The Star Around The Sun (Burmese Translation)

- 55 -

Unicode

ရှရှင်းချန် အိပ်ယာအစွန်းတွင်ထိုင်ရင်း ရန်ရို့မင် သူ့အတွက် ယူလာပေးသည့် ရွှေဖရုံသီးဆန်ပြုတ်ကို ဖြည်းဖြည်းချင်း သောက်နေပါ၏။ ရွှေဖရုံသီးတုံးငယ်လေးများက ချိုကာ ဆန်ပြုတ်ရည်မှ ဆန်သားက နူးညံ့သည်။  သူ တစ်ဇွန်းချင်းယူသောက်ရင်း ဆန်ပြုတ်နွေးနွေးသည် လည်ချောင်းတစ်လျှောက်မှ လျှောကျသွားပြီးလစ်ဟာနေသည့် အစာအိမ်ကို ဖြည်းဖြည်းချင်း ပြည့်တင်းလာစေသည်ကို ခံစားနေမိပါ၏။

အစာအိမ်ကို အစာဖြင့် ဖြည့်တင်းနိုင်သော်လည်း နှလုံးသားအောက်ခြေရှိ ကွယ်ဝှက်ထားသော လစ်ဟာမှု
သည် ၎င်း၏အယောင်ဆောင်ထားသည့် ပုံပန်းသဏ္ဍာန်ကို ဖယ်ခွာချလိုက်သည်နှင့်တစ်ပြိုင်နက် ပို၍ပို၍ ရှင်းလင်းလာပါ၏။ ထိုလစ်ဟာမှုကို မည်သို့သောအရာနှင့်မှ ဖြည့်တင်း၍မရတော့ချေ။

ရှရှင်းချန်သည် ကုန်စင်သွားသည့် ဆန်ပြုတ်ပန်းကန်လုံးကို အိပ်ယာဘေးရှိ စားပွဲငယ်ထက် တင်လိုက်ကာ လေသာဆောင်သို့ လျှောက်လာပါ၏။

အပြင်ဘက်တွင် မှောင်မည်းနေပါ၏။ အလင်းရောင်ပျပျသည် ထွန်းညှိထားသည့် နေရာတစ်ကွက်စာတွင်သာ လင်းနေသည်။ အဆုံးမရှိသော ပင်လယ်ပြင်သည် အကွာအဝေး အနည်းငယ်အကွာတွင် ရှိနေသည်မှန်သော်လည်း အမှောင်ထုထဲ၌ မည်သည့်အရာကိုမှ
မမြင်ရပေ။

လှိုင်းပုတ်သံ၊ လေတိုးသံများကိုသာ သူ ကြားနေရရုံဖြင့် အလွန်ကြီးမားကျယ်ပြောပြီးကွာဝေးသည့် ရှုခင်းကို
စိတ်တွင်းတွင် ထိုးထွင်းမြင်ယောင်လာပါသည်။ ထိုကဲ့သို့ အကန့်အသတ်မဲ့သော ဟင်းလင်းပြင်သည် စိတ်နှလုံးကို ပွင့်ဟလာစေသည်။ ကြီးမြတ်ထည်ဝါလှစွာသော သဘာဝတရား၏ ရှေ့မှောက်တွင် လူသားမျိုးနွယ်သည် ဖော်ထုတ်ရည်ညွှန်းမှုပြုထိုက်ရန်အတွက် အလွန်သေးငယ်ပါ၏။

ခဏငယ်အတွင်းတွင် ၎င်းသည် ရှရှင်းချန်အား အမှောင်ထုတွင်း၌ သဘာဝနှင့်အတူ တစ်သားထဲ ဖြစ်ချင်စိတ်ကို ပေါ်ပေါက်လာစေသည်။ သူ ဝတ်ဆင်ထားသည့် ရေချိုးဝတ်ရုံပါးပါးသည် ပင်လယ်လေပြေကြောင့် ပွင့်ဟသွားရပါ၏။ စိတ်ထဲတွင် ဝန်ထုပ်ဝန်ပိုးတစ်ခုနှယ် ဖြစ်တည်လာရကာ သူ့ကိုချုပ်နှောင်ထားသည့် အရာမှန်သမျှထံမှစိတ်လွတ်ကိုယ်လွတ် ချိုးဖျက်ရုန်းထွက်၍ လေသာဆောင်မှ ခုန်ချချင်လုနီးပါး ခံစားလာရသည်။  သူနှစ်သက်သလိုလုပ်ရန်အတွက် တစ်ကြိမ်ခန့်လောက် သူ့ကိုယ်သူ ခွင့်ပြုလိုက်ချင်သည်။