Unicode
ရှရှင်းချန်တစ်ယောက် အတော်များများ သောက်ဖြစ်သွားခဲ့သည်။ ဟွမ်းကျီရှင်းကို ပြန်လိုက်ပို့ပြီးသည့်အချိန်တွင် သူ အနည်းငယ် ရီဝေယစ်မူးနေခဲ့ပြီ။
သူ ဟိုတယ်သို့ တစ်ယောက်ထဲ ပြန်လာခဲ့လိုက်သည်။ သူ တည်းနေသည့် အထပ်သို့ ရောက်သည့်အခါ ဓါတ်လှေကားမှ ထွက်လိုက်သည်။ သူ စီးထားသော ဖိနပ်သည် ကော်ဇောခင်းထားသော စင်္ကြံပေါ်တွင် အသံတစ်သံမှပင် မထွက်လာခဲ့။ ရှရှင်းချန်၏ ခန္ဓာကိုယ်သည် အနည်းငယ် ယိမ်းခါနေခဲ့သော်လည်း တည်တည်ငြိမ်ငြိမ် မရပ်နိုင်သည်အထိ မူးဝေနေသည်တော့ မဟုတ်။ သို့ပေမယ့် အသွေးအသားထဲရှိ အယ်လ်ကိုဟောဓါတ်သည် သူ့အား အနည်းငယ် စိတ်ရွှင်စေပြီး ပုံမှန်နှင့် ကွဲပြားစွာ လမ်းလျှောက် ဖြစ်စေသည်။
ရှရှင်းချန်သည် ရန်ရို့မင်၏ အခန်းတံခါးရှေ့တွင် ရပ်လိုက်ကာ အခန်းနံပါတ်အား ကြည့်နေမိသည်။
သူ ရန်ရို့မင်အား ဒီနေ့ ညစာအတူစားရန် ဖိတ်ချင်ခဲ့သည်။ ရိုက်ကူးရေး အတောအတွင်း ရန်ရို့မင်၏ သိမ်မွေ့နူးညံ့သော အပြောအဆိုနှင့် အပြုအမူများက သူ့ နှလုံးသားအောက်ခြေတွင် ဖြစ်တည်နေသော စိုးရိမ်ကြောင့်ကြမှု၊ ကိုယ့်ကိုယ်ကိုယ် ယုံကြည်မှုကင်းမဲ့မှုများအား ရှင်းရှင်းလင်းလင်း ဖယ်ရှားပေးခဲ့သည်။ သူ ထိုကဲ့သို့ စိုးရိမ်ကြောင့်ကြမှုမျိုးအား ကျန်ရှိသည့် ရိုက်ကူးမှုများတွင် ခံစားရတော့မည် မဟုတ်ဟုပင် တွေးထင်ခဲ့ရသည်အထိ ရှင်းလင်းသွားခဲ့ရသည်။
ထိုနေရာတွင် ရန်ရို့မင် ရှိနေခဲ့သည်မှာ ကံကောင်းမှု တစ်ခုပင် ဖြစ်၏။
ရှရှင်းချန်သည် လက်ကိုဆန့်ထုတ်ကာ အခန်းတံခါးကို ခေါက်လိုက်သည်။ သူ့ လက်ဆစ်များက သစ်သားကို ခေါက်မိသော ‘တဒေါက်ဒေါက်’ အသံက ထွက်လို့လာ၏။
သူ နှစ်ကြိမ်ခန့် ခေါက်ပြီးသည့်နောက် ရပ်တန့်လိုက်ကာ အခန်းထဲက အသံအား တိတ်တဆိတ် နားထောင်ကြည့်လိုက်သည်။ သို့ပေမယ့် မည်သည်ကိုမျှ မကြားရ။ သူ့ လက်ဆစ်များအား လက်ချောင်းများနှင့် အသာပွတ်သပ်ဖြစ်လိုက်သည်။ လက်ကို ဆန့်တန်းထားရင်း နောက်တစ်ကြိမ် ထပ်ခေါက်လိုက်ရန်အား တွန့်ဆုတ်နေမိပါ၏။
YOU ARE READING
The Star Around The Sun (Burmese Translation)
RomanceDescription : MC is a normal actor in the entertainment industry and ML is a very famous actor. They met on the set of a BL film which is directed by a well-known director. And .. what will happen ? Read the story if you wanna know. ;) It's my very...
