The Star Around The Sun (Burmese Translation)

- 132 -

Unicode

ဟန်ပေါ်ဟန် စိတ်မသက်မသာ ဖြစ်လာရ၏။ သူ အလိုလိုပင် အချိန်ကို ကြည့်လိုက်ချင်သော်လည်း ဆန်းယောင်၏အိမ်ခန်း နံရံများထက်တွင် နာရီတစ်လုံးမှ ချိတ်ဆွဲထားခြင်းမရှိပေ။

ဆန်းယောင်သည် တံခါးပေါက်တွင် ရပ်နေဆဲ၊ စင်တီမီတာတစ်စိတ်ခန့်မျှပင် မရွေ့ချေ။ အခန်း၏ မှိန်ဖျော့ဖျော့အလင်းရောင်အောက်တွင် သူ့ မျက်နှာအမူအယာကိုကား သဲသဲကွဲကွဲ မမြင်နိုင်။

ဟန်ပေါ်ဟန် နှုတ်ဖွင့်ဟကာ ပြောလိုက်ရာ သူ၏ တည်ကြည်အေးဆေးသောစကားသံကို သူကြားနေရပါသည်။

"ကျွန်တော့်မှာ အမေရိကားက ပြန်ရောက်လာတာ သိပ်မကြာသေးတဲ့ အတန်းဖော်ဟောင်းတစ်ယောက် ရှိတယ်၊ သူက နျူရိုဆာဂျင် .. သူ အားတဲ့နေ့ကျရင် ရှောင်ယံကို စစ်ဆေးကြည့်ပေးဖို့ ကျွန်တော် သူ့ကို ပြောထားတယ်" [neurosurgeon - အာရုံကြောဆိုင်ရာ ရောဂါရှာဖွေခြင်းနှင့် ခွဲစိတ်ကုသခြင်း အထူးကုသမားတော်]

ဆန်းယောင် သူ့ကို နှုတ်ဆိတ်လျက် ကြည့်နေ၏။

ဟန်ပေါ်ဟန်သည် လုံးလုံးလျားလျား လိမ်ညာနေခြင်း မဟုတ်။ သူ့တွင် နိုင်ငံရပ်ခြားမှ ဆေးရုံတွင် အလုပ်လုပ်ခဲ့သည့် အတန်းဖော်သူငယ်ချင်း တကယ်ရှိပါ၏။ ထိုသူငယ်ချင်း ပြည်တွင်းသို့ ပြန်ရောက်သည်မှာ သိပ်မကြာသေးသည့်အပြင် အမှန်ပင်လည်း နျူရိုဆာဂျင်တစ်ဦး ဖြစ်သည်။ ပြီးခဲ့သည့်တစ်ခေါက် သူ ဆန်းယောင်နှင့်ဆုံစဉ်တွင် ဆန်းရွှမ်ယံအား သူ့အတန်းဖော်ထံ စမ်းသပ်ကြည့်ရှုစေရန် ပြောလိုခဲ့သော်လည်း ယင်းအကြောင်းကို ပြောဖို့ရာ အခွင့်မသာခဲ့။

ထိုအခိုက်တွင် ဆန်းယောင်၏မျက်ဝန်းများသည် ကျဉ်းမြောင်းသောအိပ်ယာငယ်ထံ ခပ်ဖြည်းဖြည်း ရွေ့သွားတော့သည်။

ဟန်ပေါ်ဟန် မေးလိုက်သည်။

"ဒီလောက်နောက်ကျ‌နေမှ ရှောင်ယံကို ဘာလို့ အပြင်မှာ ထိုင်ပေးထားတာလဲ"

ဆန်းယောင်၏လေသံ အနည်းငယ် ပြောင်းလဲသွားပါ၏။

"သူ့ကို လှဲထားတာ တစ်နေ့လုံးပဲ၊ အဲ့ဒါနဲ့ ကျွန်တော် အခန်းထဲကထုတ်လာပြီး ထိုင်ခိုင်းထားတာ၊ ဘာပဲဖြစ်ဖြစ် သူ့အိပ်ယာခင်းတွေလည်း လဲပေးရမှာပဲဆိုတော့ ဒီမှာထားလိုက်တာ"