The Star Around The Sun (Burmese Translation)

- 54 -

Unicode

ရှရှင်းချန်သည် ရေချိုးကန်တွင် ရေစိမ်မနေတော့ပဲရေပန်းဖြင့်သာ ရိုးရိုးတန်းတန်း ရေချိုးလိုက်သည်။ ရေနွေး၏ အပူရှိန်နှင့် အစိုဓါတ်သည် ကိုယ်တွင်းရှိ အယ်လ်ကိုဟောဓါတ်ကို အငွေ့ပြန်စေ၏။ အစာအိမ်တွင်းတွင် ထပ်မံ၍ လစ်ဟာသွားရကာ အောင့်တက်နာကျင်မှုက သည်းခံဖို့ခက်ခဲလာသည်အထိ တိုးပွား ကြီးမားလာသည်။

ရှရှင်းချန် ရေချိုးကန်ထဲမှ ခက်ခက်ခဲခဲ ပြန်ထွက်လိုက်ရသည်။ အဝတ်ချိတ်သည့်တန်း‌‌ပေါ်တွင် ချိတ်တွဲထားသည့် ရေချိုးဝတ်ရုံကို ယူကာ ဝတ်မည်အပြုတွင်မှ သူ့တွင် အတွင်းခံဘောင်းဘီ လဲစရာမပါလာကြောင်း ရုတ်တရက် သတိရသွားတော့၏။

အစောပိုင်းက သူချွတ်ချထားခဲ့သည့် ကြမ်း‌ပြင်‌ပေါ်မှ အဝတ်တို့ထံ သူလျှောက်လာလိုက်ကာ အောက်ခံဘောင်းဘီကို ကောက်ယူကြည့်လိုက်သည်။ သို့သော် ထိုဘောင်းဘီမှာကား ရွှဲရွှဲစိုနေချေပြီ။ မတိုင်ခင်က ရေစိုရွှဲနေသည့် အောက်ခံအဝတ်ကို သူ့ကိုယ်ပေါ်တွင် ဝတ်ထားရသော ခံစားချက်သည် အတော်မနှစ်မြို့စရာကောင်းကြောင်းကို ယခုထက်ထိ မှတ်မိနေသေးသဖြင့် လက်လျှော့လိုက်ကာ ရေချိုးဝတ်ရုံကိုသာ ခပ်တင်းတင်း စေ့ဝတ်ရင်း ရေချိုးခန်းထဲမှ ထွက်လာလိုက်သည်။

ပြီးခဲ့သည့်ထိုခဏက ရှရှင်းချန် ကတိုက်ကရိုက်ဖြင့် ပြေးဝင်လာမိသည်ကြောင့် ဗီလာ၏ အပြင်အဆင်ကို သတိမထားမိ။ ဗီလာ၏အတွင်းပိုင်းသည် တကယ်တမ်းတွင် သိပ်မကျယ်ဝန်းကြောင်း ယခုမှ တွေ့လိုက်ရပါ၏။ မြေညီထပ်တွင် ဧည့်ခန်းပါရှိပြီး အပေါ်ထပ်သည်အိပ်ခန်းကျယ်ဖြစ်ကာ ပုံမှန်နှစ်ယောက်အိပ်ကုတင်ထက် အနည်းငယ်ပိုကျယ်သည့် ကုတင်တစ်လုံး ရှိသည်။

ရေချိုးခန်းမှ ရှရှင်းချန် ထွက်လာချိန်၌ ရန်ရို့မင်သည် ဧည့်ခန်းတွင်းရှိ ဆိုဖာထက်တွင် ထိုင်နေသည်။ သူ့မျက်နှာသည် မည်သို့သော ခံစားမှုမျိုးမှ ပေါ်လွင်မနေ။ ရှရှင်းချန် ဝင်လာစဉ်က ပွင့်နေသည့် တံခါးကို ယခုတွင်တော့ ပိတ်ထားလိုက်ပြီ ဖြစ်၏။

ရေအေးထဲတွင် ရေကူးခဲ့ခြင်းကြောင့်လားတော့
သူ မပြောတတ်၊ သို့သော် ယမကာမူးယစ်ခြင်းကြောင့် ခေါင်းချာချာလည် မူးဝေနေသည့် ခံစားချက်နှင့်
နှိုင်းယှဉ်လျှင်တောင် လက်ရှိ သူ့အခြေအနေသည် ပိုမို ပြင်းထန်သည်။ ရှရှင်းချန် သူ့ကိုယ်သူ ယိုင်လဲကျတော့မည်ဟုပင် ခံစားနေရသည်။