဟွမ်းကျီရှင်း အခုထိ စိတ်မကြည်နေတုန်းဖြစ်မည်ဟု ရှရှင်းချန် ယူဆမိလိုက်သည်။ ထို့ကြောင့် သူလည်း တိတ်တိတ်ဆိတ်ဆိတ်ဖြင့်ပင် ခေါင်းငုံ့ရင်း ဖုန်းသုံးနေလိုက်ပါ၏။
ညနေပိုင်းတွင် ရန်ရို့မင်သည် ဧည့်ခန်းအတွင်းရှိ ဆိုဖာထက်၌ ဇာတ်ညွှန်းထိုင်ဖတ်နေသည်။ သူ့လက်ထဲတွင် ဇာတ်ညွှန်းတစ်ခုရှိနေပြီး သူ့အရှေ့ရှိ ကော်ဖီစားပွဲပေါ်တွင် အခြားဇာတ်ညွှန်းသုံးခုကို တင်ထားပါ၏။
ဆိုဖာနောက်မှီကို သက်တောင့်သက်သာ အနေအထားဖြင့် လျောမှီထားကာ သူ့ ခြေတံရှည်များကို ဆန့်တန်းထားလျက် ကော်ဖီစားပွဲပေါ် တင်ထားသည်။ လက်တစ်ဖက်က ခပ်မြင့်မြင့်မြှောက်ကာ ဇာတ်ညွှန်းကို ကိုင်ထားပြီး ဖတ်နေသဖြင့် သူ့ဦးခေါင်းကိုလည်း အနည်းငယ် မော့ထားသည်။
ရှရှင်းချန်သည်လည်း ဇာတ်ညွှန်းဖတ်နေသည်။ သို့သော် သူက ဆိုဖာထက်တွင် လှဲလျက် ရန်ရို့မင်၏ ပေါင်ပေါ် ခေါင်းအုံးထားရင်း 'မတော်တဆလူသတ်မှု' ရုပ်ရှင်ဇာတ်ညွှန်းကို လက်နှစ်ဖက်ဖြင့် ကိုင်ကာ ဖတ်ရှုနေခြင်းဖြစ်၏။ သူ့မျက်ဝန်းများက သူအမှတ်အသားပြုထားသည့် စာကြောင်းများကို တစ်တန်းချင်းစီ ခပ်ဖြည်းဖြည်း ကြည့်နေသည်။
သူသည် ဇာတ်ညွှန်းကို တစ်ခေါက်ထက်ပို၍ ဖတ်ရှုပြီးသားဖြစ်ကာ သူ သရုပ်ဆောင်ရမည့်ဇာတ်ကောင် ချန်ချန်းကျင်၏ အပိုင်းများအားလုံးကို အရောင်အသွေး စုံလင်သော marker pen များဖြင့် မှတ်သားပြီးသား ဖြစ်၏။ ထိုဇာတ်ညွှန်းကို ဖတ်သည့်အခါတိုင်း ဇာတ်ဝင်ခန်းတို့ကို စိတ်ထဲတွင် ပုံဖော်ကြည့်ပြီး သူ့ကိုယ်သူ ဇာတ်ကောင်အတွင်းသို့ စိတ်နှစ်ဝင်စေကာ ထိုအခြေအနေမျိုးတွင် ချန်ချန်းကျင် ပြုမူမည့် အမူအယာ၊ ပြောဆိုမည့် လေယူလေသိမ်း ပုံစံတို့ကို စိတ်ကူးကြည့်သည်။
YOU ARE READING
The Star Around The Sun (Burmese Translation)
RomanceDescription : MC is a normal actor in the entertainment industry and ML is a very famous actor. They met on the set of a BL film which is directed by a well-known director. And .. what will happen ? Read the story if you wanna know. ;) It's my very...
