بما ان الجدل اتوسع بموضوع علي ابو سجاد وزوجته ام سجاد الي متنازله عنة وقابله بزواجة
وداشوف هواي من النساء ماراضيات على بعض الاراء الي تنطي الحق لبو سجاد بالزواج من مرأه ثانية
خلي احجيلكم هاي السالفه حته تصدكون اكو بعض الرجال مظلومين مثله مثل هوااي من النساء المظلومات
اول بدايات نزول الفيس والكروبات دخلت بكروب ينتمي العشيرتي وبيه هواااي من اقاربي ومثل متعرفون شون من تكون ميانه بين الاقارب بالضحك والشقه والمنشورات
المهم فد يوم راسلني واحد من الكروب الشخص اعرفة بس ما متعمقة ويااا بالمعلومات الشخصيه يعني مثل متكولون اقارب من بعيد
فسلم علية وكعد يحجيلي عن عمرة ويا دراسه واصل وشنو وضيفته وشنو مؤهلاتة وشنو مدخوله اليومي
انتضرت لما خلص حجي واني مستغربه ليش ديحجيلي هالتفاصيل واني شنو دخلي بهالامور المهم اخر شي كتله تفضل شنو لازم هاي الكم من المعلومات
كلي ام عبودي اريدج تختاريلي مرة على ذوقج مثل طبعج فرايحية وتنكت وتضحك وريدهة على معرفتج لان اني واثق من اختيارج
شنووووو اخطبلك مرة زين انته مو مزوج وعندك اطفال
كلي ام عبودي مزوج وعندي اطفال بس ما مرتاح وذا تحبين تسمعين اشرحلج ضروفي وضعي وسبب زواجي
كتله والله اعذرني اني بهيج موضوع نهائياً لا دخلني اذا كلش ومضطر للزواج خلي خواتك والدتك تختارلك
كلي ماريد لا امي ولا خواتي مو هنة الي اختارولي هاذي زوجتي وثاني شي هية اقاربهن ومراح يقبلن يمشن وياي على حسابهة
المهم كتله زوجتك شنو عيوبهة وتريد تزوج عليهة
كلي نظيفه ام بيت تخاف على اولادهة حريصه على بيتهة اخلاق مراعية اهلي بس اخر اهتماماتهة اني
كتلة ترة انته داتعدد بمواصفات الزوجة المثاليه شتريد بعد اكثر وذا عدهة قصور وياك يعني اعتذر منك يجوز اكو تقصير منك يعني حاول تحتوي عائلتك احسن مجيبلك وحدة متعرف شراح يطلع طبعهة وتترحم على زوجتك الي معاجبتك
كلي ام عبودي اني اول ما ازوجت ما كعدت ويه اهلي عزلت وحدي حته اخذ راحتي وي زوجتي وابرد راس حته زوجتي تتفرغلي متحير بفلان وعلان وبصراحة ياخوية ونتي اختي اريد اكلج شي مو عيب هوة بس اني رومانسي اريد زوجتي رومانسيه ادللهة ودللني اسمع منهة كلمه طيبه كلمة جميله كلمة حب وحنية كل هذني ماكو تصدكين ام عبودي كلمة الله يساعدك من ارجع اتمنه اسمعهة منهة وماكو ومليت واني اعلم بيهة مليت واني اطلب منهة
كتله مابيهة شي لا تيأس منهة مدام من كل الجوانب زينه هددهة كوللهة ازوج عليج
ضحك وجان يكلي تكييف تكول يا ريت ولا تطلب من شي هاي مقدرتي
كتله ماكو مرة تكيف رجلهة يزوج عليهة وذا تكلك روح ازوج فكلمة الي تنكال بس ساعة الجد يتغير كلشي
كتلة اني مال ادورلك مرة فهاي انساها بس راح اساعدك بشغله كلي شنو هية كتلة اكو شغلات النسوان شكد متكون حجر وماعدهة مشاعر بس ساعة الغيرة كلشي يتغير
كلي اخوج اني وسمع كلامج وشتشيرين علية اسوي
كتلة انته حاولت تغير اسلوبك وياها بالبيت بما انه انتو اولادكم زغار فالكم مطلق الحرية يعني انته بادر ماكدر اوضحلك اكثر بس انته افهمهة غير نفسك
كلي مليت انتي شتحجين ماكدر كل التفاصيل احجيهة بس ابسط شي اجي من الدوام اريدهة تتلكاني من الباب تكلي الله يساعدك والله حته اشيلهة وفتر بيهة وهية متقبل اضوج
كتله المهم تريدهة تتغير حركو الغيرة عدهة كلي شلون كتله النسوان بالتجمعات شيسمعن يطبقن علم خواتك يحركن غيرتهة خلي يحجون كدامهة شلون يتصرفن ببيوتهن وراها اسمع اخبارك
ورة فترة رجع راسلني سلام عليكم السلام اني اريد اشكر منج كعدت ويه اختي وفهمتهة وهية راسا باشرت بالتجمعات والحمد لله داشوف نتيجة كتله الله يوفقكم وخلي عينك على بيتك صدكني موزين التعرفة احسن من المتعرفة
ورة فترة رجع راسلني ام عبودي رجعت ريمة العادتهة القديمة ونوب هية الي تكلي روح ازوج وجوز مني ولحل
كتله اعذرني اني بموضوعك مافيدك ترة لان اني ضد زواج الثاني بس اوصيك ابقه حاول ولا تخسرهة
( الي فهمتة من خلال رؤوس الاقلام الرجال رومانسي ويحب الدلال ويريد يدلل ويتدلل ويحب الاهتمام والعناية بس زوجته بعيدة كل البعد عن الرومانسية وهوة محاول وياها هواي ليما جازع ) وراها اني تركت الكروب وماعرفت بعد اخبارة
وهاذا هم نموذج ثاني
وعندي نموذج ثالث من افرغ اكتبلكم عنة
ودمتم سالمين 🌷🌷
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
