مساؤؤؤؤؤ حبايب
شايفين من تفتحين عينج من النوم وتعيشين الرعب من اول النهار الرعب الحقيقي الرعب الي يكتم الانفاس الرعب الي يخليج ادخلين جوة البطانية ومطلعين منهة خوفاً من القادم
تغمضين عينج ومتفتحيهة لاشوفين ابشع منظر
اليوم صار بيه كل هذا تصورو عشت كل هاي المعاناة
اليوم ابني صف ثالث متوسط عدة دوام فمن البارحة بليل وقتت تلفوني ع الساعه 7 حته اكعدة يروح المدرسته
دگ المنبه وكعدت ورحت الابني للغرفة اكعدة وطبعًا هوة متمسك بالبطانيه وكوة كعد وكام حته يبدل
لحد هاللحظة تمام
ولدي بطبيعتهم ميتريكون يوم الدوام نهائياً بس يبدل ويطلع يعني ورة ماكعدته لازم ارجع انام وفعلاً رجعت الغرفتي ودخلت جوة البطانيه حته ارجع للغفه مالتي
لحد الان تمام
جويسم بعدة نايم عادتاً يكعد بالسبعة او سبعه ونص ويبدل ويطلع الشغله ورة ما دخلت جوة البطانيه وحظنتهة ورجعلي شعور الدفو حاسيين انتو اكيد بالراحة النفسيه من ترجعون الصبح للبطانيه وتبدي العين تسترجع ذكرياتهة مع النوم وتبدي الاجفان تاخذ راحتهة وتدخل في سبات
وفجأة يجي على بالكم فد شي خطير يطير ابو النومة ويصير بيكم كل الي شرحتة فوگ 👆
الي صار اثناء معانقتي للدفو ومطلعه بس قرص وجهي من البطانيه اذكرت ☹️☹️ اذكرت اني البارحة بليل من غسلت الملابس وشريتهن بقن بداخل الغساله الجواريب 😱😱
وچماله غاسله كل الجواريب 😱 يعني ولا تك جوراب باقي يابس حته يلبسوو 😱😱😱😱😱
زين هاي جويسم بعدة ماكاعد وابني ابو الثالث يريد يطلع وابني الچبير هم بعدة ماكاعد وطالع الشغله يعني ثلاث نفرات باي لحظة يهجمون علية ويمرعدوني لان شون حيطلعون من الصبح الاعمالهم بدون جواريب 🙈🙈 وبهذا البرد القارص
حاسين بحجم معاناتي
الي سويته اني شنو
هاااا كولو شنوو
اني اكللكم شنو
اول شي رجعت غطيت راسي بالبطانيه وغمضت عيني للهجوم المكثف وانتظار القادم وكعدت اترقب شوكت الباب تنفتح ويجون عليه
جويسم ورة شويه كعد وكام ونزل وسد باب الغرفة ورا واني اترقب هسة يجون هسة يجون
ورة شويه سمعت صوت باب الهول انفتح كلت يا الله يمكن اول واحد لكاله حل الحالته واسمع ابني ابو المتوسطة يحجي وي صديقه ويكله دقيقه بس البس حذائي
يا الله هذا اول واحد فرجت
بقو ثنين هذا الحجي واني مغمضة اذا اسمع كحة بالشارع افز اذا اسمع صوت عطسه افز اذا سمعت صوت باب انفتح افز واني مغمضة
ورة شويه اذكرت ابني سيف البارحة رجع كلش تعبان ونام بهدومة ماقبل يبدل ومانزع جواريبه
يا الله هذا الثاني هم نحلت
بقه جويسم هاي اني احجي وي روحي واني مغمضة وجوة البطانيه
لالا عاد اله جويسم يبووووو اليوم اليوم اليووم
والله ماكو صوت اترقب ونتضر وماكو صوت هسة تنفتح الباب هسة تنفتح الباب وماكو
ورة شويه نفتحت الباب يمةةةةة جاك الموت يا تارك الصلاة
اشو سنطة وهدوء وسمعت صوت الثلاجة الي بالغرفة نفتحت الباب ونسدت الظاهر جويسم مطلع جبن ونزل
اااااح يمة بعد بعد الخطر
ورة شوية سمعت صوت الدراجة شتغلت يا الله هذا هم سيف طلع الشغله بقه الاب
يبوووووو ذول مكدور عليهم حته لو اطيهم جواريبي بس جويسم شلون
والله شو سنطة اني هم غلست وتلفلفت اكثر ومغمضه ما فتح ابد عيني وجان تنفتح الباب
يمةةةةةةةة اجاني واحس اكو من اقترب مني واحس اكو من يباوع بوجهي الطالع من البطانيه واني مغمضة اشوووو
نسحب وطلع وسد الباب
ااااحححححح بعد بعد الخطر ما خلص
وچان اذكر فد شي وطفر من الفراش
البارحة بنتي دزتلي ورقه دولار وكالت خلي بابا يصرفهة الي واني كتلهة الصبح قبل لا يطلع انطيهة اله
وذكرت وطفرت ونسيييييييت كلشي نسييييت وراح من بالي كل الي عانيته من ساعه سبعه الى ان صارت ساعه ثمانيه اله عشرةةة
والكالكم جويسم واكف يم الدرج مقابيل باب الهول وكتله
حسوني عفيه اخذ وياك الورقة مال نورة صرفهة لتنساها
واجاني الرد الساحق الماحق
( ايمان ليش الجواريب مبلله )
اسعاف يا ربي احتركنه
اسعاف يا ربي احتركنه
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
