Dear Kids - Alec Fam season 2

13. 📚 Special Guest 2.

Anaknya Alec kok dilarang, ya mana mempan. Mana perlengkapan kabur udah dia ambil sendiri pula. Gendongan Rego Baby juga helm, pake sepatu segala juga. Kagak pake ijin langsung maen pamit dadahin orang serumah. Yang punya anak jadi gemes tapi jengkel.

Mau dibiarin sendirian ngikut Kipli kok ya kagak tega, akhirnya Aleccia ikutan setelah bawa perbekalan. Sempet dibisikin sama emaknya juga ntar jalan lupa mampir ATM buat ngambil duid. Kali-kali adeknya nanti kumat nraktir orang sekampung lagi, biar kagak nyusahin emak bapaknya Kipli.

Udah gitu aja ntar malem biar dijemput ama pak sopir, mommy sama Daddy kagak ikutan. Hari ini aktivitas Daddy rada banyak, kasian Daddy masih gampang payah. Fisiknya belum pulih bener. Jully cuma pesen yang baik-baik aja di sana jangan nyusahin orang.

Biar kelihatan rada sopan Jully bawain lasagna buatan bude sum yang sebenernya mau dipake buat jatah cemilan. Biar kagak keliatan kebangetan datang cuma bawa gimbul doang kagak bawa oleh-oleh.

Kipli ngenes setengah mati, padahal rencananya abis pulang kerja mau ngapelin adeknya Ucup. Kalo gimbul ngikut pulang ya Kipli kagak jadi ngapel. Padahal Kipli udah niat pengen nembak tuh adeknya Ucup mumpung belom keduluan Ama yang laen.

Gimbul tenggelam dalam gendongan Rego Baby, cuman keliatan tangan sama kaki doang. Kepala udah ketutupan helm mini. Kena helm pipi gio semakin tumpah. Aleccia yang terpaksa gendong adeknya, mau sapa lagi emang. Gimbul dianterin kagak mau, maunya bonceng Kipli naik motor. Demen bener anaknya Alec naik motor, apalagi taruh di depan gitu berdiri sambil kedua tangan pegangan spion.

Alec mengantar kepergian Kipli dan dua anaknya dengan pandangan antara sedih dan bahagia. Sedih rasanya rumah sepi, bapaknya belum bisa ngajak gelud lah anaknya malah kerasan di rumah orang Laen. Bahagianya kagak ada anak-anak jadinya ntar kagak banyak iklan. Udah kangen bener sama emaknya anak-anak, sejak nyungsep nyium pantat truk Alec puasa kagak nganu.

Jully ngerti banget sama yang dirasain bapaknya anak-anak, jadi laki biasanya itu dominan yang ngendaliin dan mimpin keluarga. Jadi pas dia kagak gini rasanya kayak kagak berguna. Nemenin anak layangan aja cuma bisa liatin, kasian layangan gimbul sampe nyungsep robek semua yang nyangkut di kembang, yang nyangkut di pager.

" Alec....masuk aja yok istirahat di dalem." Ajak Jully yang udah niat gandengin lakinya.

" Kangen gelud Jul..." Balas Alec.

" Gelud ama siapa ...? Nanti nunggu sembuh dulu baru gelud ama Gio, trus banting-bantingan lagi ama Aleccia." Kata Jully berusaha menguatkan.

" Maunya gelud ama Jully...." Gumam Alec.

Jully bengong entah sampai berapa detik, kagak salah ini lakinya ngomong. Apaan kangen gelud Ama bini, jalan aja 5 meter udah sulit jaga keseimbangan. Gitu udah pengen ngajak gelud. Ya Jully juga sama sih sebenernya, tapi kan tau diri.

" Lec, ada aja sih pake pengen gelud sama mama. Baru naik rontok gimana....?" Ejek Jully.

" Ngejek lakinya dosa, kagak boleh itu..." Gumam Alec manyun.

" Ya Alec kagak sadar diri, tunggu bentar napa. Pulih total aja belum kok." Sergah Jully.

" Ya emang, sadar diri sih sadar. Tapi kan ada yang kagak mau ngerti juuul..." Sahut Alec memelas.

" Apaan emaaang...? Alec aja pikiran ngeres." Bales Jully kagak habis pikir.

" Jul, Daddy udah puasa lama loh. 2 Minggu loh Jul, kagak dipake nanti aki tekor." Jawab alec.

" Et dah emang mobil....?!" Tanya Jully garuk-garuk kepala.

" Itu tuh, mobil aja kalo kagak rajin dipanasin aki tekor. Dinyalain kagak mau on." Alec nyari alesan.