The Star Around The Sun (Burmese Translation)

- 56 -

Unicode

ရှရှင်းချန် နိုးလာသည့်အချိန်တွင် နောက်တစ်နေ့ နံနက်ခင်းပင် ဖြစ်နေလေပြီ။

သူ့မျက်လုံးများကို ဖွင့်လိုက်သည်နှင့် မနေ့ညက
အယ်လ်ကိုဟောအရှိန်ကြောင့် မအီမသာဖြစ်မှုနှင့်အတူ ထိုးတက်လာသည့် ခေါင်း‌ကိုက်ခဲမှုကြောင့် နဖူးကြောများကို နာနာကျင်ကျင် ရှုံ့ထားလိုက်မိတော့သည်။ ထို့နောက် သူ့ခန္ဓာကိုယ်သည် စောင်ဖြင့်ပတ်မိ‌နေပြီး သူသည်
အိပ်ယာအလည်တွင် အိပ်နေခဲ့ခြင်း ဖြစ်ကာ သူ့ဦးခေါင်းသည် ခေါင်းအုံးနှစ်လုံးအကြားတွင် ကျနေခဲ့ကြောင်း တွေ့လိုက်ရပါ၏။ သူ့ဘေးနားတွင် ရှိနေခဲ့သည့် ရန်ရို့မင်ကိုမူ မတွေ့တော့။

ရှရှင်းချန် အိပ်ယာထက်တွင်ထထိုင်လိုက်ကာ လက်ဖဝါးများအတွင်း မျက်နှာကို မှောက်အပ်ထားလိုက်သည်။ မနေ့ညက သူ အတော်မူးနေခဲ့သော်လည်း သူပြောခဲ့သည်နှင့် လုပ်ခဲ့သည်များအား ရှင်းရှင်းလင်းလင်း မမှတ်မိတော့သည်အထိ မူးနေခြင်းမျိုး မဟုတ်ပေ။ အရက်ရှိန်နှင့်အမှောင်ထုတို့၏ နှစ်ထပ်ကွမ်း အကာ အကွယ်ကြောင့် အချို့အရာများအား ပြောနိုင်၊ လုပ်နိုင်ခြင်းသာ ဖြစ်သည်။ သို့သော် နေ့အလင်းရောင်အောက်တွင် ပုံမှန်အသိစိတ်ဖြင့်ဆိုပါက မည်သည်ကိုမှ သူ မလုပ်ရဲ၊ မပြောရဲ။

သူ ခေတ္တခဏခန့် ငြိမ်ငြိမ်သက်သက် ထိုင်နေမိပါ၏။ မနေ့ည အိပ်ယာမဝင်ခင် သူသောက်ခဲ့သည့် ရွှေဖရုံသီးဆန်ပြုတ်သည် မနက်ခင်း‌တွင် ဆီးအဖြစ် ပြောင်းသွားကာ သူ ဆီးသွားချင်လာရပြီ။ သို့သော် ရှရှင်းချန် စောင်ကို အပြည့်အဝ မဖယ်လိုက်ခင်တွင် သူ အောက်ခံဘောင်းဘီ ဝတ်မထားခဲ့ကြောင်း သတိရလာပါ၏။ ထိုအခြင်းအရာသာမက အနည်းငယ် ရှက်ရွံ့ဖွယ် ကို့ရို့ကားယားနိုင်သည့် 'နံနက်ခင်းတွင် နိုးထလာခြင်း' အခြေအနေသည်လည်း ဖြစ်ပေါ်နေပါ၏။ ထို့ကြောင့် ချက်ချင်းပင် စောင်အကွယ်အောက်တွင် ဆက်နေနေရင်း သူ အိပ်ယာဘေးသို့ ပစ်ချထားခဲ့သည့် ရေချိုးဝတ်ရုံကို ဘေးဘီဝဲယာသို့ လှည့်ပတ်ရှာလိုက်ပါ၏။

သို့သော်လည်း ရေချိုးဝတ်ရုံသည် မရှိတော့ချေ။

ရှရှင်းချန် ဆီးမအောင့်ထားနိုင်လုနီးပါး ဖြစ်လာရပြီ။ ထို့အခန်းကို ဝေ့ဝဲကြည့်လိုက်ရာတွင် ရန်ရို့မင်၏ အရိပ်အယောင်အားလည်း မမြင်မိ‌ပေ။ ထို့ကြောင့် အောက်ထပ်ရှိ ရေချိုးခန်းသို့တိုက်ရိုက်သွားလိုက်ရန် ရည်ရွယ်၍ စောင်ကို ဖယ်မလိုက်ကာ ကိုယ်ဗလာသက်သက်ဖြင့် အိပ်ယာမှ ထလာလိုက်သည်။