The Star Around The Sun (Burmese Translation)

- 63 -

Unicode

ရှရှင်းချန်သည် ဆုပေးပွဲမတိုင်မီညတွင် ရုပ်သံဌာနတည်ရှိရာ မြို့သို့ လေယာဉ်ဖြင့် ထွက်လာခဲ့သည်။ ဤတစ်ကြိမ်တွင် ဟွမ်းကျီရှင်းက သူနှင့်အတူ အဖော်လိုက်ပေး၏။ ရုပ်သံဌာနဝန်ထမ်းသည် လေဆိပ်တွင် သူတို့နှစ်ယောက်ကိုလာကြိုကာ သူတို့ဌာနမှ ကြိုတင်စီစဉ်ပေးထားသည့် ဟိုတယ်သို့ လိုက်ပို့ပေးပါသည်။

ထူးချွန်ဆုချီးမြှင့်ခြင်း အခမ်းအနား တက်ရောက်ရန် ဖိတ်ကြားထားသော အနုပညာရှင်များသည် ယင်းဟိုတယ်တွင် တည်းခိုရမည်ဖြစ်ပြီး အများစုသည် ပွဲနေ့မှ ရောက်လာကြမည်ဖြစ်၏။ ရှရှင်းချန်သည်တော့ ပွဲတွင် ဖျော်ဖြေရမည်ဖြစ်သဖြင့် သူတို့က တစ်ရက် ကြိုခေါ်ထားခြင်း ဖြစ်သည်။

နောက်တစ်နေ့နံနက်တွင် ရှရှင်းချန်နှင့် ချင်းရွှေးယွေ တို့သည် ဖျော်ဖြေရမည့်သီချင်းကို အတူအသံသွင်းကြသည်။ နေ့လည်ခင်းတွင် ရုပ်သံဌာန၏ အကြီးဆုံးစတူဒီယို တွင် သူတို့ ရီဟာဇယ်တိုက်ရမည် ဖြစ်၏။

သူတို့နှစ်ဦး တစ်ယောက်နှင့်တစ်ယောက် တွေ့ဖြစ်ခဲ့သည်မှာ အတော်အတန်ကြာပြီ။ ချင်းရွှေးယွေသည် နောက်ဆုံးတွေ့သည့်အချိန်က ရှရှင်းချန်နှင့် ကတောက်ကဆဖြစ်ပွားမှုကိုပင် မေ့လျော့နေပြီဖြစ်ကာ ယခု သူ့ကို မြင်သည့်ချက်ချင်းပင် သူမက ရင်းနှီးခင်မင်စွာဖြင့် လက်မောင်းတစ်ဖက်ကို လာချိတ်ပါ၏။

ဆုပေးပွဲအခမ်းအနားစီစဉ်သူများက သူတို့နှစ်ယောက်အား မြူးကြွသည့် အချစ်သီချင်းချိုချိုလေးတစ်ပုဒ်ကို တွဲဖက်သီဆိုရန် စီစဉ်ပေးထားသည်။ ရီဟာဇယ်အတောအတွင်းတွင် ဒါရိုက်တာက သူတို့အား ချစ်ကြည်နူးသည့် အပြုအမူအချို့ ပြုလုပ်စေချင်သည်။ ထို့ကြောင့် အဆုံးသတ်တွင် သူတို့ခေါင်းများကို ထိကပ်အောင် တိမ်းငဲ့ကာ လက်မြှောက်လိုက်ရင်း အသည်းပုံ သဏ္ဍာန်ဖော်လိုက်ကြသည်။ ထိုအပြုအမူသည် ရှရှင်းချန် အတွက် ပေါကြောင်ကာ ကလေးဆန်နေသော် လည်း ဒါရိုက်တာကတော့ ထိုရလာဒ်ကို အတော်တန် သဘောကျဟန်ရှိ၏။

အခါတိုင်းနှစ်များကဲ့သို့ပင် ဆုချီးမြှင့်ခြင်းအခမ်းအနားကို ချန်းဟိုင်လန်မှ ပွဲတင်ဆက်သူအဖြစ် ဆောင်ရွက်သည်။