ကြယ်တွေကြွေသောည

Part 27 (Unicode)

ညနေစာ စားချိန်မို့ kitchen တစ်ခုလုံး ဗြောင်းဆန်အောင် ရှုပ်ရှက်ခက်နေသည့်အချိန်။ နေရှင်းခ လည်ဂုတ်တစ်လျှောက် ချွေးများဖြင့် စိုရွှဲနေကာ ကျောပြင်တစ်လျှောက် စီးကျနေသည်။ ပူပြင်းသော မီးငွေ့ရိုက်သဖြင့် မျက်စိများကျိန်းစက်နေပေမယ့် သူ့ရှေ့မှာ ပွက်ပွက်ဆူနေသော ရေနွေးအိုးထဲသို့ spaghetti ခေါက်ဆွဲချောင်းများ ပစ်ထည့်လိုက်သည်။

"မကျက်တကျက်နော်။ ခေါက်ဆွဲကို ပျော့မသွားစေနဲ့။"

"ဟုတ်ကဲ့။"

Chef ၏ညွှန်ကြားမှုကို ခေါင်းညိတ်အဖြေပေးရင်း နဖူးမှ ချွေးများကို နေရှင်းခ အကျီင်္လက်ဖြင့် ဖိသုတ်လိုက်သည်။ ပူသည်ထက်ပိုကာ အိုက်စက်နေသော မီးဖိုခန်းသည် ငရဲခန်းတစ်ခုနှင့် ဆင်ဆင်တူနေသည်။

"ရှင်း..."

အဖြူရောင် ရှပ်အကျီင်္လက်ရှည်၊ ဘောင်းဘီရှည် အနက်ရောင်နှင့် ကုတ်အနက်ရောင် တွဲဝတ်ထားသော Yi Ling ကို မီးဖိုခန်းဝမှာ တွေ့လိုက်ရသည်။

"501 ကို ဒါ သွားပို့ပါတဲ့။"

Ling လက်ထဲတွင် ရေခဲစိမ်ထားသော ရှမ်ပိန်ပုလင်းနှင့် ဖန်ခွက်နှစ်ခုရှိနေသည်။ နေရှင်းခ နားမလည်။ သူ့တာဝန်သည် kitchen မှာသာဖြစ်သည်။ service နှင့်မဆိုင်သလို room service ပိုင်းနှင့်လည်း မဆိုင်။

"GM ခိုင်းတာ။ နင် ပဲသွားပို့ရမယ်တဲ့။ အထူးဧည့်သည်လို့ပြောတယ်။"

General Manager မှပို့ခိုင်းသည်တဲ့လား။ နေရှင်းခ အံ့သြသွားကာ သူ့ဘေးမှ Chef ကို တစ်ချက်လှည့်ကြည့်လိုက်သည်။

"GM ခိုင်းတာဆိုရင် သွားလိုက်။ မင်းနေရာ ငါ အစားထိုးဝင်ထားပေးမယ်။"

"ဟုတ်ကဲ့ ဆရာ။"

Ling ကမ်းပေးလာသော ဗန်းကိုလက်နှစ်ဖက်ဖြင့်ယူကာ ဓါတ်လှေကားရှိရာသို့ လျှောက်လာခဲ့သည်။ အခန်း 501 သည် ငါးထပ်မြောက်တွင်ရှိကာ အပေါ်ဆုံးထပ်အခန်းဖြစ်သည်။ သူတို့ဟိုတယ်တွင် အကောင်းဆုံး VIP အခန်းဟု ပြော၍လည်း ရမည်ဖြစ်သည်။ အခန်းရှေ့ရောက်သည်နှင့် ရယ်သံများကို သူ ကြားလိုက်ရသည်။

စိတ်ထဲမှာထင့်ခနဲ..

ရယ်သံက သတိုးရယ်သံနှင့် တူလွန်းနေသည်။