The Star Around The Sun (Burmese Translation)

- 77 -

Unicode

'မတော်တဆလူသတ်မှု' ရုပ်ရှင်ရိုက်ကူးရေးအား ယခုကာလမှနေ၍ တစ်လအကြာ နွေဦးပွဲတော်အပြီးတွင် စတင်ရန် အချိန်ဇယားချမှတ်ထားသည်။

ရှရှင်းချန်၏ အချိန်ဇယားသည် နွေဦးပွဲတော်မတိုင်ခင်အထိ အလုပ်များနှင့် ပြည့်နေသည်။ ထုတ်ကုန်နှစ်ခုအတွက် ကြော်ငြာများနှင့် ပရိုမိုးရှင်းပြုလုပ်ရန်အတွက် ဓါတ်ပုံများ ရိုက်ကူးရန် ရှိသည်။ ထို့ပြင် video website တစ်ခု၏ နှစ်ကုန်ဆုချီးမြှင့်ပွဲ အခမ်းအနားသို့ တက်ရောက်ကာ ယခုနှစ်၏ပထမနှစ်ဝက်တွင် ထုတ်လွှင့်ပြသခဲ့သည့် သူပါဝင်သရုပ်ဆောင်ထားသော idol drama အတွက် ဆုတစ်ဆုကို လက်ခံရယူရန်လည်း ရှိသည်။ ထို့ကြောင့် သူ့တွင် Variety Show များ၌ ပါဝင်ရန် အချိန်သိပ်မရှိပေ။ သို့နှင့် ဟွမ်းကျီရှင်းသည် ရှရှင်းချန်ကို ထင်ရှားလူကြိုက်များသည့် Variety Show တစ်ခုတွင် အပိုင်းတစ်ပိုင်းစာသာ ပါဝင်ပေးရန် လိုအပ်မည့် ဧည့်သည့်အဖြစ် သွားရောက်ရန် စီစဉ်ပေးထားသည်။

သို့သော်လည်း သူပြန်ရောက်ရောက်ချင်း ဆောင်ရွက်သည့်ကိစ္စမှာ ကုမ္ပဏီကို ပြန်ရောက်ကြောင်းသတင်းပို့ကာ ခိုင်မေ့ထင်နှင့် တွေ့ဆုံရန်ဖြစ်သည်။

ကုမ္ပဏီ၏ စင်္ကြံတစ်လျှောက်တွင် ကုမ္ပဏီနှင့် စာချုပ် ချုပ်ထားသည့် အနုပညာရှင်များ၏ ဓါတ်ပုံကြီးများကို ချိတ်ဆွဲထားသည်။ ထိုဓါတ်ပုံများကို အဆင့်အလိုက်မဟုတ်ဘဲ ကျပန်းပုံစံဖြင့် စီစဉ်ထားခြင်း ဖြစ်သည်။ ထိုသို့ပြုလုပ်ရခြင်းမှာ တစ်ဦးတစ်ယောက်တိုင်းကို ခွဲခြားဆက်ဆံသည့်နှယ် မဖြစ်စေအောင်လည်း ဖြစ်နိုင်ပါသည်။ ရို့ရှု၏ ဓါတ်ပုံက အရှေ့တွင်ဖြစ်ပြီး ရှရှင်းချန်၏ ဓါတ်ပုံက အလည်တွင်ဖြစ်သည်။ ထို့နောက် ကျန်အနုပညာရှင်များ၏ ပုံများကိုလည်း ဘောင်အကြီး၊ အသေးများဖြင့် ချိတ်ဆွဲထားသည်။

ရှရှင်းချန် သူ့အရပ်တစ်ဝက်နီးပါးရှိ သူ့ဓါတ်ပုံရှေ့တွင် ရပ်လိုက်ကာ မော့ငေးကြည့်နေပါ၏။

ထိုဓါတ်ပုံသည် သူ ပွဲဦးထွက်ခါစအချိန်တွင် ရိုက်ထားခြင်းဖြစ်ပြီး ထိုစဉ်က အသက်နှစ်ဆယ်ပင် မပြည့်သေး။ ထိုအချိန်က ဓါတ်ပုံဆရာနှင့် stylist တို့သည် ပြည်တွင်းရှိ ပထမတန်းစားအဆင့် ပညာရှင်များပင် ဖြစ်သည်။ ဓါတ်ပုံထဲရှိ ရှရှင်းချန်သည် အလွန်စတိုင်ကျနသော ကျောင်းဝတ်စုံဖြစ်သည့် ရှပ်လက်တိုအဖြူ၊ နက်ပြာရောင်ဘောင်းဘီရှည်တို့ကိုဝတ်ဆင်ထားပြီး ရှူးဖိနပ်တစ်ရံကို စီးထားသည်။ ဓါတ်ပုံတွင်းမှ သူသည် မြေပြင်ပေါ် ဆောင့်ကြောင့် ထိုင်ချကာ ကျောင်းလွယ်အိတ်ကို ခြေထောက်ဘေးတွင် ချထားပြီး ကင်မရာထံသို့ တောက်တောက်ပပ ပြုံးကြည့်နေသည်။