The Star Around The Sun (Burmese Translation)

- 123 -

Unicode

ဖျော်ဖြေရေးလောကအတွင်းရှိ လူဆယ်ယောက်စီတိုင်းအတွက် ချန်းဟိုင်လန်သည် ယင်းဆယ်ယောက်တို့ထဲမှ အနည်းဆုံး လူကိုးယောက်ကို သိနေသည်၊ ထိုကိုးယောက်အနက် အနည်းဆုံး လူခုနစ်ယောက်ခန့်သည် သူ့မိတ်ဆွေများ ဖြစ်၏။

ယခင်နှစ်၌ ချန်းဟိုင်ဟန် ကျွန်းပေါ်တွင် လက်ထပ်ပွဲကျင်းပခဲ့စဉ်က လူတော်တော်များများသည် အလုပ်၊ အခြားအစီအစဉ်များ၊ သို့မဟုတ် သွားလာရအဆင်မပြေခြင်း စသည့်အကြောင်းကိစ္စများကြောင့် လက်ထပ်ပွဲသို့ မတက်ရောက်နိုင်ခဲ့ကြပေ။ ဤတစ်ကြိမ် သူ့သားလေး၏ တစ်လပြည့် မွေးနေ့ပွဲသည် ပေကျင်း၌ပင် ကျင်းပမည်ဖြစ်သဖြင့် အခမ်းအနား၏ အတိုင်းအဆက လက်ထပ်ပွဲကျင်းပစဉ်ကထက် ပိုမိုလာရန်သာရှိနေပြီး လျော့နည်းလိမ့်မည်မဟုတ်။

ရှရှင်းချန်ထံ ရောက်လာသည့်ဖိတ်ကြားလွှာထက်၌ သူ့နာမည်ကိုသာ ရည်ညွှန်းရေးသားထားခြင်းဖြစ်ရာ ယေဘုယျအားဖြင့် သူ ရန်ရို့မင်နှင့်အတူ ပွဲတက်ရောက်ရန် အကြောင်းရင်းမရှိ။ သို့သော် လက်ရှိ၌ သူတို့နှစ်ယောက် ရိုက်ကူးရေးတစ်ဖွဲ့ထဲတွင် အတူရှိနေပြီး ဟေးကျန်းသည်လည်း ထိုပွဲသို့သွားမည်ဖြစ်ရာ ဟေးကျန်းနှင့်အတူတကွ ပွဲတက်လိုက်ခြင်းအားဖြင့် သူတို့နှစ်ယောက်သည် ရိုးရိုးသာမန်လုပ်ဖော်ကိုင်ဖက်များအသွင် ဖြစ်တည်သွားတော့သည်။

တစ်လပြည့်မွေးနေ့ပွဲကျင်းပသည့်ဟိုတယ်၏ ကြိုဆိုရေးခန်းမ၌ ဟေးကျန်းက ချန်းဟိုင်လန်ကို မြင်သည်တွင် နှုတ်ဆက်လိုက်ပါ၏။

"ငါတို့ ရိုက်ကူးရေးတစ်ဖွဲ့လုံး မင်းကို ဂုဏ်ပြုပေးဖို့ ရောက်လာကြတာပဲ"

ဟေးကျန်း၏အပြောကို ချန်းဟိုင်လန် သဘောတကျ အော်ရယ်တော့သည်။

"မင်းတို့ ရိုက်ကူးရေးတစ်ဖွဲ့လုံးမှာ မင်းက ပွဲဖိတ်ဖို့ အခက်ဆုံးပဲကွာ"

ထို့နောက် ချန်းဟိုင်လန် ရန်ရို့မင်နှင့်ရှရှင်းချန်ထံ တိုးလျှောက်လာ၏။ သူ ရန်ရို့မင်ကို ပွေ့ဖက်နှုတ်ဆက်လိုက်ကာ ကိုယ်ကိုပြန်ခွာ၍ ရှရှင်းချန်ကို ကြည့်လာသည်။ အဓိပ္ပါယ်ခပ်ရေးရေးပေါ်လွင်နေသည့် လေသံမျိုးဖြင့် သူ မေးပါ၏။